Esekiel 41

₁Olmmái doalvvui mu sisa tempelhállii. Son mihtidii uksabealláid, ja dat ledje goabbáge guhtta állana gasu. Nu gassagat ledje uksabeallát. ₂Uksaráigi lei logi állana govddu ja seainnit dan goappáge bealde ledje vihtta állana govddu. Son mihtidii tempelhálla, ja dat lei njealljelogi állana guhku ja guoktelogi állana govddu.

₃Son manai siskkimuš latnjii ja mihtidii uksabealláid, ja dat ledje guokte állana gasu. Uksaráigi lei guhtta állana ja seainnit dan goappáge bealde čieža állana govddu. ₄Son mihtidii lanja mii lei tempelhálla siskkobealde, ja dat lei guoktelogi állana guhku ja guoktelogi állana govddu. Son dajai munnje: “Dát lea basimus boaššu.”

₅Son mihtidii tempela seainni, ja dat lei guhtta állana asu. Gilgahuksehus oppa tempela birra lei njeallje állana govddu. ₆Gilgahuksehusa lanjat ledje golmma gearddis. Oalgelanjaid seainni mielde tempela vuostá ledje steallit giddenráiggiid sadjái; tempela seainnis eai ožžon leat giddenráiggit. ₇Lokta mas ledje oalgelanjat, govddui bajás guvlui. Tempelis lei nappo lokta bajás guvlui ja dan birra. Mađe badjeleappos lokta lei tempela vuostá, dađe govddit dat lei. Vuolimus gearddis sáhtii goargŋut bajimus geardái gaskkamus gearddi čađa. ₈Mun oidnen ahte tempel lei aládasa alde. Oalgelanjaid muvravuođđu lei olles stákku asu, guhtta állana. ₉Oalgeviesu olgoseaidni lei vihtta állana asu. Gáhta tempela oalgelanjaid ₁₀ja gámmáriid gaskkas tempela goappáge bealde lei guoktelogi állana govddu. ₁₁Oalgeviesus ledje uvssat gáhta guvlui, okta davás guvlui ja okta lulás guvlui. Stealli gáhta guoras lei vihtta állana govddu.

₁₂Visti mii lei rabas šilju guoras dan oarjjabealde, lei čiežalogi állana govddu, ja dan seainnit ledje vihtta állana asu. Vistti guhkkodat lei ovccilogi állana. ₁₃Olmmái mihtidii tempela, ja dat lei čuođi állana guhku. Rabas šillju oktanaga visttiin ja dan seinniiguin lei čuođi állana guhku. ₁₄Tempela nuorttabeale ovdaseaidni oktanaga rabas šiljuin lei čuođi állana. ₁₅Rabas šilju duogábealde olmmái mihtidii vistti guhkkodaga ja dan goappáge beale stelliid, ja guhkkodat lei oktiibuot čuođi állana.

Tempela siskkit oasis ja ovdalanjas ₁₆lei rohpi. Ihkkoniin lei čeargalas ja golmmadásat gárpmat. Buot seinniin lei muorraskoađas láhttis gitta ihkkoniid rádjái, main ledje luŋkkát. ₁₇Muorraskoađas olii gitta uvssa badjeravdda rádjái. Tempela siste ja olggobealde miehtá buot seinniid, sihke siskkobeale ja olggobeale seinniid, ledje sajit ₁₈main ledje čuhppojuvvon kerubat ja pálmmat, vurrolagaid ain keruba ja pálbma. Guđege kerubas ledje guokte ámadaju, ₁₉olbmo ámadadju nuppi pálmma guvlui ja ledjona ámadadjugis nuppi pálmma guvlui. Tempela seinniin ledje dievva diekkár govat. ₂₀Láhtti rájes uvssa badjeravdda rádjái ledje čuhppojuvvon kerubat ja pálmmat. ₂₁Tempelhállas ledje njealječiegat uksabeallát. Bassi boaššu ovddas oidnui ₂₂dego áltár mii lei dahkkojuvvon muoras. Dat lei golbma állana alu, guokte állana guhku ja guokte állana govddu. Das ledje čiehkafiellut, ja dan juolgi ja siiddut ledje muoras. Olmmái dajai munnje: “Dát lea dat beavdi mii lea Hearrá muođuid ovddas.” ₂₃Sihke tempelhállas ja bassi boaššus ledje guokte uvssa. ₂₄Goappáge uvssas ledje guokte uksabeali maid sáhtii máhcastit rabas. ₂₅Tempelhálla uvssat ledje hervejuvvon čuhppojuvvon kerubaiguin ja pálmmaiguin seammá láhkái go seainnit. Olgun ovdalanja ovddas lei muoras dahkkojuvvon goavdi. ₂₆Ovdalanjas goappáge beale seainnis ledje čeargalasihkkonat ja čuhppojuvvon pálmmat, ja nu lei maiddái tempela siidolanjain ja govddiin.