Esekiel 47

₁Olmmái doalvvui mu ruoktot tempela uksanjálbmái. Dalle mun oidnen čázi golggiideamen uksalasá vuole ja golgamin nuorttas guvlui; tempela julggabeallihan lei nuorttas guvlui. Čáhci golggai tempela olgeš bealde, áltára lulábeale nuorttas guvlui. ₂Olmmái doalvvui mu olggos davvepoarttas ja das ain olgomuvrra guora gitta dan portii mii lea nuorttas guvlui, ja das čáhci golggai poartta lulábealde. ₃Olmmái vázzilii nuorttas guvlui mihttobáddi gieđas. Son mihtidii duhát állana ja siđai mu gállit čázi rastá, ja čáhci olii juolgeruohttasiid rádjái. ₄Son mihtidii fas duhát állana ja siđai mu gállit čázi rastá, ja dál čáhci olii čippiid rádjái. Son mihtidii fas duhát állana ja siđai mu gállit čázi rastá, ja dál čáhci olii gitta alimiid rádjái. ₅Son mihtidii fas duhát állana, ja dál ája lei šaddan eatnun, inge mun sáhttán gállit dan rastá. Čáhci lei čieŋal, das lei vuodjančáhci, dat ii lean gállimis rastá. ₆Olmmái dajai munnje: “Oainnátgo, olmmoš?” Dasto son doalvvui mu ruoktot čáhcegáddái. ₇Go mun bohten gáddái, de mun oidnen ahte eanu goappáge bealde ceaggájedje hui ollu muorat. ₈Olmmái dajai munnje: “Dát čáhci golgá eatnama čađa nuorttas guvlui, dat golgá vulos Jordanleahkái ja das ain merrii man sáltečázi dat dearvvašmahttá. ₉Gosa dát eatnu golgá, doppe buot heakkalaččat eallájit ja giđđudit dan čázis, ja guolit leat hui ollu. Gosa dát čáhci golgá, doppe buot čáhci dearvvašmuvvá. Gosa dat eatnu luoitá, doppe buot eallá. ₁₀Guollebivdit čužžot gáddeguoras, En-Gedi rájes gitta En-Eglajima rádjái sii goikadit firpmiideaset. Doppe leat buotlágan guollešlájat, dat leat seammá valjis go Stuorrameara guolit. ₁₁Muhto omut ja láddot eai dearvvašmuva, ja dain oažžu sáltti. ₁₂Miehtá eatnogáttiid, eanu goappáge bealde, šaddet buotlágán šattosmuorat. Muoraid lasttat eai golnna ja dain leat álo šaddosat. Juohke mánus dat šaddadit varas šaddosiid, danne go čáhci maid dat ožžot, boahtá bassibáikkis. Daid šaddosat adnojuvvojit borramuššan ja daid lasttat dálkkasin.”

₁₃Ná cealká Hearrá Ipmil: Dát leat dan eatnama rájit maid dii galgabehtet juogadit opmodahkan Israela guovttenuppelohkái čerdii; Josef galgá oažžut guokte oasi. ₁₄Juogadehket eatnama nu ahte guđege čearda oažžu seammá ollu. Mun vurdnon addit dan din áhčiide, ja dan dihte dát eanan addojuvvo didjiide opmodahkan. ₁₅Dát leat eatnama rájit: Davvin rádji manná Stuorramearas Hetlonii ja ain Lebo-Hamatii ja Sedadii, ₁₆Berotai ja Sibrajimii mii lea Damaskusa ja Hamata eatnamiid gaskkas, ja gitta Hasar-Enonii mii lea Havrana ráji guoras. ₁₇Mearas rádji manná Hasar-Enonii; Damaskusa ja Hamata eatnamat leat dan davábealde. Dat lea davverádji. ₁₈Nuortarádji vuolgá Havrana ja Damaskusa guovlluid gaskkas. Jordan lea rádjin Gileada ja Israela eatnama gaskkas gitta Nuortamerrii, gitta Tamarii. Dat lea nuortarádji. ₁₉Lullerádji manná Tamaris lulás gitta Meribat Kadeša ádjagiidda ja doppe rádjejoga mielde Stuorramerrii. Dat lea lullerádji. ₂₀Oarjjabealde lea rádjin Stuorramearra gitta dan báikái mii lea Lebo-Hamata buohta. Dat lea oarjerádji.

₂₁Dán eatnama dii galgabehtet juogadit Israela čearddaide. ₂₂Go dii juogadehpet eatnama opmodahkan, de dat vierrásat geat ásset ja leat riegádahttán mánáid din gaskkas, galget adnojuvvot eatnamis riegádan israellažžan. Sii galget oažžut opmodaga ovttas dinguin, go eanan juogaduvvo Israela čearddaide. ₂₃Dii galgabehtet addit vierrásii opmodaga dan čeardda eatnamis man gaskkas son ássá, cealká Hearrá Ipmil.