1. Mosesgirji 10

₁Dát lea Noa bártniid, Sema, Hama ja Jafeta, sohkalogahallan. Dulvvi maŋŋil sidjiide riegádedje bártnit. ₂Jafeta bártnit ledje Gomer, Magog, Madai, Javan, Tubal, Mešek ja Tiras. ₃Gomera bártnit ledje Aškenas, Rifat ja Togarma. ₄Javana bártnit ledje Eliša ja Taršiš; maiddái kittelaččat ja rodanlaččat leat su nális. ₅Dain earránedje iežaset eatnamiidda rittuid ja sulluid álbmogat, guhtege álbmot iežas giela ja čeardda mielde.

₆Hama bártnit ledje Kuš, Misrajim, Put ja Kanaan. ₇Kuša bártnit ledje Seba, Havila, Sabta, Rama ja Sabteka. Rama bártnit ledje Saba ja Dedan.

₈Kušii riegádii maiddái Nimrod, gii lei vuosttaš veagalaš ráđđejeaddji eatnama alde. ₉Son lei veagalaš bivdi Hearrá muođuid ovddas. Danne celkojuvvoge: “Lea nugo Nimrod, veagalaš bivdi Hearrá muođuid ovddas.” ₁₀Su riikka álgun ledje Babel, Erek, Akkad ja Kalne Sineara eatnamis. ₁₁Dan eatnamis son manai Assyriai ja huksii Ninive, Rehobot-Ira ja Kalaha ₁₂ja vel Resena stuorra gávpoga Ninive ja Kalaha gaskii.

₁₃Misrajima nális leat ludlaččat, anamlaččat, lehablaččat, naftuhlaččat, ₁₄patroslaččat, kasluhlaččat geain filistalaččat leat surggiidan, ja kaftorlaččat.

₁₅Kanaanii riegádedje Sidon, su vuosttašriegádeaddji, ja Het. ₁₆Kanaana nális leat maid jebuslaččat, amorlaččat ja girgašlaččat, ₁₇hivvelaččat, arkilaččat ja sinlaččat, ₁₈arvadlaččat, semarlaččat ja hamatlaččat. Das maŋŋil kanaanlaččaid čearddat bieđganedje, ₁₉ja sin eanan olii Sidonis Gerarii ja gitta Gaza rádjái ja Sodoma, Gomorra, Adma ja Sebojima guvlui gitta Leša rádjái. ₂₀Dát ledje Hama bártniid čearddat ja gielat, eatnamat ja álbmogat.

₂₁Maiddái Semii riegádedje bártnit. Son lei Jafeta boarráset viellja, ja son lei oppa Ebera náli máddu. ₂₂Sema bártnit ledje Elam, Assur, Arpakšad, Lud ja Aram. ₂₃Arama bártnit ledje Us, Hul, Geter ja Maš. ₂₄Arpakšadii riegádii Šelah ja Šelahii Eber. ₂₅Eberii riegádedje guokte bártni: Nuppi namma lei Peleg, dasgo eanan juhkkojuvvui su áigge. Su vielja namma lei Joktan. ₂₆Joktanii riegádedje Almodad, Šelef, Hasarmavet, Jerah, ₂₇Hadoram, Usal, Dikla, ₂₈Obal, Abimael, Saba, ₂₉Ofir, Havila ja Jobab. Sii buohkat ledje Joktana bártnit. ₃₀Sin ássanguovlu olii Mešas gitta Sefara rádjái nuorta váriin. ₃₁Dát ledje Sema bártniid čearddat ja gielat, eatnamat ja álbmogat.

₃₂Dát ledje Noa bártniid čearddat buolvvaideaset ja álbmogiiddiset mielde, ja sis leat álbmogat biđggiidan miehtá eatnama dulvvi maŋŋil.