1. Mosesgirji 12

₁Hearrá celkkii Abramii: “Vuolgge eatnamisttát, sogat luhtte ja áhčát viesus dan eatnamii maid mun čájehan dutnje. ₂Mun dagan du stuorra álbmogin, mun buressivdnidan du ja dagan du nama stuorisin, ja dat šaddá buressivdnádussan. ₃Mun buressivdnidan daid geat buressivdnidit du ja garuhan daid geat garuhit du, ja du siste buressivdniduvvojit buot eatnama sogat.”

₄Abram vulggii, nugo Hearrá lei gohččon, ja Lot vulggii ovttas suinna. Abram lei čiežalogiviđajahkásaš go son vulggii Harranis. ₅Abram válddii mielde áhkás Saraja ja vieljas bártni Lota ja buot opmodaga, maiddái buot šlávaid maid sii ledje háhkan Harranis. Dasto sii johttájedje Kanaanii.

Go sii bohte Kanaanii, ₆de Abram vádjolii Kanaana eatnama čađa Sikema bassi báikki rádjái, More terebintta rádjái. Dan áigge kanaanlaččat ásse dan eatnamis. ₇Hearrá almmustuvai Abramii ja celkkii: “Du nállái mun attán dán eatnama.” Ja Abram ráhkadii dasa áltára Hearrái, guhte lei almmustuvvan sutnje. ₈Doppe son manai Betela nuorttabeali várreeatnamii ja ceggii goađi nu ahte Betel lei oarjjabealde ja Ai nuorttabealde. Son ráhkadii dohko áltára ja čuorvvui Hearrá nama. ₉Abram jođii maŋistaga guhkibuidda Negeva guvlui.

₁₀De šattai eatnamii nealgi. Abram manai Egyptii ja ásai doppe vierisin, dasgo nealgi lei garas eatnamis. ₁₁Go son lahkanišgođii Egyptii, de son dajai áhkkásis Sarajii: “Mun dieđán ahte don leat čáppa nisson. ₁₂Go egyptalaččat oidnet du ja ipmirdit ahte don leat mu áhkká, de sii goddet mu ja diktet du eallit. ₁₃Daja nappo ahte leat mu oabbá, vai munnje geavvá bures du dihte ja beasan eallit.”

₁₄Go Abram bođii Egyptii, de egyptalaččat oidne ahte Sarai lei hui čáppa nisson. ₁₅Farao oaivámuččatge oidne Saraja ja rámidedje su faraoi, ja son vižžojuvvui farao vissui. ₁₆Farao dagai Abramii buriid Saraja dihte, ja Abram oaččui smávvaomiid, stuorraomiid ja áseniid, šlávaid ja šlávvanissoniid, ásendámmáid ja kamelaid.

₁₇Muhto Hearrá divttii stuorra givssiid deaividit farao ja su viesu Abrama áhká Saraja dihte. ₁₈Dalle farao rávkkai Abrama ja dajai: “Maid don leat dahkan munnje! Manne don it muitalan munnje ahte son lea du áhkká? ₁₉Manne don dadjet ahte son lea du oabbá, nu ahte mun válden su áhkkánan? Dá lea du áhkká, váldde su ja mana!” ₂₀Ja farao gohčui olbmáidis doalvut Abrama, su áhká ja oppa su opmodaga eatnamis eret.