1. Mosesgirji 18

₁Hearrá almmustuvai Abrahamii Mamre áikkaid luhtte. Abraham lei čohkkámin goađis uvssas go beaivi lei báhkkaseamos, ₂ja go son geahčastii, de son oinnii golbma olbmá lahkoneamen. Dalán go son oinnii sin, de son viehkalii goahteuvssas sin ovddal ja gopmirdii eatnamii muođuid. ₃Son dajai: “Hearrá, jos mun lean gávdnan árpmu du čalmmiin, de ale mana bálvaleaddját meattá. ₄Almma mun oaččun buktit veaháš čázi, vai beassabehtet bassat julggiid ja vuoiŋŋastit dás muora vuolde? ₅Mun vieččan didjiide veahá borramuša, vai beassabehtet áhpásmuvvat ovdal go joatkibehtet mátkki. Almma dii dan dihte lehpetge boahtán mu, bálvaleaddjádet, lusa.” Sii celke: “Daga nugo leat sárdnon.” ₆Abraham doamai goahtái Sara lusa ja dajai: “Viežžal golbma mihtu buoremus jáffuid, duhppes dáiggi ja dahkal gáhkuid!” ₇De son viegai omiid lusa, válddii čáppa buori gálbbi ja attii dan bálvásis, gii ráhkadasttii das biepmu. ₈Son buvttii vuoja, mielkki ja gálbbi maid bálvá lei ráhkadan, ja bijai daid gussiidis ovdii. Ieš son čuoččui gussiid luhtte muora vuolde dan botta go sii boradedje.

₉Olbmát jerre Abrahamis: “Gos lea Sara, du áhkká?” Son vástidii: “Son lea goađis.” ₁₀Dalle okta sis dajai: “Mun máhcan du lusa boahtte jagi dán muttus, ja dalle áhkástat Saras lea bárdni.” Muhto Sara lei Abrahama duohken goahteuvssas ja gulai mii daddjojuvvui. ₁₁Abraham ja Sara leigga juo hui boarrásat, iige Sara lean šat mánnáoažžunagis. ₁₂Danne Sara boagustii ja jurddašii: “Sáhttágo dákkár goldnan nissonis vel gohccát hállu? Ja mu hearráge lea juo boaris.” ₁₃Dalle Hearrá jearai Abrahamis: “Manne Sara boagustii? Manne son jurddašii: ‘Sáhtášingo mun duođaid oažžut máná, go lean juo ná boaris?’ ₁₄Leago mihkkege veadjemeahttun Hearrái? Boahtte jagi dán muttus mun máhcan du lusa, ja dalle Saras lea bárdni.” ₁₅Sara šiittii ja dajai: “In mun boagustan”, dasgo son lei balus. Muhto Hearrá celkkii: “Gal don boagustit.”

₁₆De olbmát čuožžiledje ja vulge Sodoma guvlui, ja Abraham mieđuštii sin muhtun gaskka. ₁₇Hearrá jurddašii: “Manin mun galggašin čiehkat Abrahamis maid áiggun dahkat? ₁₈Dasgo Abraham šaddá stuorra ja fámolaš álbmogin, ja su siste buressivdniduvvojit buot eatnama álbmogat. ₁₉Munhan lean válljen su, vai son galgá gohččut iežas bártniid ja náli bissut Hearrá geainnus ja dahkat dan mii lea riekta ja vuoigat. Dalle ollašuvvá dat maid mun lean lohpidan Abrahamii.” ₂₀Ja Hearrá celkkii: “Váidalusčuorvvas mii gullo Sodoma ja Gomorra ássiid dihte lea stuoris, ja sin suddu lea hui lossat. ₂₁Mun áiggun mannat geahččat leatgo sii duođaid dahkan buot dan bahá man dihte váidalus lea boahtán mu ovdii, ja jus eai leat, de mun dáhtun diehtit dan.”

₂₂Olbmát vulggiiga Sodoma guvlui, muhto Hearrá bázii vel sártnodit Abrahamiin. ₂₃Abraham lávkii lagabui ja jearai: “Áiggutgo don duššadit vanhurskásiid oktan ipmilmeahttumiiguin? ₂₄Jos mat gávpogis leat vihttalogi vanhurskása, duššadatgo dalle singe? Itgo seasttáše báikki dan viđalogi vanhurskása dihte geat ásset doppe? ₂₅Ithan don sáhte goddit vanhurskásiid oktan ipmilmeahttumiiguin, nu ahte geavvá vanhurskásiidda seammá láhkái go ipmilmeahttumiidda. Ithan don nu sáhte dahkat! Iigo oppa eatnama duopmár dubmeše riekta?” ₂₆Hearrá celkkii: “Jos mun gávnnan Sodomas vihttalogi vanhurskása, de sin dihte mun seasttán oppa gávpoga.” ₂₇Abraham dajai: “Mun lean arvan sárdnut Hearráin, vaikko leange dušše gavja ja gutna. ₂₈Naba jos dan vihttalogi vanhurskásis váilot vihtta? Duššadatgo dalle oppa gávpoga dan vihttasa dihte?” Hearrá vástidii: “In duššat jos gávnnan doppe njealljelogivihtta.” ₂₉Abraham jearai vel: “Naba jos doppe leat njealljelogi?” Hearrá vástidii: “Dan njealljelohkása dihte mun in daga dan.” ₃₀Abraham dajai: “Ale suhta, Hearrá, vaikko mun vel sártnunge. Naba jos doppe leat golbmalogi?” Hearrá vástidii: “In daga dan, jos gávnnan doppe golbmalohkása.” ₃₁Muhto Abraham dajai: “Mun lean arvan sárdnut Hearráin. Naba jos doppe gávdnojit guoktelogi?” Hearrá celkkii: “Dan guoktelohkása dihte mun in duššat dan.” ₃₂Abraham dajai: “Ale suhta, Hearrá, go mun sártnun vel dán háve. Naba jos doppe gávdnojit logi?” Hearrá celkkii: “Dan lohkása dihte mun in duššat dan.” ₃₃Go Hearrá lei sárdnon Abrahamiin, de son vulggii eret, ja Abraham máhcai báikásis.