1. Mosesgirji 27

₁Go Isak lei boarásmuvvan ja su čalmmit ledje hedjonan nu ahte son ii šat oaidnán, de son rávkkai lusas boarráset bártnis Esau ja dajai sutnje: “Bártnážan!” Esau vástidii: “Maid, áhčážan?” ₂Isak dajai: “Mun lean juo boarásmuvvan, inge dieđe goas jámežan. ₃Váldde dal vearjjuidat, njuollaskuohpu ja dávggi, ja gotte munnje juogašlái meahciealli. ₄Ráhkat munnje njálgga herskko, dakkára masa mun liikon, vai beasan borrat ja buressivdnidit du ovdal go jámán.”

₅Muhto Rebekka gulai go Isak sártnui bártniinis Esauin. Go Esau dasto lei mannan meahccái bivdit áhččásis meahciealli, ₆de Rebekka dajai bárdnásis Jakobii: “Mun gullen go du áhčči eske dajai vielljasat Esaui: ₇‘Bivdde munnje meahciealli ja ráhkat munnje njálgga biepmu, vai mun beasan buressivdnidit du Hearrá muođuid ovddas ovdal go jámán.’ ₈Ja dál, bártnážan, jeagat mu ja daga nugo mun gohčun. ₉Viečča munnje ealus guokte gihci, de mun ráhkadan áhččásat njálgga biepmu masa son liiko. ₁₀Doalvvo dan áhččásat, vai son borrá ja de buressivdnida du ovdal go jápmá.” ₁₁Jakob dajai eadnásis: “Muhto mu viellja Esauhan lea guolgás olmmái, ja mun lean guolggaheapme. ₁₂Naba jos áhčči guldala mu? Dalle son atná mu bilkideaddjin, ja mu oassin šaddá garuhus iige buressivdnádus.” ₁₃Eadni dajai sutnje: “Deivos dat garuhus munnje, bártnážan. Gula fal mu ja mana viežžat gihciid.”

₁₄De Jakob vieččai gihciid eadnásis, ja su eadni ráhkadii Isakii njálgga herskko masa son liikui. ₁₅Rebekka válddii boarráset bártnis Esau buoremus biktasiid mat ledje su luhtte goađis, ja gárvvuhii daid nuorat bárdnásis Jakobii. ₁₆Gihcenáhkiid son giesai su gieđaid birra ja su guolggahis čeabeha birra. ₁₇Dasto son attii bártnis Jakoba gihtii herskko ja láibbi maid lei ráhkadan. ₁₈Jakob manai áhčis lusa ja dajai: “Áhčči!” Isak vástidii: “Dá mun lean, bártnážan. Gii don leat?” ₁₉Jakob dajai áhččásis: “Mun lean Esau, du vuosttašriegádeaddji. Mun lean dahkan nugo don gohččot. Lihka čohkut, bora mu báhčin sállaša ja buressivdnit mu.” ₂₀Isak jearai: “Mo don leat dalle nu fargga gávdnan dan, bártnážan?” Jakob vástidii: “Hearrá, du Ipmil, vuolggahii dan mu ovdii.” ₂₁Dalle Isak dajai Jakobii: “Boađe lagabuidda, bártnážan, vai mun beasan guldalit, leatgo don duođaid mu bárdni Esau vai it.” ₂₂Jakob manai áhčis lusa, ja Isak guldalii su ja dajai: “Jietna lea Jakoba jietna, muhto gieđat leat Esau gieđat.” ₂₃Isak ii dovdan Jakoba, danin go su gieđat ledje guolgát dego su vielja Esau gieđat, ja son buressivdnidii Jakoba. ₂₄Isak jearai vel: “Leatgo don duođaid mu bárdni Esau?” Jakob vástidii: “De lean.” ₂₅Dalle Isak dajai: “Buvtte munnje borramuša, vai mun beasan borrat bárdnán sállaša ja buressivdnidit du.” Jakob buvttii sutnje biepmu ja viinni, ja son borai ja jugai. ₂₆De Isak dajai: “Boađe goit lagabuidda ja cummis mu, bártnážan.” ₂₇Jakob manai su lusa ja cummistii su, ja Isak havssii su biktasiid hája. Son buressivdnidii su ja celkkii:

₃₀Isak lei aiddo geargan buressivdnideames Jakoba ja Jakob lei vuolgán áhčis luhtte, go Esau bođii bivdinmohkis. ₃₁Songe ráhkadii njálgga herskko, buvttii áhččásis ja dajai: “Áhččán, čohkán borrat maid bárdnát lea buktán meahcis, vai beasat buressivdnidit mu.” ₃₂Su áhčči Isak jearai: “Gii don leat?” Esau vástidii: “Mun lean bárdnát Esau, du vuosttašriegádeaddji.” ₃₃Dalle Isak suorganii sakka ja jearai: “Gii dalle lei dat gii gottii meahciealli ja buvttii munnje? Mun borren ovdal go don bohtet ja buressivdnidin su, ja dál son lea buressivdniduvvon.” ₃₄Go Esau gulai áhčis sániid, de son čirrui jitnosit ja bahččagit ja dajai áhččásis: “Buressivdnit muge, áhčážan!” ₃₅Dalle Isak dajai: “Du viellja bođii gávvilvuođain ja válddii buressivdnádusa maid don livččet galgan oažžut.” ₃₆Dalle Esau dajai: “Dan dihte son gohčoduvvoge Jakobin, go son lea juo guovtte geardde beahttán mu. Son válddii mu vuosttašriegádeami vuoigatvuođa, ja dál son lea váldán mu buressivdnádusage!” Esau jearai vel: “Iigo dus leat buressivdnádus mu várásge?” ₃₇Isak vástidii Esaui: “Mun lean bidjan su du hearrán, buot su vieljaid mun lean addán sutnje bálvaleaddjin, ja mun lean addán sutnje gortni ja viinni. Maid mun dalle vel galggan dahkat du ovdii, bártnážan?” ₃₈Esau dajai áhččásis: “Dušše okta buressivdnádusgo dus lea, áhčážan? Buressivdnit muge, áhčážan!” Ja Esau čierui jitnosit. ₃₉Su áhčči Isak dajai sutnje:

₄₁Esau anii bahčavuođa Jakoba vuostá dan dihte go Jakob lei ožžon áhči buressivdnádusa, ja son jurddašii: “Fargga boahtá áigi goas moai moraštetne áhččáme. Dalle mun gottán vielljan Jakoba.” ₄₂Go Rebekkai muitaluvvui maid su boarráset bárdni Esau áiggui, de son rávkkai nuorat bártnis Jakoba ja dajai sutnje: “Du vieljas Esaus lea mávssahanmiella, ja son áigu goddit du. ₄₃Bártnážan, daga nugo mun dajan: Báhtar dálán vielljan Labana lusa Harranii. ₄₄Oro su luhtte muhtun áiggi, dassážii go vieljat moarri lea vássán ₄₅ja son lea vajáldahttán maid don dahket sutnje. Dalle mun bijan dutnje sáni ja vieččahan du doppe. Manne mun galggašin massit dudno goappašagaid ovttat beaivvi?”

₄₆Rebekka dajai Isakii: “Mun láittastuvan jámas dáid hetlaš nissoniid dihte. Jos Jakob váldá áhkkán hetlaš nieidda, dakkára go duot guovttos, de manin mun dalle oppa ealánge?”