1. Mosesgirji 35

₁Ipmil celkkii Jakobii: “Vuolgge Betelii, ása dohko ja hukse áltára dan Ipmilii guhte almmustuvai dutnje dalle go don báhtarit Esau-vieljastat.” ₂Dalle Jakob dajai iežas bearrašii ja buot olbmuidasas: “Jávkadehket vieris ipmiliid mat dis leat, buhtistehket iežaideattet ja molsot biktasiid, ₃de mii vuolgit Betelii. Mun huksen dohko áltára Ipmilii guhte gulai mu mu heahtebeaivvi ja lei muinna dalle go mun ledjen mátkkis.” ₄De sii adde Jakobii buot vieris ipmiliid mat sis ledje, ja bealljerieggáid, ja Jakob čiegai daid dan terebintta vuollái mii lei Sikema lahka. ₅De sii johttájedje, ja Ipmila ballu bođii birasgávpogiid ássiide, nu ahte sii eai doarridišgoahtán Jakoba bártniid.

₆Jakob ja buot su olbmot bohte Lusii dahjege Betelii mii lea Kanaanis. ₇Dohko son huksii áltára ja gohčodii dan báikki El Betelin, dasgo das Ipmil lei almmustuvvan sutnje dalle go son báhtarii vieljastis.

₈Debora, Rebekka njamaheaddji, jámii dohko, ja son hávdáduvvui áikka vuollái Betela vuollelii. Áika gohčoduvvui Čierrunáikan.

₉Go Jakob lei máhccan Paddan Aramis, de Ipmil almmustuvai fas sutnje ja buressivdnidii su. ₁₀Ipmil celkkii sutnje: “Du namma lea Jakob, muhto dás maŋás don it šat gohčoduvvo Jakobin. Du namma lea Israel.” Nu son gohčoduvvui Israelin. ₁₁Ipmil celkkii vel sutnje: “Mun lean Ipmil, Buotveagalaš. Leage šattolaš ja lassán! Dus šaddá álbmot, velá máŋga álbmoga, ja don šattat gonagasaid máddun. ₁₂Dan eatnama maid mun adden Abrahamii ja Isakii, mun attán dál dutnje, ja maiddái du nállái mun attán dan eatnama.” ₁₃De Ipmil vulggii Jakoba luhtte dan báikkis gos lei sárdnon suinna.

₁₄Jakob ceggii bácci, muitogeađggi, dan sadjái gos Ipmil lei sárdnon suinna, golggahii dan ala juhkamušoaffara ja vuoiddai dan oljjuin. ₁₅Ja son gohčodii Betelin dan báikki gos Ipmil lei sárdnon suinna.

₁₆Dasto sii johttájedje Betelis. Go ain lei mátki Efratai, de Rakel riegádahttigođii, ja šattai hui váttis riegádahttin. ₁₇Go ávttat ledje garrasepmosat, de sealgeeadni dajai sutnje: “Ale bala, don oaččut bártni dánge háve.” ₁₈Go Rakel lei lahka jámi, de son bijai bárdnái namman Benoni, muhto Jakob gohčodii su Benjaminin. ₁₉Rakel jámii, ja son hávdáduvvui Efrata dahjege Betlehema bálgá gurrii. ₂₀Jakob ceggii muitogeađggi su hávddi ala, ja Rakela hávdegeađgi lea das velá otná beaivvige.

₂₁De Israel johttái ja ceggii goađis dobbelii Migdal Edera. ₂₂Go son ásai dan guovllus, de oktii Ruben veallái Bilhain, áhčis liigeáhkáin, ja Israel gulai dan.

Jakobis ledje guoktenuppelohkái bártni. ₂₃Lea bártnit ledje Ruben, Jakoba vuosttašriegádeaddji, ja Simeon, Levi, Juda, Isaskar ja Sebulon. ₂₄Rakela bártnit leigga Josef ja Benjamin. ₂₅Bilha, Rakela šlávvanissona, bártnit leigga Dan ja Naftali. ₂₆Silpa, Lea šlávvanissona, bártnit leigga Gad ja Ašer. Dát ledje Jakoba bártnit geat riegádedje sutnje Paddan Aramis.

₂₇Jakob bođii áhčis Isaka lusa Mamrei, Kirjat Arbai, dat lea Hebron, gos Abraham ja Isak leigga ássan vierisin. ₂₈Isaka eallináigi lei čuođigávccilogi jagi. ₂₉De Isak jámii ja váldojuvvui olbmuidis lusa boarisin ja beivviin gallánan. Su bártnit Esau ja Jakob hávdádeigga su.