1. Mosesgirji 38

₁Daid áiggiid Juda vulggii vieljaidis luhtte ja manai orrut muhtun adullamlaš olbmá lusa gean namma lei Hira. ₂Doppe Juda deaivvai Šua-nammasaš kanaanlaš olbmá nieidda, válddii su áhkkán ja elii suinna. ₃Nisson šattai áhpeheapmin ja riegádahtii bártni. Son bijai bárdnái namman Er. ₄Ja nisson šattai fas áhpeheapmin, riegádahtii bártni ja bijai sutnje namman Onan. ₅Nisson riegádahtii vel bártni ja bijai sutnje namman Šela. Juda lei Kesibis dalle go Šela riegádii.

₆Juda válddii Erii, vuosttašriegádeaddjásis, áhká gean namma lei Tamar. ₇Muhto Er, Juda vuosttašriegádeaddji, lei bahá Hearrá čalmmiin, ja Hearrá gottii su. ₈De Juda dajai Onanii: “Mana vieljat áhká lusa ja deavdde sivjjotgeatnegasvuođat ja atte vielljasat náli.” ₉Muhto Onan diđii ahte mánná ii adnojuvvoše su mánnán. Álo go son veallái sivjjogiinnis, de son golggahii siepmanis eatnamii, amas addit vielljasis náli. ₁₀Dat maid son dagai lei bahá Hearrá čalmmiin, ja danin Hearrá gottii su maid. ₁₁Dalle Juda dajai mannjásis Tamarii: “Oro leaskan áhččát viesus dassážii go mu bárdni Šela šaddá rávisin.” Son balai ahte Šelage jápmá vieljaidis láhkái. Nu Tamar manai ruoktot ja orui áhčis viesus.

₁₂Guhkes áiggi das maŋŋil jámii Šua nieida, Juda áhkká. Go moraštanáigi lei vássán, de Juda vulggii adullamlaš ustibiinnis Hirain sin lusa Timnai geat beaskidedje su sávzzaid. ₁₃Go Tamar gulai ahte su vuohppa lei mannamin Timnai beaskidit sávzzaidis, ₁₄de son nuolai leaskabiktasiiddis, govččai muođuidis beaittaliinniin ja čohkánii Enajima luoddaerrui Timna geainnu gurrii. Son lei fuomášan ahte vaikko Šela lei juo rávis olmmoš, de son ii lean addojuvvon Šelai áhkkán.

₁₅Juda oinnii Tamara ja gáttii su fuorrán, danin go Tamar lei gokčan muođuidis. ₁₆Son mohkastii Tamara lusa geaidnogurrii ja dajai sutnje: “Divtte mu veallát duinna.” Son oainnat ii diehtán ahte nisson lei su mannji. Tamar jearai: “Maid don attát munnje, jos beasat veallát muinna?” ₁₇Juda vástidii: “Mun sádden dutnje gihci ealustan.” Tamar dajai: “Atte munnje dasto pántta dassážii go sáddet dan.” ₁₈Juda jearai: “Maid mun galggašin addit dutnje pántan?” Tamar vástidii: “Iežat seailla oktan báttiin ja dan soappi mii dus lea gieđas.” Juda attii daid Tamarii ja veallái suinna, ja Tamar šattai áhpeheapmin. ₁₉Tamar vulggii, nuolai beaittaliinni ja gárvodii fas leaskabiktasiid.

₂₀Juda bijai adullamlaš ustibis Hira doalvut gihci nissonii vai oažžu sus pántta ruoktot, muhto son ii gávdnan nissona. ₂₁Hira jearai báikki olbmáin: “Gos lea dat tempelfuorrá gii čohkkái Enajima luoddaearus?” Sii vástidedje: “Ii dás leat leamaš oktage tempelfuorrá.” ₂₂Son máhcai Juda lusa ja dajai: “Mun in gávdnan su, ja dan báikki olbmát dadje ahte ii doppe leat leamaš oktage tempelfuorrá.” ₂₃Juda dajai: “Atnos nisson dan pántta, dalle moai ean šatta heahpanit. Munhan sáddejin sutnje dán gihci, muhto don it gávdnan su.”

₂₄Sullii golmma mánu geažes Judai muitaluvvui: “Du mannji Tamar lea furrošan ja šaddan áhpeheapmin.” Juda dajai: “Dolvot su boldojuvvot!” ₂₅Muhto go ledje doalvumin Tamara, de son bijai sáni vuohppasis: “Mun lean šaddan áhpeheapmin dainna olbmáin geasa dát diŋggat gullet.” Ja son cealkkihii vel: “Geahča geasa dát seaila ja dan báddi ja dát soabbi gullet.” ₂₆Juda dovddai daid ja dajai: “Son lea vuoigadis. Munhan in addán su áhkkán bárdnásan Šelai.” Juda ii veallán šat Tamariin.

₂₇Go Tamara riegádahttináigi šattai, de su goaŧus ledje jumežat. ₂₈Go son lei riegádahttimin, de nubbi mánná geigii gieđa ovdan, ja sealgeeadni čanai máná gihtii rukses láiggi ja dajai: “Dát bođii olggos vuosttamužžan.” ₂₉Muhto de mánná gesii gieđa ruoktot, ja olggos bođiige su viellja. Sealgeeadni dajai: “Niego don gaikot iežat olggos?” Danne mánnái biddjojuvvui namman Peres. ₃₀Dasto riegádii su viellja gean gieđas lei rukses láigi, ja sutnje biddjojuvvui namman Serah.