1. Mosesgirji 5

₁Dát lea Adama sohkalogahallan. Go Ipmil sivdnidii olbmo, de dagai su Ipmila govvan. ₂Olmmájin ja nissonin son sivdnidii sudno. Son buressivdnidii sudno ja bijai sudno namman olmmoš dalle go sivdnidii sudno.

₃Go Adam lei eallán čuođigolbmalogi jagi, de sutnje riegádii bárdni gii lei su láhkásaš, su govva, ja son bijai su namman Set. ₄Seta riegádeami maŋŋil Adam elii vel gávccičuođi jagi, ja sutnje riegádedje bártnit ja nieiddat. ₅Adama oppa eallináigi lei ovccičuođi golbmalogi jagi; de son jámii.

₆Go Set lei eallán čuođivihtta jagi, de sutnje riegádii Enoš. ₇Enoša riegádeami maŋŋil Set elii vel gávccičuođičieža jagi, ja sutnje riegádedje bártnit ja nieiddat. ₈Seta oppa eallináigi lei ovccičuođi guoktenuppelohkái jagi; de son jámii.

₉Go Enoš lei eallán ovccilogi jagi, de sutnje riegádii Kenan. ₁₀Kenana riegádeami maŋŋil Enoš elii vel gávccičuođi vihttanuppelohkái jagi, ja sutnje riegádedje bártnit ja nieiddat. ₁₁Enoša oppa eallináigi lei ovccičuođivihtta jagi; de son jámii.

₁₂Go Kenan lei eallán čiežalogi jagi, de sutnje riegádii Mahalalel. ₁₃Mahalalela riegádeami maŋŋil Kenan elii vel gávccičuođi njealljelogi jagi, ja sutnje riegádedje bártnit ja nieiddat. ₁₄Kenana oppa eallináigi lei ovccičuođilogi jagi; de son jámii.

₁₅Go Mahalalel lei eallán guhttalogivihtta jagi, de sutnje riegádii Jered. ₁₆Jereda riegádeami maŋŋil Mahalalel elii vel gávccičuođi golbmalogi jagi, ja sutnje riegádedje bártnit ja nieiddat. ₁₇Mahalalela oppa eallináigi lei gávccičuođi ovccilogivihtta jagi; de son jámii.

₁₈Go Jered lei eallán čuođiguhttalogiguokte jagi, de sutnje riegádii Henok. ₁₉Henoka riegádeami maŋŋil Jered elii vel gávccičuođi jagi, ja sutnje riegádedje bártnit ja nieiddat. ₂₀Jereda oppa eallináigi lei ovccičuođi guhttalogiguokte jagi; de son jámii.

₂₁Go Henok lei eallán guhttalogivihtta jagi, de sutnje riegádii Metušelah. ₂₂Henok vádjolii Ipmiliin Metušelaha riegádeami maŋŋil vel golbmačuođi jagi, ja sutnje riegádedje bártnit ja nieiddat. ₂₃Henoka oppa eallináigi lei golbmačuođi guhttalogivihtta jagi. ₂₄Henok vádjolii Ipmiliin. Dasto son ii lean šat, dasgo Ipmil válddii su lusas.

₂₅Go Metušelah lei eallán čuođigávccilogičieža jagi, de sutnje riegádii Lamek. ₂₆Lameka riegádeami maŋŋil Metušelah elii vel čiežačuođi gávccilogiguokte jagi, ja sutnje riegádedje bártnit ja nieiddat. ₂₇Metušelaha oppa eallináigi lei ovccičuođi guhttalogiovcci jagi; de son jámii.

₂₈Go Lamek lei eallán čuođigávccilogiguokte jagi, de sutnje riegádii bárdni. ₂₉Son bijai su namman Noa ja dajai: “Dát bárdni addá geahpádusa go mii bargat ja rahčat eatnamis maid Hearrá lea garuhan.” ₃₀Lamek elii Noa riegádeami maŋŋil vel vihttačuođi ovccilogivihtta jagi, ja sutnje riegádedje bártnit ja nieiddat. ₃₁Lameka oppa eallináigi lei čiežačuođi čiežalogičieža jagi; de son jámii.

₃₂Go Noa lei eallán vihttačuođi jagi, de sutnje riegádedje bártnit Sem, Ham ja Jafet.