Habakkuk 1

oaččui oainnáhusas.

₂Man guhká šattan mun čuorvut, Hearrá,

itge don gula?

Man guhká mun ferten váidalit veahkaválddi,

itge don beastte?

₃Manne don divttát mu

oaidnit bahávuođa?

Mo don sáhtát geahččat vearrivuhtii?

Mun oainnán aivve billašumi

ja veahkaválddi –

nággu šaddá, bealku čuožžila.

₄Láhka lea fámoheapme,

vuoigatvuohta ii ollašuva.

Ipmilmeahttumat

birastahttet vanhurskása,

ja vuoigatvuohta jorgojuvvo.

₅Gehččet álbmogiidda,

oidnet ja suorganehket!

Dasgo din beivviid mun dagan dagu

maid ehpet jáhkáše

jos dat didjiide muitaluvvošii!

₆Mun rávkkan kaldealaččaid,

garra ja hohppos álbmoga

mii johtá viidát eatnamis

ja váldá oapminis earáid ássansajiid.

₇Sii leat hirbmosat ja suorggatlaččat,

sii mearridit ieža

mii lea vuoigat ja riekta

₈Sin heasttat leat falibut go leopárddat,

johtileappot go meahci gumppet.

Sin riidejeaddjit rindet,

gáidagasas dat bohtet,

dat girddihit nugo goaskin čuoláda sállašii.

₉Kaldealaččat bohtet hearjidit.

Sii fallehit oktan joavkun,

sis leat fáŋggat dego mearas sáttu.

₁₀Sii hiddjidit gonagasaid,

oaivámuččaid sii atnet bogostahkan.

Sii bilkidit buot ladniid,

čobmejit muoldda ja váldet daid.

₁₁De sii mannet geidnoseaset

šuva dego biegga ja jávket.

Iežaset fápmu sis lea ipmilin.

₁₂Hearrá, don leat dološ áiggi rájes,

mu Ipmil, mu Bassi,

don it jáme goassege!

Hearrá, don leat bidjan

kaldealaččaid dubmet min,

don, min bákti, leat vuolggahan sin

ráŋggáštit min.

₁₃Du čalmmit leat buhttásat,

don it sáhte geahččat bahái,

it duotto oaidnit vearrivuođa.

Manne don dalle gierddat

behtolaččaid daguid,

manne orut jávohaga,

go ipmilmeahttun njielasta

daid geat leat vuoigadis?

₁₄Don leat diktán olbmuid

šaddat meara guliid láhkásažžan,

giđđudeaddji veahkan

mas ii leat ráđđejeaddji.

₁₅Kaldealaččat bivdet

olbmuid vuokkaiguin,

čohkkejit sin nuohttáseaset,

čogget sin firpmiidasaset.

Dan dihte sii illudit ja ávvudit,

₁₆oaffaruššet fierbmáseaset,

cahkkehit oaffardola bivdosiiddáseaset.

Dathan diktet sin eallit valljivuođas,

addet sidjiide vuoimmálaš borramuša.

₁₇Bessetgo sii dalle álo gurret nuohtiset,

goddit álbmogiid álelassii

almmá seasttekeahttá?