Hebrea 4

₁Mii fertet nappo váruhit iežaideamet. Ipmila lohpádus ahte mii beassat boahtit su vuoiŋŋadussii, lea ain ollašuvakeahttá, iige oktage dis oaččo ravgat luottas. ₂Mii leat maiddái gullan buori sága seammá láhkái go dot dološ olbmot. Dat sátni maid sii gulle, ii lean sidjiide maninge ávkin, danin go sii eai jáhkkán dasa eaige váldán dan vuostá oskkus. ₃Muhto mii geat oskkuimet, ollet mearrái lohpiduvvon vuoiŋŋadussii. Ipmil lea nappo cealkán: Ja nu mun vurdnon moaristan: Sii eai goassege beasa boahtit mu vuoiŋŋadussii. Dan son celkkii, vaikko su dagut leat leamaš gárvásat máilmmi vuođđudeami rájes. ₄Dasgo muhtin báikkis lea ná celkojuvvon čihččet beaivvi birra: Čihččet beaivvi Ipmil vuoiŋŋastii buot das maid son lei dahkan. ₅Muhto dás celkojuvvo: Sii eai goassege beasa boahtit mu vuoiŋŋadussii.

₆Lea nappo vissis ahte muhtumat besset boahtit dohko. Sii geat gulle vuosttamužžan buori sága, eai beassan dohko eahpegulolašvuođa dihte. ₇Dan dihte Ipmil mearrida ođđa beaivvi, mii lea otná beaivi, ja son cealká mihá maŋŋil Davida bokte nugo lea namuhuvvon ovdal: Jos dii otná beaivvi gullabehtet su jiena, de allet buoššut din váimmu. ₈Jos Josua livččii dolvon sin dan vuoiŋŋadussii, de Ipmil ii livčče maŋŋelis sárdnon nuppi eará beaivvi birra. ₉Ipmila álbmogis lea nappo ain sabbatvuoiŋŋadus vuordagis. ₁₀Dat gii beassá su vuoiŋŋadussii oažžu vuoiŋŋastit iežas daguin, nugo Ipmilge vuoiŋŋastii iežas daguin. ₁₁Bargot dalle áŋgirit beassat boahtit dan vuoiŋŋadussii, amas oktage jorralit seammá eahpegulolašvuođa dihte.

₁₂Ipmila sátni lea ealli ja fámolaš. Dat lea bastileabbo go guovtteávjjot miehkki, dat čuohpasta čiekŋalii ja earuha sielu ja vuoiŋŋa, lađđasiid ja ađđamiid, dat dubme váimmu jurdagiid ja árvalusaid. ₁₃Ii mihkkege sáhte čihkkojuvvot Ipmila čalmmiin. Buot mii lea sivdniduvvon, lea rabasin ja álásin su ovddas geasa mii fertet dahkat logu.

₁₄Go mis nappo lea stuorra bajimusbáhppa guhte lea mannan almmiid čađa, Jesus, Ipmila Bárdni, de bissot nannosit dán dovddastusas. ₁₅Ii mis leat dakkár bajimusbáhppa guhte ii máhte árkkálmastit min min headjuvuođas, danin go son lea geahččaluvvon seammá láhkái go miige, dattetge almmá suttu haga. ₁₆Loaiddastehkot dan dihte roahkkadit árpmu truvnnu ovdii, vai oažžut váibmoláđisvuođa ja árpmu dan bottus go dan dárbbašit.