Hosea 3

₁Hearrá celkkii munnje: “Ráhkis vel nissona geas dál lea ráhkisteaddji ja gii rihkku náittosdili, nugo Hearrá, ráhkista israellaččaid, vaikko sii dorvvastit eará ipmiliidda ja ráhkistit viidnemuorjegáhkuid.” ₂De mun osten nissona viđainnuppelot silbašekeliin ja beannot bivgehomeriin. ₃Mun dadjen sutnje: “Leage mu luhtte guhká furroškeahttá, alege ane maidege dahkamušaid eará olbmáiguin. In munge guoskka dutnje.” ₄Seammá ládje israellaččat leat guhká almmá gonagasa ja oaivámučča haga, almmá oaffara ja geađgebácci haga, almmá efoda ja viessoipmiliid haga. ₅Dasto israellaččat jorgalit ja ohcet Hearrá, Ipmileaset, ja Davida, gonagasaset. Doarggistemiin sii bohtet Hearrá ja su buriid attáldagaid lusa boahttevaš beivviid.