1go mun dearvvašmahtán Israela,
de dalle rahpasit Efraima suttut
ja Samaria vearredagut.
Sii láhttejit behtolaččat:
Suollagat gaikot viesuide,
rievvárjoavkkut stajidit olgun.
2Sii eai jurddaš
ahte mun muittán buot sin bahávuođa.
Dál sin dagut birastahttet sin,
dat leat munnje albmosat.
3Sii illudahttet gonagasa
bahávuođaineaset
ja oaivámuččaid giellásiiddisetguin.
4Sii leat buohkat furrošeaddjit,
nugo uvdna mii lea nu báhkas
ahte láibu ii dárbbaš dan skuđđet
dan rájes go dáigi lea duhppejuvvon
dan rádjái go dat lea geavvan.
5Min gonagasa ávvubeaivvi
su oaivámuččat leat buohccit garra viinnis,
ja son ieš addala gieđaid bilkideddjiiguin.
6Sin váibmu buollá dego uvdna
go sii leat das vuođgŋimin.
Oppa ija sin moarri cahká,
iđđedis dat buollá
dego šloavaideaddji dolla.
7Sii buohkat leat báhkkasat dego uvdna,
sii njillet ráđđejeddjiideaset,
buot sin gonagasat leat gahččan.
Ii oktage sis čuorvvo mu.
8Efraim seahkana vierroálbmogiidda.
Dat lea šaddan gáhkkun
maid láibu ii leat jorgalan.
9Vierrásat leat loaktán Efraima fámu,
muhto son ii fuobmá dan.
Su vuovttat leat čurggodan,
muhto ii son fuobmá dan.
10Israela čeavli duođašta su iežas vuostái.
Sii eai jorggit Hearrá, Ipmileaset, beallái,
eaige oza su,
vaikko buot dát lea dáhpáhuvvan.
11Efraim lea šaddan duvvá láhkásažžan,
oktageardán ja jierpmeheapme.
Sii čurvot Egypta,
sii mannet Assyriai.
12Muhto go sii vulget johtui,
de mun suhppen fierbmán sin ala
ja geasán sin vuolás dego lottiid almmis.
Mun bivddán sin nu farga
go gulan sin čoggomin moahtin.
13Vuoi sin! Sii leat báhtaran mu luhtte.
Jápmin sidjiide! Sii leat vuostálastán mu.
Mun áigon lonistit sin,
muhto sii sárdnot giellásiid mu birra.
14Eai sii čuorvvo munnje váimmusteaset.
Sii fuikot oađđinsajisteaset,
gortni ja viinni dihte sii nádjet iežaset.
Sii stuibmidit mu vuostá.
15Mun oahpahin sin
ja dahken sin gievran,
muhto sii hutket baháid mu vuostá.
16Sii jorgalit dan beallái
mas ii leat ávki,
sii leat šaddan nugo ložžes dávgi.
Sin oaivámuččat gahččet miehkkái
vaššás ságaideaset dihte.
Egyptas sii bilkiduvvojit.
