Jesaja 26

Min gávpot lea min givrodat,

suodjin son lea huksen dasa

muvrraid ja ladnedieváid.

₂Rahpet poarttaid,

diktet vanhurskkis álbmoga

boahtit sisa,

álbmoga mii bissu oskkáldassan.

₃Stáđis olbmui don attát ráfi,

son dorvvasta dutnje.

₄Dorvvastehket álo Hearrái,

danne go Hearrá lea agálaš bákti.

₅Son lea nordadan vuolás

daid geat ásset

čoarrájeaddji gávpogis,

son dulbii gávpoga eatnama dássái

ja mollii dan čievran.

₆Dan dulbmet vártnuhemiid

ja váivvášiid juolggit.

₇Vanhurskása bálggis lea njuolgat,

don dagat jalgadin su geainnu,

₈vuoigatlaš duomuidat geainnu.

Hearrá, mii dorvvastit du nammii,

mii áibbašit beassat rávkat du.

₉Mu siellu áibbaša du ihkku,

mu vuoigŋa ohcala du.

Go du vuoigatlaš duomut

čuvgejit eatnama,

de máilmmi ássit

ohppet dan mii lea riekta.

₁₀Jos ipmilmeahttun árpmihuvvo,

de son ii oahpa dan mii lea riekta.

Son dahká vearrivuođa dan eatnamis

gos riekti galggašii ráđđet,

iige son oainne Hearrá allatvuođa.

₁₁Hearrá, du giehta lea bajiduvvon,

muhto olbmot eai oainne dan.

Divtte sin oaidnit heahpanemiin

du buolli áŋgirvuođa iežat álbmoga ovddas.

Divtte dola loaktit du vuostálastiid!

₁₂Hearrá, don attát midjiide ráfi,

buot maid mii leat dahkan,

lea du dahku.

₁₃Hearrá, min Ipmil,

leatgo mis leamaš ráđđejeaddjit earret du?

Mii dovddastit aivve fal du nama.

₁₄Jábmit eai šatta eallin,

jámežat eai čuožžil.

Nu don leat ráŋggáštan

ja duššadan sin

ja dahkan duššin sin muittu.

₁₅Hearrá, don leat ohpit dahkan

stuorra daguid iežat álbmogii.

Don leat čájehan iežat ipmilvuođa fámu,

don leat viiddidan eatnama rájiid.

₁₆Hearrá, sii ohce du heađis

ja savkkuhedje rohkosiid,

go don bagadit sin.

₁₇Riegádahtti nissona láhkásažžan

gii bodnjasaddá ja huiká ávttain,

don diktet min šaddat, Hearrá.

₁₈Mii leimmet áhpeheamit,

mii bodnjasattaimet bákčasis,

muhto mii riegádahtiimet biekka.

Mii eat buktán eatnamii bestojumi,

olbmot eai riegádan eatnamii.

₁₉Du jábmit šaddet eallin,

sin rupmašat čuožžilit.

Morihehket ja čurvot ávus,

dii geat ássabehtet muolddas!

Danin go du suoldni

lea čuovgga suoldni,

don divttát dan gahččat

jábmiid eatnamii.

₂₀Álbmogan, mana gámmáriiddásat,

dahpa uvssaid iežat maŋis.

Čiehkát oanehis áigái,

dassážii go moarri lea mannan meaddel.

₂₁Danin go Hearrá vuolgá ássansajistis

ráŋggáštit eatnama olbmuid

sin vearredaguid dihte.

Dalle eanan buktá albma

vara mii lea golggahuvvon,

dat ii šat čiega goddojuvvon olbmuid.