Jesaja 33

₁Vuoi du, hearjideaddji,

gii ieš it leat hearjiduvvon!

Vuoi du, beahtti,

gii ieš it leat behttojuvvon!

Go don leat geargan hearjideames,

de don ieš hearjiduvvot,

go don leat heaitán beahttimis,

de don ieš behttojuvvot.

₂Hearrá, árpmit min,

dutnje mii dorvvastit.

Leage min givrodat juohke iđit,

min bestojupmi heađi bottus!

₃Álbmogat báhtarit garra jumas,

du allatvuođa ovddas

dat buot bieđganit.

₄Rievideaddjit ferejit

nugo rásselohkut,

dego rásselohkkomoahti

sii fallehit buot.

₅Aliduvvon lea Hearrá

guhte ássá allagasas,

son deavdá Siona rivttiin

ja vuoigatlašvuođain.

₆Boahtá oadjebasvuohta.

Viisodat ja máhttu lea dávvir

mii addá bestojumi.

Hearrá ballu lea Siona riggodat.

₇Gullet! Ariela gáhtain olbmot luibmet,

ráfiáirasat čirrot bahččagit.

₈Geainnut leat ávdimat,

daid ii jođe šat oktage.

Soahpamušat leat rihkkojuvvon,

duođašteddjiin ii jerrojuvvo,

olmmoš ii adnojuvvo maninge.

₉Eanan morašta ja goarrána,

Libanon njáigu ja stohkku.

Saron lea šaddan ávdin eanamin,

Bašan ja Karmel leat bálljásat.

₁₀Dál mun loaiddastan ovdan

allatvuođastan, cealká Hearrá,

dál mun almmustuvan fámustan.

₁₁Dii sahkanahttibehtet suoinni,

dii riegádahttibehtet oalggaid,

mu vuoiŋŋanas loaktá din dego dolla.

₁₂Álbmogat boldojuvvojit kálkan,

dat boldojuvvojit

dego čuhppojuvvon bastilislánját.

₁₃Gullet, gáiddus álbmogat,

maid mun lean dahkan!

Dii geat eallibehtet lahkosiin,

ohppet dovdat mu fámu!

₁₄Suttolaččat doarggistit Sionis,

ipmilmeahttumat dohppehallet ballui:

“Gii sáhttá ássat

duššadeaddji dola guoras,

gii sáhttá orrut

agálaš dollanjuorššuid gáttis?”

₁₅Dat gii eallá vuoigatlaččat

ja sárdnu duođa,

gii hilgu dan mii vuitojuvvo veahkaválddiin,

gii biehttala váldimis duolgguid,

gii ii dáhto guldalit varradahkuságaid,

iige geahča bahá guvlui.

₁₆Son beassá ássat alla báikkiide,

ceakkovárri lea su báhtaransadji,

sus lea doarvái láibi

iige sus váillo čáhci.

₁₇Iežat čalmmiiguin don beasat

oaidnit gonagasa buot su hearvásvuođas,

don beasat oaidnit viiddis eatnama.

₁₈Dalle don muittát hirpma áiggi:

Gos dál lea vearrogeassi,

gos vearu vihkkejeaddji,

gos toartnaid dárkkisteaddji?

₁₉Don it oainne šat goavis álbmoga,

álbmoga mii hálai amas láhkái,

giela maid olmmoš ii ádde.

₂₀Geahča Sionii,

min ávvudemiid gávpogii!

Don beasat oaidnit Jerusalema,

oadjebas vuoiŋŋadanbáikki,

goađi mii ii gaikojuvvo, ii sirdojuvvo.

Dan čuolddat eai goassege luovvan,

dan báttiin ii oktage boatkan.

₂₁Doppe mis lea

veagalaš Ipmil, Hearrá,

doppe golggiidit jogat

ja stuorra eanut.

Daid ii jođe oktage fanas,

ii rasttil oktage gorges soahteskiipa.

₂₂Hearrá lea min duopmár,

Hearrá lea min oaivámuš,

Hearrá lea min gonagas,

son lea min beasti.

₂₃Go toavat leat loažžan

eaige šat doala stivlli sajis,

eai borjasiid čavga,

de dalle ollu soahtesálaš juogaduvvo,

velá lápmásatge servet stajádussii.

₂₄Ii oktage gávpotolmmoš daja:

“Mun lean buozas”,

dasgo dat álbmot mii ássá doppe,

lea ožžon suttuid ándagassii.