Jesaja 42

₁Geahča, mu bálvaleaddji

gean mun doarjalan,

mu válljen olmmái

gean mun ráhkistan.

Mun lean diktán iežan vuoiŋŋa

boahtit su badjelii,

son buktá vuoigatvuođa álbmogiidda.

₂Ii son čuorvvo iige huikke,

ii su jietna gullo gáhtain.

₃Doddjon hoašša son ii cuvke,

borggisteaddji veaikka son ii čáskat.

Oskkáldasat son buktá vuoigatvuođa.

₄Ii son váibba

iige su fápmu doddjojuvvo,

muhto son ásaha eatnamii vuoigatvuođa.

Gáiddus eatnamat

áibbašit su oahpahusa.

₅Ná cealká Ipmil, Hearrá,

son gii sivdnidii almmi ja lebbii dan,

gii hábmii eatnama

ja buot mii das šaddá,

gii attii eallinvuoiŋŋa buot dasa

mii vádjola eatnama alde:

₆Mun, Hearrá, lean oskkáldasvuođastan

rávkan du.

Mun válddán du gihtii ja várjalan du.

Du bokte mun dagan lihtu iežan álbmogiin

čuovgan eará álbmogiidda.

₇Don rabastat čalmmehemiid čalmmiid,

ja luoittát fáŋggaid giddagasas,

fáŋgaviesus daid geat

čohkkájit seavdnjadasas.

₈Mun lean Hearrá, dat lea mu namma.

Iežan gudni mun in atte earrásii

inge iežan rámádusa ipmilgovaide.

₉Mii lea leamaš, lea vássán,

dál mun almmuhan ođđasiid.

Juo ovdal go dat bohciidit ovdan,

de mun muitalan daid didjiide.

₁₀Lávlot Hearrái ođđa lávlaga,

lávlot su máidnuma miehtá eatnama.

Máraidehkos ávvudemiin mearra

ja buot mii das lea,

illudehkoset gáiddus rittut

ja buot daid ássit.

₁₁Čurvoset meahcci ja dan gávpogat,

siiddat main Kedar orru.

Illudehkoset Sela olbmot,

čurvoset sii várrečohkain.

₁₂Addet Hearrái gudni,

rámidehket su gáiddus eatnamiin!

₁₃Hearrá vuolgá sáŋgára láhkái,

nugo soahteolmmái son bođđe iežas soahtái,

čuorvu soahtečuorvasiid

ja čájeha fámus vašálaččaide.

₁₄Guhká mun lean leamaš jaska,

lean orron jávohaga

ja doalahan sárdnumis.

Dál mun bárggun dego riegádahtti nisu,

mun sáđan ja hahpaštuttan.

₁₅Mun dagan ávdimin váriid ja dieváid,

goikadan buot ruotnasa

mii dain šaddá.

Jogaid mun dagan goikeeanamin,

jávrriid mun divttán goikat.

₁₆Muhto čalmmehemiid mun láiden

geainnu man sii eai leat johtán,

mun doalvvun sin bálgáid

maid sii eai dovdda.

Seavdnjadasa sin ovddas

mun dagan čuovggasin,

ráhppás eatnamiid jalgadassan.

Dán mun áiggun dahkat,

mun in guođe maidege dagakeahttá.

₁₇Heahpanemiin gáidet ruoktot

dat geat dorvvastit ipmilgovaide,

geat dadjet leikejuvvon bácciide:

“Dii lehpet min ipmilat.”

₁₈Gullet, dii bealjeheamit!

Čalmmeheamit, gehččet,

de dii oaidnibehtet!

₁₉Gii lea čalmmeheapme

jos ii mu bálvaleaddji,

gii bealjeheapme jos ii mu áirras

gean mun lean vuolggahan?

Gii lea seammá čalmmeheapme

go mu áirras,

gii seammá bealjeheapme

go Hearrá bálvaleaddji?

₂₀Son oaidná ollu,

muhto ii váldde dan vuhtii,

su bealjit leat rahpasat,

muhto ii son gula maidege.

₂₁Hearrá lea vuoiggalaš,

dan dihte son dáhttu čájehit

ahte su láhka lea stuoris ja hearvái.

₂₂Muhto dát álbmot lea speddjojuvvon

ja rieviduvvon,

buohkat leat láhkkiin bákteráiggiin,

čihkkojuvvon giddagasaide.

Sii leat šaddan sálašin,

iige oktage gájo sin,

sii leat speddjojuvvon,

iige oktage daja: “Luoitte sin!”

₂₃Guhtemuš dis jorgala bealji

dán beallái,

gii guldala dárkilit ja váldá vuhtii

dás maŋás?

₂₄Gii divttii Jakoba speddjojuvvot

ja attii Israela rievváriid gihtii?

Iigoson Hearrá ieš,

son gean vuostá mii leat suddudan.

Ii oktage dáhtton vádjolit su geainnuid

iige jeagadit su lága.

₂₅Nu Hearrá golggahii sin badjelii

iežas buolli moari,

son divttii soađi ja veahkaválddi

deaividit sin.

Sin birra njuorššui dolla,

muhto eai sii ipmirdan,

dat bolddii sin,

muhto eai sii váldán das várrehusa.