Jesaja 44

₁Gula dál, Jakob, mu bálvaleaddji,

Israel, gean mun lean válljen.

₂Ná cealká Hearrá, du sivdnideaddji,

son gii juo goaŧus hábmii du,

son gii veahkeha du:

Ale bala, bálvaleaddján Jakob,

don Ješurun, gean mun lean válljen.

₃Mun golggahan čázi dasa mii goiká,

jogažiid jakŋa eatnamii.

Mun golggahan iežan vuoiŋŋa

du mánáid badjelii,

iežan buressivdnádusa du nállái.

₄Sii bohciidit dego rássi,

nugo sieđggat jogašgáttiide.

₅Muhtin dadjá: “Mun gulan Hearrái”,

nubbi gohčču iežas Jakoba namain,

soamis čállá giehtasis: “Hearrá oapmi”

ja gudnejahttojuvvo Israela namain.

₆Ná cealká Hearrá, Israela gonagas,

son gii lonista dan,

Hearrá, Almmiveagaid Ipmil:

Mun lean vuosttaš

ja mun lean maŋimuš.

Earret mu ii leat Ipmil.

₇Gii lea mu láhkásaš?

Bohtos son ovdan, muitalehkos

ja duođaštehkos munnje dan.

Gii lea juo ovdal muitalan

dan mii dáhpáhuvvá?

Muitalehkos son midjiide mii boahtá!

₈Allet bala, allet suorgan!

Ingo mun leat áigá juo almmuhan

ja muitalan dan didjiide?

Dii lehpet mu duođašteaddjit.

Leago Ipmil earret mu,

leago dorvobákti maid mun in dovdda?

₉Eahpeipmilduojárat

leat buohkat čabu dušši,

sin mávssolaš govat eai veahket.

Sin bálvaleaddjit eai oainne eaige ádde,

sii šaddet heahpadii.

₁₀Gii ráhkada ipmila, gii leike ipmilgova

mii ii leat ávkin masage?

₁₁Buot daid doarjaleaddjit

šaddet heahpadii,

daid duojárat leat dušše olbmot.

Čoahkkanehkoset sii buohkat,

bohtoset mu ovdii,

ballui sii dohppehallet

ja šaddet heahpadii.

₁₂Rávdi bargá luovččaniin

ja rahčá čađđadollagáttis.

Son hábme gova veahčiriin

ja duddjo dan gievrras gieđain.

Son nealgu ja vuoimmehuvvá,

son goiká ja viessá.

₁₃Muorravaddji njulge mihttobátti,

sárgu gova čálániin

ja čuohppá dan luovččaniin.

Son merke mihtuid pássáriin,

addá govvii olbmo čáppa hámi,

ja dat oažžu ássat iežas tempelis.

₁₄Olmmoš njeaidá sedera,

son váldá geađgeáikka

dahje áikka mii lea šaddan stuorisin

vuovddi muoraid gaskkas,

dahje son cegge lágermuoraid

maid arvi šaddada.

₁₅Olmmoš atná muora boaldámuššan,

dainna son biktala ja dahká dola

vai beassá goikadit láibbi.

Son dahká das maiddái ipmila

man ovdii son luoitáda,

hábme alccesis ipmilgova

maid de gopmirda.

₁₆Lahki muoras son boaldá dolas.

Hilaid alde son bassá bierggu,

son borrá ja gallána,

liekkadallá ja dadjá:

“Dál mun gal bivan,

gal juo lea albma dolla!”

₁₇Bázahasas son ráhkada ipmila,

gova maid son de gopmirda.

Son luoitáda eatnamii,

rohkadallá gova ja dadjá:

“Beastte mu, donhan leat mu ipmil!”

₁₈Sii eai ipmir eaige árvit maidege.

Sin čalmmit leat gitta

nu ahte sii eai oainne,

sin váibmu nu gokčojuvvon

nu ahte sii eai ipmir.

₁₉Eai sii jurdil, ii sis leat fiehttu

iige jierbmi dadjat:

“Lahki muoras mun bolden,

goikadin láibbi hilaid alde,

bassen bierggu ja borren.

Dagašingo mun bázahasas fastivuođa,

gopmirdivččengo muorrabelkko?”

₂₀Dat gii dorvvasta duššái, čádjádallá.

Ii son sáhte gádjut iežas,

ii dadjat alccesis:

“Mun lean luohttán giellásii.”

₂₁Muitte dán, Jakob, mu bálvaleaddji,

muitte, Israel,

ahte mun lean du hábmen,

don leat mu bálvaleaddji,

mun in vajáldahte du, Israel.

₂₂Mun sihkun du rihkkumiid

dego mierkká,

du suttuid nugo balvva.

Jorgal mu beallái,

de mun lean lonistan du.

₂₃Ávvut, albmi,

das maid Hearrá lea dahkan!

Čurvot ilus, eatnama čiekŋalasat!

Bajidehket ávvučuorvasiid, buot várit,

dii vuovddit buot muoraideattetguin!

Hearrá lea lonistan Jakoba!

Son lea beastán Israela,

son lea čájehan iežas hearvásvuođa.

₂₄Ná cealká Hearrá, du lonisteaddji,

son gii juo goaŧus hábmii du:

Mun lean Hearrá,

mun lean sivdnidan buot,

mun okto lebbejin almmi,

mun hábmejin eatnama

almmá geange veahki haga.

₂₅ Einnostusbáhpaid mearkkaid

mun dagan duššin,

einnosteddjiid mun dagan bilkun.

Mun badjelgeahčan viisáid

ja dagan sin viisodaga jallodahkan.

₂₆Mun nannen bálvaleddjiidan sániid

ja ollašuhtán dan maid mu áirasat

leat almmuhan.

Mun cealkkán Jerusalemii:

“Don oaččut olbmuidat ruoktot”,

ja Juda gávpogiidda:

“Dii huksejuvvobehtet fas!”

Mun divttán gávpogiiddán

badjánit čievračomain.

₂₇Ábi čiekŋalassii mun cealkkán:

“Šatta goikkisin!

Mun goikadan du rávnnjiid.”

₂₈Mun cealkkán Kyrosii: “Mu báimman.”

Son ollašuhttá buot maid mun dáhtun,

son dadjá Jerusalemii: “Don huksejuvvot!”

ja tempelii: “Don vuođđuduvvot fas!”