Jesaja 48

₁Gula, Jakoba sohka,

gii gohčoduvvot Israela namain,

gullet, dii geat lehpet vuolgán

Juda ádjagis

ja vuordnubehtet Hearrá nammii,

dii geat rámidehpet Israela Ipmila,

muhto ehpet duohtavuođas

ja oskkáldasvuođas.

₂Sii navdet iežaset

bassi gávpoga namain

ja dorjejit Israela Ipmilii,

sutnje gean namma lea Hearrá,

Almmiveagaid Ipmil.

₃Dološ dáhpáhusaid mun muitalin

juo guhká ovdal go dat dáhpáhuvve,

mun almmuhin daid,

adden daid diehttevassii.

Fáhkkestaga mun dahken daid,

ja dat šadde.

₄Mun dieđán ahte don leat garas,

du niski lea ruovddis

ja du gállu bronssas.

₅Danne mun almmuhin dán áigá juo,

gulahin dan dutnje

ovdal go dat dáhpáhuvai,

amat sáhttit dadjat:

“Mu ipmilat leat dahkan dán,

mu leikejuvvon bázzi gohčui dan šaddat.”

₆Dás don oainnát duot dan

maid leat gullan.

Almma don sáhtát muitalit dan!

Dál mun almmuhan dutnje ođđasiid,

čiegus áššiid maid don it diehtán.

₇Dat leat sivdniduvvon aiddo dál

eaige dolin,

don it leat gullan daid ovdal go odne,

amat sáhttit dadjat:

“Mun dihten dan.”

₈Don it leat beassan gullat daid

itge diehtit daid,

ii mihkkege almmustuvvan

dutnje juo ovdal.

Mun dieđán du leat oskkáldasmeahttun,

riegádeami rájes

don leat gohččojuvvon beahttin.

₉Iežan nama dihte

mun lean guhkesmielalaš,

gudnán geažil mun lean gierdavaš

inge duššat du.

₁₀Mun lean šolgen du,

muhto in danin vai fidnešin silbba,

mun lean geahččalan du

gillámuša šolgenuvnnas.

₁₁Iežan dihte, aivve fal iežan dihte

mun dahken dan,

mu namma ii oaččo heahppášuhttojuvvot.

Iežan gudni mun in juogat earrásii.

₁₂Gula mu, Jakob,

Israel, gean mun lean rávkan!

Mun lean Ipmil, mun lean vuosttamuš

ja mun lean maid maŋimuš.

₁₃Mu giehta bijai eatnama vuođđudusaid,

mu olgeš giehta lebbii almmi.

Mun rávken daid, ja dat ledje das.

₁₄Čoagganehket buohkat ja gullet!

Guhtemuš dain earáin gulahii dán:

“Dat gean Hearrá ráhkista,

ollašuhttá su áigumuša Babylona vuostá

ja Kaldea álbmoga vuostá.”

₁₅Mun lean muitalan dán,

mun lean rávkan su,

mun lean vuolggahan su

ja diktán su lihkostuvvat.

₁₆Bohtet mu lusa ja gullet:

Álgoáiggiid rájes

mun in goassege sárdnon čihkosis.

Juo dalle go dát dáhpáhuvvagohte,

de mun ledjen das.

Ja dál Hearrá Ipmil

lea addán munnje iežas vuoiŋŋa

ja vuolggahan mu.

₁₇Ná cealká Hearrá, Israela Bassi,

du lonisteaddji:

Mun lean Hearrá, du Ipmil.

Mun oahpahan dutnje,

mii lea dutnje ávkkálaš,

mun doalvvun du geainnu

man galggat vádjolit.

₁₈Vare don jeagadivččet

mu báhkkomiid!

Dalle du ráfi livččii dego eatnu,

du vanhurskkisvuohta

nugo ábi bárut,

₁₉ja du nálli livččii dego sáddot,

du mánát nugo sáttočalmmit.

Du namma ii goassege duššaše,

dat ii sihkkojuvvoše

mu muođuid ovddas.

₂₀Vulget Babylonis,

báhtarehket Kaldeas!

Muitalehket dan ávvudemiin,

dieđihehket ja beakkuhehket

gitta eatnama ravddaid rádjái.

Dadjet: “Hearrá lea lonistan

bálvaleaddjis Jakoba!”

₂₁Eai sii goikan go son doalvvui sin

goikemeahci čađa:

Son attii čázi golgat sidjiide bávttis,

son luddii bávtti, ja čáhci golggai.

₂₂Ipmilmeahttumiin ii leat ráfi,

cealká Hearrá.