Jesaja 5

₁Mun dáhtun lávlut ráhkis ustiban lávlaga,

mu ustiba ja su viidnegárddi lávlaga.

Mu ustibis lei viidnegárdi

šattolaš dievás.

₂Son guohkai dan,

rájai das geđggiid

ja gilvvii dasa buriid viidnemuoraid.

Son huksii dasa fáktentoartna

ja čuolai báktái bohčingári.

Son doaivvui oažžut njálgga viidnemurjjiid,

muhto viidnegárdi šaddadii

sutnje rihča viidnemurjjiid.

₃Ja dál, Jerusalema ássit ja

Juda olbmát, dubmejehket

mu ja mu viidnegárddi gaskka!

₄Maid mun livččen sáhttán

vel dahkat viidnegárdásan

maid in juo lean dahkan?

Mun doivon oažžut njálgga viidnemurjjiid,

manne dat de šaddadiige rihččagiid?

₅Dál mun muitalan didjiide

maid áiggun dahkat viidnegárdásan.

Mun gaikkun dan birra áiddi

nu ahte dat guorbá,

mun njeaiddán dan muvrra

nu ahte dat duolbmašuvvá.

₆Mun guođán dan goarránit.

Dat ii šat čuhppojuvvo, ii guhkkojuvvo,

dat šaddada bastilislánjáid ja gáskálasaid.

Mun gielddán balvvaid arvimis dasa.

₇Hearrá, Almmiveagaid Ipmila,

viidnegárdi lea Israel,

Juda čearda su ráhkis šaddogárdi.

Son doaivvui vuoigatvuođa,

muhto bođii veahkaváldi,

son sávai vuoigatlašvuođa,

muhto šattai vuoigatmeahttunvuohta.

₈Vuoi din geat laktibehtet viesu vissui

ja bealddu beldui,

dassážii go ii báze šat sadji,

ja dii okto eaiggáduššabehtet eatnama!

₉Hearrá, Almmiveagaid Ipmil,

lea almmustahttán munnje dán:

Duođaid, eatnat viesut báhcet ávdimin,

stuorra ja čáppa viesut

almmá ássiid haga.

₁₀Logi plovenviidodaga gárdi

addá dušše ovtta fárpala viinni,

logi mihtu gilvagat

dušše ovtta mihtu gortniid.

₁₁Vuoi daid geat lihkket iđđesárrat

ohcat garra juhkamuša,

daid geat bánžžagit viinnis

gitta maŋŋiteahkedii!

₁₂Sin illun leat lyrat ja hárppat,

rumbbut ja njurgganasat,

ja viidni golgá sin jugalmasain.

Muhto Hearrá dujiid sii eai oainne,

su gieđaid daguid sii eai áicca.

₁₃Dan dihte mu álbmot

dolvojuvvo eatnamisttis

ovdal go sii oppa árviditge.

Dan stuorrát jápmet nealgái,

dan šlámaideaddji joavku goiká jámas.

₁₄Danin jábmiidáibmu lea galjidan njielus

ja rahpan njálmmis caggasii.

Dohko njidjet gávpoga stuorrát,

dohko šlámaideaddji joavku

oktan ávvudemiinis.

₁₅Olmmoš šaddá vuollánit,

olmmái ferte čippostit,

ja čeavlás čalmmit gehččet eatnamii.

₁₆Muhto Hearrá, Almmiveagaid Ipmil,

lea stuoris go son dubme,

Bassi Ipmila bassivuohta

lea oaidnimis su vuoigatlaš duomuin.

₁₇Doppe lábbát ohcet guohtuma

dego láidomis,

gihcit guhtot rikkis olbmuid

viessobázahasain.

₁₈Vuoi daid geat gesset suttu

gielisvuođa báttiin,

sivalašvuođa dego fievrrut vovnnaid,

₁₉daid geat dadjet:

“Vare son doamašii,

vare son dagašii fargga daguidis,

vai mii beassat oaidnit dan.

Vare ollašuvašii

dat maid Israela Bassi lea mearridan,

vai oažžut vásihit dan.”

₂₀Vuoi daid geat gohččot bahá buorrin

ja buori bahán,

geat dahket seavdnjadasa čuovgan

ja čuovgga seavdnjadassan,

rihččaga njálggisin ja njálgá rihčan!

₂₁Vuoi daid geat atnet iežaset viissisin

ja leat iežaset mielas hui jierpmálaččat!

₂₂Vuoi daid geat leat sáŋgárat

viidneruhku guoras,

gievrrat seaguhit garra juhkamuša!

₂₃Sii áššehuhttet sivalačča

go ožžot duolgguid.

Dain geat leat sivaheamit,

sii biehtadit vuoigatvuođa.

₂₄Dan dihte: Nugo dolla loaktá oalggaid

ja suoinnit jávket dollii,

nu misket sin ruohttasat

ja sin lieđit bosastuvvojit gavjan.

Sii leat hilgon Hearrá,

Almmiveagaid Ipmila, lága,

sii leat badjelgeahččan Israela Basi sáni.

₂₅Dan dihte Hearrá moaráhuvvá

iežas álbmogii,

son bajida gieđa ja časká.

Dalle várit doarggistit,

ja gáhtain njaŋgájit rupmašat dego durdi.

Dattetge su moarri ii leat sožžon,

su giehta lea ain bajiduvvon.

₂₆Hearrá lokte soahteleavgga

gáiddus álbmogii,

rávká dan soahteolbmáid eatnama ravddain.

Johtilit dat bohtet,

₂₇ii oktage váibba, ii oktage guossal,

ii oktage adjágastte, ii oktage oađestuva.

Ii ovttage boagán loačča,

ii ovttage gámagarca boatkan.

₂₈Sin njuolat leat basttálmahttojuvvon,

buot dávggit leat gealdagasas.

Heasttagaccat leat garrasat dego didnu,

vovnnaid juvllat dego jorribiegga.

₂₉Sin čeargun lea dego ledjona čeargun,

sin jietna dego nuorra ledjona jietna.

Hara sii dohppejit sállašii

ja gesset dan eret,

iige oktage sáhte dan gádjut.

₃₀Dan beaivvi dat gáiddus álbmot

boahtá dán eatnamii mára,

dat máraida dego mearra.

Gosa olmmoš ain geahčasta,

de lea dušše seavdnjadas ja áŧestus.

Seavdnjadas lea jávkadan čuovgasa.