Jesaja 52

₁Gohccá, Sion, gohccá,

gárvvut alccesat gievravuođa!

Gárvot čikŋabiktasiid,

bassi gávpot, Jerusalem!

Ii oktage birračuohpakeahttái

iige buhtismeahttun

duolmma šat du gáhtaid.

₂Čuožžil, savdnjil muoldda alddát,

čohkán truvdnosat, Jerusalem!

Luvve láhkkiid čeabehisttát,

fáŋgejuvvon nieida Sion!

₃Ná cealká Hearrá:

Nuvttá dii vuvdojuvvuidet,

ja almmá mávssu haga

dii maid lonistuvvobehtet.

₇Man čábbát leat váriin dan lávkkit

gii buktá buriid ságaid!

Son almmuha vuoittu,

buktá buriid ságaid,

gulaha bestojumi ja dadjá Sionii:

“Du Ipmil lea gonagas!”

₈Gullet! Várdájeaddjit

čuorvugohtet ávvudemiin,

danin go iežaset čalmmiiguin sii oidnet,

mo Hearrá máhccá Sionii.

₉Ávvudehket jitnosii,

dii Jerusalema čievračomat,

dasgo Hearrá lea addán

jeđđehusa iežas álbmogii,

son lea lonistan Jerusalema!

₁₀Hearrá lea čájehan

iežas fámu ja bassivuođa

buot álbmogiid oaidnut,

nu ahte oppa máilbmi oaidná bestojumi

maid min Ipmil lea buktán.

₁₁Vulget, vulget eret Babylonis!

Allet duohtat maidege buhtismeahttumiid,

vulget doppe eret, lehket buhttásat,

dii geat guoddibehtet Hearrá lihtiid!

₁₂Muhto dál dii ehpet dárbbaš

vuolgit hoahpus

ehpetge báhtaremiin,

dasgo Hearrá manná din ovdal,

Israela Ipmil lea dis maŋušin.

₁₃Mu bálvaleaddji ovdána:

Son šaddá allagin, fámolažžan

ja sakka stuorisin.

₁₄Eatnagat suorganedje go oidne su,

nu illastuvvon lei su neahku,

su hápmi lei illá šat olbmo hápmi.

₁₅Muhto son imaštahttá

vel ollu álbmogiid,

gonagasat jávohuvvet go oidnet su,

danin go dan mii sidjiide

ii lean goassege muitaluvvon,

sii besset oaidnit,

dan maid sii eai lean goassege gullan,

sii besset dál vásihit.