Duopmáriid girji 8

₁Efraimlaččat dadje Gideonii: “Manin don dahket midjiide ná? Manin it rávkan min fárrui, go vulget soahtat midjanlaččaiguin?” Sii láite Gideona garrasit, ₂muhto son dajai sidjiide: “Leango mun mahkáš dahkan juoidá mii livččii veardideames din dahkun? Almma Efraima maŋŋerádjange lea buoret go Abiesera oppa viidnemuorječoaggin! ₃Din gihtiihan Ipmil attii midjanlaččaid oaivámuččaid Oreba ja Seeba. Maid mun lean olahan din ektui?” Go son sártnui ná, de sii sožžo.

₄Gideon bođii Jordangáddái ja rasttildii eanu golmmainčuđiin olbmáinis. Doarrideapmi lei váibadan sin, ₅ja Gideon dajai Sukkota olbmáide: “Addet láibbi dáidda mu olbmáide. Sii leat váiban. Mii leat doarrideamen midjanlaččaid gonagasaid Sebaha ja Salmunna.” ₆Muhto Sukkota oaivámuččat vástidedje: “Leabago Sebah ja Salmunna juo du gieđas, go mii galggašeimmet addit láibbi du soahtevehkii?” ₇Dalle Gideon dajai: “Go Hearrá addá Sebaha ja Salmunna mu gihtii, de mun cápmán din bastilislánjáiguin ja gáskálasaiguin.” ₈Gideon manai das Penuelii ja bivddii sisnai láibbi, muhto Penuela olbmát vástidedje sutnje seammá láhkái go Sukkota olbmát. ₉Dalle Gideon dajai Penuela olbmáide: “Go mun máhcan vuoitin, de mun gaikkodan din toartna.”

₁₀Sebah ja Salmunna leigga Karkoris oktan soahteveagaideaskkaguin, sullii vihttanuppelohkáiduhát olbmáin. Dat lei visot mii lei báhcán Nuortaeatnama álbmogiid soahteveagas; čuođiguoktelogiduhát olbmá ledje gahččan soađis. ₁₁Gideon manai karavánabálgá Nobaha ja Jogbeha nuorttabeale ja fallehii soahteveaga mii lei vuoiŋŋasteamen oadjebassan. ₁₂Midjanlaččaid gonagasaguovttos Sebah ja Salmunna báhtareigga, muhto Gideon doarridii sudno, válddii sudno fáŋgan ja suorggahii oppa sudno soahteveaga.

₁₃Gideon, Joaša bárdni, máhcai soađis Heresgorgŋehaga bokte. ₁₄Son fáhtii sukkotlaš nuorra olbmá ja gažadii su. Olmmái čálii Gideonii Sukkota njunnošiid ja vuorrasiid namaid; sii ledje oktiibuot čiežalogičiežas. ₁₅Dasto Gideon manai Sukkota olbmáid lusa ja dajai: “Dá de leaba Sebah ja Salmunna, geaid dihte dii hiddjideiddet mu. Diihan dajaidet: Sebaha ja Salmunna čorpmat leat gusto juo du gieđas, go mii galgat addit láibbi du váiban olbmáide.” ₁₆De son dohppii Sukkota vuorrasiid ja cápmii sin bastilislánjáiguin ja gáskálasaiguin. ₁₇Penuela toartna son gaikkodii ja gávpoga olbmáid gottii.

₁₈Dasto Gideon jearai Sebahis ja Salmunnas: “Makkárat ledje dat olbmát geaid doai gottiide Taboris?” Soai vástideigga: “Sii ledje nugo don. Juohkehaš lei gonagasa bártni hápmásaš.” ₁₉Gideon dajai sudnuide: “Sii ledje mu vieljat, eadnán bártnit. Nu duohta go Hearrá eallá, jos livččiide diktán sin eallit, de mun in gottáše dudno.” ₂₀Dasto son dajai Jeterii, iežas vuosttašriegádeaddjái: “Gotte sudno!” Muhto bárdni ii rohtten miehkis; son lei balus, sonhan lei ain bárdnelunttaš. ₂₁Dalle Sebah ja Salmunna dajaiga: “Gotte ieš munno! Olbmás lea olbmá givrodat.” Gideon gottii Sebaha ja Salmunna ja válddii dasto mánnobealčiŋaid sudno kamelaid čeabehis.

₂₂Israellaččat dadje Gideonii: “Don leat beastán min midjanlaččaid gieđas. Riema dál min ráđđejeaddjin! Maiddái du bárdni ja bártni bárdni ožžot ráđđet min du maŋŋil.” ₂₃Muhto Gideon dajai: “Mun in riema din ráđđejeaddjin, eaige mu bártnitge šatta din ráđđejeaddjin. Hearrá lea din ráđđejeaddji.”

₂₄Gideon dajai vel sidjiide: “Mun bivddán din addit munnje rieggáid maid válddiidet sálašin.” Midjanlaččat oainnat atne gollebealljerieggáid, siihan ledje ismaellaččat. ₂₅Sii vástidedje: “Mii addit daid dutnje millosit.” Sii lebbejedje biktasa man ala buohkat bálkestedje rieggáid maid ledje váldán sálašin. ₂₆Gollerieggát maid Gideon lei bivdán, dedde duhátčiežačuođi šekela; dasa lassin ledje vel mánnobealčiŋat ja goaikkanasčiŋat, midjanlaš gonagasaid purpurbiktasat ja kamelaid čeabetviđjjit. ₂₇Gollis Gideon duddjui efoda ja ceggii dan iežas gávpogii Ofrai. Israellaččat atne dan eahpeipmilbálvalusas, ja dat šattai giellan Gideonii ja su sohkii.

₂₈Go midjanlaččat ledje vuoittáhallan israellaččaide, de sii eai šat goassege ožžon ovddeš fámuset. Israelis lei ráfi njealljelogi jagi, nu guhká go Gideon elii.

₂₉Gideon, Joaša bárdni, gii gohčoduvvui maid Jerubbaalin, máhcai ruovttugávpogasas ja ásai doppe. ₃₀Sus ledje čiežalogi bártni; sus ledje ollu áhkát. ₃₁Maiddái su liigeáhkká gii ásai Sikemis, riegádahtii sutnje bártni. Gideon gohčui bártni Abimelekin. ₃₂Gideon, Joaša bárdni, jámii boarisin, ja son hávdáduvvui áhčis Joaša hávdái abieserlaččaid Ofrai.

₃₃Go Gideon lei jápmán, de israellaččat eai lean šat oskkáldasat Hearrái, muhto bálvališgohte Baal-ipmiliid ja válde Baal-Berita iežaset ipmilin. ₃₄Sii vajáldahtte Hearrá, Ipmileaset, gii lei gádjon sin buot vašálaččain geat ledje sin birra. ₃₅Sii eai lean oskkáldasat Gideona sohkiige, vaikko son lei dahkan ollu buriid Israelii.