Jeremia 21

₁Gonagas Sidkia vuolggahii Jeremia lusa Pašhura, Malkia bártni, ja báhppa Sefanja, Maaseja bártni. Soai buvttiiga gonagasas sáni: ₂“Oza ráđi Hearrás min ovddas, dasgo Babylona gonagas Nebukadnesar soahtá minguin. Vare Hearrá dagašii oavdudagu nugo dávjá lea dahkan, vai vašálaš geassáda.” ₃Jeremia gohčui dadjat Sidkiai: ₄Ná cealká Hearrá, Israela Ipmil: Mun jorgalan din iežadet vuostá daid soahtevearjjuid maiguin dii soahtabehtet Babylona gonagasain ja kaldealaččaiguin geat birastahttet din. Mun buvttán soađi muvrraid olggobealde guovdu gávpoga. ₅Mun ieš soađan dinguin geigejuvvon ja gievrras gieđain moaris, suhtus ja stuorra vašáskemiin. ₆Mun časkkán rohttudávddain dán gávpoga ássiid, sihke olbmuid ja omiid. ₇Ja das maŋŋil, cealká Hearrá, mun attán Sidkia, Juda gonagasa, su bálvaleddjiid ja álbmoga, daid geat vel leat báhcán dán gávpogii rohttudávddas, miehkis ja nealggis, Babylona gonagasa Nebukadnesara gihtii, sin vašálaččaid gihtii ja daid gihtii geat bivdet sin heakka. Son goddá sin miehki ávjjuin; ii son árpmit, ii seastte iige ane váibmoláđisvuođa. ₈Gulat dán álbmogii: Ná cealká Hearrá: Mun divttán din válljet eallima dahje jápmima. ₉Gii báhcá dán gávpogii, dat jápmá miehkkái, nealgái ja rohttudávdii. Muhto gii vuolgá gávpogis ja searvá kaldealaččaiguin geat birastahttet din, dat oažžu eallit ja gádju heakkas. ₁₀Mun lean mearridan buktit dán gávpogii lihkuhisvuođa, mun in šat veahket dan, cealká Hearrá. Gávpot addojuvvo Babylona gonagasa gihtii, ja son boaldá dan.

₁₁Cealkke Juda gonagasvissui: