Jeremia 38

₁Šefatja, Mattana bárdni, Gedalja, Pašhura bárdni, Jukal, Šelemja bárdni, ja Pašhur, Malkia bárdni, gulle go Jeremia sártnui oppa álbmogii ná: ₂Ná cealká Hearrá: Dat gii báhcá dán gávpogii, jápmá miehkkái, nealgái ja rohttudávdii. Muhto dat gii manná kaldealaččaid beallái, gádju heakkas ja oažžu eallit. ₃Ná cealká Hearrá: Dát gávpot addojuvvo Babylonia gonagasa soahteveaga gihtii, ja son váldá dan. ₄Dalle oaivámuččat dadje gonagassii: “Dát olmmái galgá goddojuvvot! Son arvvahuhttá daid soahteolbmáid geat ain leat báhcán dán gávpogii, ja oppa álbmoga, go son sárdnu dakkár sániid. Dát olmmái ii bivdde dán álbmoga ávkki, muhto dan oasehisvuođa.” ₅Gonagas Sidkia vástidii: “Son lea din gieđas. Dasgo ii gonagas veaje didjiide maidege.” ₆Dalle sii dohppejedje Jeremia ja luite su oaraiguin gonagasa bártni Malkia gáivui mii lei fáktašiljus. Gáivvos ii lean čáhci muhto dušše mohti, ja Jeremia vuojui mohtái.

₇Nubialaš Ebed-Melek, gonagasa šloahta hoavvaolmmái, gulai ahte Jeremia lei suhppejuvvon gáivui. Gonagas lei čohkkámin dalle Benjaminpoartta luhtte, ₈ja Ebed-Melek vulggii šloahtas gonagasa lusa ja dajai sutnje: ₉“Hearrán gonagas! Duot olbmát leat meannudan juohke láhkái bahás maid sii leat dahkan profehta Jeremiai. Sii leat suhppen su gáivui ja guođđán su dohko nealgut jámas; iihan gávpogis leat šat eambbo láibi.”

₁₀Dalle gonagas gohčui nubialaš Ebed-Meleka: “Váldde fárrui golbmalogi olbmá ja gease profehta Jeremia bajás gáivvos, ovdal go son jápmá.” ₁₁Nu Ebed-Melek válddii olbmáid fárrui ja manai gonagasa šlohttii dan latnjii mii lei vuorkágámmára vuolde. Doppe son válddii sáigguid ja nohkan biktasiid, luittii daid oaraiguin gáivui Jeremiai ₁₂ja dajai sutnje: “Bija dáid sáigguid gieđavuliidasat oaraid vuollái!” Jeremia dagai nu, ₁₃ja olbmát gesse su oaraiguin bajás gáivvos. Jeremia bázii fáktašilljui.

₁₄Gonagas Sidkia vieččahii lusas profehta Jeremia Hearrá tempela goalmmát portii. Gonagas dajai Jeremiai: “Mun jearan dus juoidá. Ale čiega mus maidege!” ₁₅Jeremia vástidii Sidkiai: “Jos mun muitalan dutnje juoidá, de don gottát mu, ja jos mun rávven du, de don it guldal.” ₁₆Dalle gonagas Sidkia vuortnui guovttá gaskan Jeremiai: “Nu duohta go Hearrá eallá, son guhte lea addán midjiide dán eallima, de mun in gotte du inge atte du daid olbmáid gihtii geat bivdet du heakka.” ₁₇Jeremia dajai Sidkiai: “Ná cealká Hearrá, Almmiveagaid Ipmil, Israela Ipmil: Jos don vuollánat Babylonia gonagasa oaivámuččaide, de du heagga gáddjo iige dát gávpot boldojuvvo. Don ieš ja du bearaš oažžubehtet eallit. ₁₈Muhto jos don it vuollán Babylonia gonagasa oaivámuččaide, de dát gávpot addojuvvo kaldealaččaid gihtii. Sii boldet dan, itge don iešge gáddjo sin gieđas.” ₁₉Gonagas Sidkia dajai Jeremiai: “Mun balan Juda olbmuin geat leat mannan kaldealaččaid beallái. Kaldealaččat vedjet addit mu sin gihtii, ja sii illastit mu.” ₂₀Jeremia dajai: “Eai sii atte du. Gula dušše Hearrá jiena, guldal maid mun sártnun dutnje, de dutnje geavvá bures ja don oaččut eallit. ₂₁Muhto jos don biehttalat vuolláneames, de dalle ollašuvvá dat maid Hearrá lea čájehan munnje: ₂₂Buot nissonat geat ledje báhcán Juda gonagasa šlohttii, dolvojuvvojedje Babylonia gonagasa oaivámuččaid lusa. Nissonat lávlo:

₂₃Buot du áhkát ja du mánát dolvojuvvojit kaldealaččaid lusa, itge don gáddjo sin gieđas. Babylonia gonagas váldá du gitta ja gávpot boldojuvvo.”

₂₄Sidkia dajai Jeremiai: “Ale divtte ovttage oažžut diehtit maid moai letne sártnodan, muđui don jámát. ₂₅Go oaivámuččat gullet ahte mun lean sártnodan duinna, de sii bohtet du lusa ja lohket: Muital midjiide maid don dadjet gonagassii ja maid gonagas dajai dutnje. Ale čiega dan mis, muđui mii goddit du! ₂₆Vástit dalle sidjiide: Mun bivden gonagasas njuorrasit ahte son ii vuolggahivčče mu ruoktot Jonatana vissui, danin go mun jámášin dohko.”

₂₇Go oaivámuččat bohte Jeremia lusa ja jearahedje sus, de son muitalii sidjiide buot aiddo nugo gonagas lei gohččon. Dalle sii jávohuvve ja dikte su orrut ráfis, danin go ášši ii lean beaggán. ₂₈Jeremia orui fáktašiljus gitta dan beaivvi rádjái go Jerusalem váldojuvvui.