Johannes 1

₁Álggus lei Sátni. Sátni lei Ipmila luhtte, ja Sátni lei Ipmil. ₂Son lei álggus Ipmila luhtte. ₃Buot lea šaddan su bokte, ja almmá su haga ii leat šaddan mihkkege das mii lea. ₄Su siste lei eallin, ja eallin lei olbmuid čuovga. ₅Čuovga báitá seavdnjadasas, muhto seavdnjadas ii leat dan vuoitán.

₆De bođii olmmái gean Ipmil lei vuolggahan, su namma lei Johannes. ₇Son bođii duođašteaddjin, čuovgga duođašteaddjin, vai buohkat oskkošedje su bokte. ₈Ii son ieš lean čuovga, muhto son lei čuovgga duođašteaddji.

₉Duohta čuovga mii čuvge juohke olbmo, lei boahtimin máilbmái. ₁₀Son lei máilmmis, ja máilbmi lei šaddan su bokte, muhto máilbmi ii dovdan su. ₁₁Son bođii dasa mii gulai sutnje, ja su iežas olbmot eai váldán su vuostá. ₁₂Muhto buohkaide geat válde su vuostá, son attii vuoigatvuođa šaddat Ipmila mánnán, buohkaide geat oskot su nammii. ₁₃Sii eai leat riegádan varas eaige rupmaša dáhtus eaige olbmá dáhtus, muhto Ipmilis.

₁₄Sátni šattai olmmožin ja ásai min gaskii. Mii oinniimet su hearvásvuođa, hearvásvuođa maid Áhčči addá áidnoriegádan bárdnásis. Su dievva lei árbmu ja duohtavuohta. ₁₅Johannes duođaštii su birra ja čuorvvui: “Son lea dat gean birra mun celken: Son gii boahtá mu maŋŋil, manná mu ovdalis, dainna go son lea leamaš ovdal go mun.”

₁₆Su dievasvuođas mii buohkat leat ožžon, velá árpmu árpmu badjelii. ₁₇Dasgo láhka addojuvvui Mosesa bokte, árbmu ja duohtavuohta bođii Jesus Kristusa bokte. ₁₈Ii oktage leat goassege oaidnán Ipmila. Áidnoriegádan Bárdni, guhte ieš lea Ipmil ja guhte lea álo Áhči bálddas, lea oahpahan min dovdat su.

₁₉Dát lea duođaštus maid Johannes attii go juvddálaččat vuolggahedje Jerusalemis báhpaid ja levilaččaid su lusa jearrat: “Gii don leat?” ₂₀Son dovddastii duohtavuođa, son ii dan šiitán. Son celkkii: “Mun in leat Messias.” ₂₁Sii jerre: “Gii don dalle leat? Leatgo don Elia?” Son vástidii: “In leat.” Sii jerre: “Leatgo don dat lohpiduvvon profehta?” Son vástidii: “In leat.” ₂₂De sii dadje sutnje: “Gii don dalle leat? Mii fertet doalvut vástádusa daidda geat vuolggahedje min. Maid don dajat iežat birra?” ₂₃Johannes celkkii: “Mun lean jietna mii čuorvu meahcis: Dahket geainnu njuolgadin Hearrái, nugo profehta Jesaja lea cealkán.” ₂₄Maiddái muhtun farisealaččat ledje vuolggahuvvon Johannesa lusa. ₂₅Sii jerre sus: “Manne don dalle gásttašat olbmuid, go juo it leat Messias, it Elia itge dat profehta?” ₂₆Johannes vástidii: “Mun gásttašan čáziin, muhto din gaskkas lea juo nubbi, vaikko dii ehpet dovdda su, ₂₇son gii boahtá mu maŋŋil. Mun in leat dohkálaš čoavdit oppa su gámagarccaidge.” ₂₈Dát dáhpáhuvai Betanias don bealde Jordana gos Johannes lei gásttašeamen.

₂₉Maŋit beaivvi Johannes oinnii Jesusa boahtimin lusas ja celkkii: “Gehččet: Ipmila Láppis gii váldá eret máilmmi suttu! ₃₀Son lea dat gean birra mun celken: ‘Son gii boahtá mu maŋŋil lea boahtán mu ovdalis, dainna go son lea leamaš ovdal mu.’ ₃₁Mun in dovdan su, muhto aiddo dan dihte mun lean boahtán gásttašit čáziin, vai Israel oažžu diehtit gii son lea.” ₃₂ Johannes duođaštii: “Mun lean oaidnán mo Vuoigŋa luoitádii almmis duvvá hámis ja bisánii su ala. ₃₃Mun in dovdan su. Muhto son gii vuolggahii mu gásttašit čáziin, celkkii munnje: ‘Son gean ala don oainnát Vuoiŋŋa luoitádeamen ja bisáneamen, gásttaša Bassi Vuoiŋŋain.’ ₃₄Mun lean oaidnán dan, ja mun lean duođaštan ahte son lea Ipmila Bárdni.”

₃₅Maŋit beaivvi Johannes čuoččui fas seammá báikkis, ja guovttis su máhttájeddjiin ledje das suinna. ₃₆Son oinnii Jesusa vázzimin das meattá ja celkkii: “Geahča, Ipmila Láppis.” ₃₇Go máhttájeaddji guovttos gulaiga su sániid, de soai čuovvuleigga Jesusa. ₃₈Jesus jorggihii, ja go son oinnii sudno čuovvumin, de son jearai: “Maid doai dáhttubeahtti?” Soai vástideigga: “Rabbi, gos don orut?” Rabbi mearkkaša oahpaheaddji. ₃₉Jesus celkkii: “Boahtti geahččat, de oaidnibeahtti.” Soai manaiga ja oinniiga gos son orui, ja soai bisáneigga su lusa dan beaivái. Eahket lei boahtimin, lei logát diimmu muttos.

₄₀Nubbi dan guoktás geat gulaiga Johannesa sániid ja čuovvuleigga Jesusa, lei Andreas, Simon Petera viellja. ₄₁Son vulggii vuos deaivvadit vieljainis Simoniin ja dajai sutnje: “Moai letne gávdnan Messiasa!” Messias lea seammá go Kristus. ₄₂De Andreas doalvvui su Jesusa lusa. Jesus geahčai sutnje ja celkkii: “Don leat Simon, Johannesa bárdni. Du namma galgá leat Kefas.” Kefas lea seammá go Peter.

₄₃Maŋit beaivvi go Jesus lei vuolgimin Galileai, de son deaivvai Filipa ja celkkii sutnje: “Čuovo mu!” ₄₄Filip lei eret Betsaidas, seammá gávpogis go Peter ja Andreas. ₄₅Filip deaivvai Natanaela ja dajai sutnje: “Mii leat gávdnan su gean birra Mosesa láhka ja profehtaid girjjit duođaštit! Son lea nasaretlaš Jesus, Josefa bárdni.” ₄₆Natanael dajai: “Sáhttágo Nasaretis boahtit mihkkege buriid?” Filip vástidii: “Boađe geahččat!” ₄₇Go Jesus oinnii Natanaela boahtimin, de son celkkii: “Dá lea duohta israellaš, geas ii leat behtolašvuohta!” ₄₈Natanael jearai: “Mas don mu dovddat?” Jesus vástidii: “Mun oidnen du čohkkámin fiikonmuora vuolde juo ovdal go Filip rávkkai du.” ₄₉Natanael dajai: “Rabbi, don leat Ipmila Bárdni, don leat Israela gonagas!” ₅₀Jesus celkkii: “Oskkutgo don dainna go mun celken ahte oidnen du fiikonmuora vuolde? Don beasat oaidnit stuorit áššiid.” ₅₁Son celkkii vel: “Duođaid, duođaid, mun cealkkán didjiide: Dii oažžubehtet oaidnit almmi rabasin ja Ipmila eŋgeliid goargŋumin ja njiedjamin dakko gokko Olbmobárdni lea.”