Johannes 10

₁“Duođaid, duođaid, mun cealkkán didjiide: Dat gii ii mana sávzagárdái uksaráigge muhto goargŋu eará sajis, lea suola ja rievvár. ₂Muhto dat gii manná uksaráigge, lea sávzzaid geahčči. ₃Sutnje fákta rabasta uvssa, ja sávzzat guldalit su jiena. Son čuorvu sávzzaidis nama mielde ja doalvu daid guohtut. ₄Ja go son lea luoitán olggos buot sávzzaidis, de son manná daid ovddas, ja sávzzat čuvvot su, danin go dat dovdet su jiena. ₅Muhto amas olbmo dat eai čuovo muhto báhtarit sus, danne go dat eai dovdda apmasa jiena.” ₆Jesus muitalii sidjiide dán veardádusa, muhto sii eai ádden maid son dainna oaivvildii.

₇Dalle Jesus celkkii: “Duođaid, duođaid, mun cealkkán didjiide: Mun lean sávzzaid uksa. ₈Dat geat leat boahtán mu ovdal, leat buohkat suollagat ja rievvárat, muhto sávzzat eai leat guldalan sin. ₉Mun lean uksa. Dat gii manná sisa mu bokte, bestojuvvo. Son manná sisa ja olggos ja gávdná guohtuma. ₁₀Suola boahtá dušše suoládit, sorbmet ja stajidit. Mun lean boahtán addit eallima, valljugas eallima.

₁₁Mun lean buorre báimman. Buorre báimman addá heakkas sávzzaid ovddas. ₁₂Muhto bálkkolaš ii leat albma báimman eaige sávzzat leat su, ja go son oaidná gumppe boahtimin, de son guođđá ealu ja báhtara. Gumpe rohkkáha sávzzaid ja biđge ealu, ₁₃danne go bálkáhuvvon báimman ii beroš sávzzain.

₁₄Mun lean buorre báimman. Mun dovddan sávzzaidan ja mu sávzzat dovdet mu, ₁₅nugo Áhčči dovdá mu ja mun dovddan Áhči. Mun attán iežan heakka sávzzaid ovddas. ₁₆Mus leat maiddái eará sávzzat mat eai gula dán sávzagárdái, ja mun ferten geahččat maiddái daid. Dat guldalit mu jiena, ja nu šaddá okta eallu ja okta báimman.

₁₇Áhčči ráhkista mu, danne go mun attán iežan heakka, vai oaččun dan fas. ₁₈Ii oktage váldde dan mus, mun ieš attán dan. Mus lea fápmu addit dan ja fápmu dan fas váldit. Dan gohččuma mun lean ožžon Áhčistan.”

₁₉Dát sánit dagahedje fas riiddu juvddálaččaid gaskii. ₂₀Eatnagat sis dadje: “Sus lea bahás vuoigŋa, son lea mielaheapme. Manne dii guldalehpet su?” ₂₁Earát dadje: “Nu ii sártno bosttahuvvon olmmoš. Ja sáhttágo bahás vuoigŋa rabastit čalmmehemiid čalmmiid?”

₂₂Lei dálvi, ja Jerusalemis dollojuvvojedje tempelvihaheami basit. ₂₃Go Jesus lei váccašeamen tempelis Salomo bázzehállas, ₂₄de juvddálaččat čoahkkanedje su birra ja dadje: “Man guhká don givssidat min? Jos don leat Messias, de cealkke dan midjiide vuigestaga.”

₂₅Jesus vástidii: “Mun lean cealkán dan didjiide, muhto dii ehpet oskko. Dagut maid mun dagan Áhččán nammii, duođaštit mu birra. ₂₆Muhto dii ehpet jáhke, danne go dii ehpet leat mu sávzzat. ₂₇Mu sávzzat guldalit mu jiena, mun dovddan daid, ja dat čuvvot mu. ₂₈Mun attán sidjiide agálaš eallima; sii eai goassege láhppo, iige oktage rohtte sin eret mu gieđas. ₂₉Mu Áhčči guhte lea addán sin munnje, lea stuorit go buot earrásat, iige oktage sáhte rohttet sin eret Áhččán gieđas. ₃₀Mun ja Áhčči letne okta.”

₃₁Juvddálaččat čoaggigohte fas geđggiid vai besset geađgádit su. ₃₂Jesus celkkii sidjiide: “Mun lean din oaidnut dahkan ollu buriid daguid mat bohtet Áhčis. Guđemuš dagu dihte dii áigubehtet geađgádit mu?” ₃₃Juvddálaččat vástidedje: “Eat mii geađgát du mange buori dagu dihte, muhto ipmilbilkádusa dihte. Don dagat iežat Ipmilin, vaikko leat olmmoš.” ₃₄Jesus vástidii: “Almma din lágas lea čállojuvvon: Mun lean cealkán ahte dii lehpet ipmilat? ₃₅Láhka nappo gohčoda ipmilin daid geat ožžo Ipmila sáni, eaige čállagat sáhte dahkkojuvvot duššin. ₃₆Áhčči lea basuhan mu ja vuolggahan mu máilbmái. Mo dii sáhttibehtet čuoččuhit ahte mun bilkidan Ipmila, go mun cealkkán ahte lean Ipmila Bárdni? ₃₇Jos mun in daga Áhččán daguid, de allet oskko munnje. ₃₈Muhto jos mun dagan, de oskot goittot mu daguide, jos velá ehpet oskkoge munnje. Dalle oahppabehtet ipmirdit ahte Áhčči lea mu siste ja mun lean Áhči siste.” ₃₉Juvddálaččat geahččaledje fas váldit Jesusa gitta, muhto son beasai eret sin gieđas.

₄₀Jesus manai fas don beallái Jordana dan báikái gos Johannes álggos lei gásttašan. Doppe son orui muhtun áiggi. ₄₁Ollugat bohte su lusa ja dadje: “Johannes ii dahkan maidege mearkkaid, muhto buot maid son celkkii dán olbmá birra, lea duohta.” ₄₂Doppe eatnagat osko Jesusii.