Johannes 8

₁₂Jesus sártnui fas olbmuide ja celkkii: “Mun lean máilmmi čuovga. Gii čuovvu mu, dat ii goassege vádjol seavdnjadasas, muhto sus lea eallima čuovga.” ₁₃Farisealaččat dadje sutnje: “Don duođaštat iežat birra, du duođaštus ii leat dohkálaš.” ₁₄Jesus vástidii: “Vaikko mun duođaštan iežan birra, de mu duođaštus lea dattetge dohkálaš, danne go mun dieđán gos lean boahtán ja gosa manan. Muhto dii ehpet dieđe gos mun lean boahtán ja gosa manan. ₁₅Dii dubmebehtet nugo olbmot dubmejit, muhto mun in dubme ovttage. ₁₆Ja jos mun vel dubmenge, de mu duopmu lea riekta, danin go mun in leat okto. Son guhte lea vuolggahan mu, lea muinna. ₁₇Din iežadet lágasge daddjojuvvo ahte guovtti olbmo duođaštus lea dohkálaš. ₁₈Mun duođaštan iežan birra, ja mu birra duođašta maiddái Áhčči, gii lea mu vuolggahan.” ₁₉Sii jerre: “Gos du áhčči lea?” Jesus vástidii: “Dii ehpet dovdda mu ehpetge mu Áhči. Jos dii dovddašeiddet mu, de dii dovddašeiddet maiddái mu Áhči.”

₂₀Dán Jesus sártnui tempelis go lei oahpaheamen álbmoga tempelbumbbá guoras. Ii oktage váldán su gitta, dainna go su boddu ii lean velá boahtán.

₂₁Jesus sártnui fas sidjiide: “Mun manan eret. Dalle dii ohcabehtet mu, muhto jápmibehtet suttuidasadet. Dohko gosa mun manan, dii ehpet beasa.” ₂₂Juvddálaččat dadje dalle: “Áigugo son sorbmet iežas go juo dadjá: ‘Dohko gosa mun manan, dii ehpet beasa’?” ₂₃Jesus celkkii sidjiide: “Dii boahtibehtet vuollin, mun boađán badjin. Dii gullabehtet dán máilbmái, mun in gula dán máilbmái. ₂₄Dan dihte mun celken ahte dii jápmibehtet suttuidasadet. Dasgo jos dii ehpet jáhke ahte mun lean dat gii mun lean, de dii jápmibehtet suttuidasadet.” ₂₅Sii jerre sus: “Gii don leat?” Jesus celkkii: “Manne mun oppa sártnunge dinguin? ₂₆Mus lea din birra ollu dadjamuš ja ollu dubmemuš. Muhto son gii lea mu vuolggahan, sárdnu duođa, ja maid mun lean gullan sus, dan mun sártnun máilbmái.”

₂₇Sii eai ádden ahte son sártnui sidjiide Áhči birra. ₂₈Ja Jesus celkkii: “Go dii lehpet bajidan Olbmobártni, de dii ipmirdehpet ahte mun lean dat gii lean inge daga maidege iežan dáhtus, muhto sártnun nugo Áhčči lea oahpahan munnje. ₂₉Ja son gii lea vuolggahan mu, lea muinna. Son ii guođe mu okto, danin go mun dagan visot su miela mielde.” ₃₀Eatnagat osko Jesusii go gulle su sárdnumin ná.

₃₁Daidda juvddálaččaide geat dál osko sutnje, Jesus celkkii: “Jos dii bissubehtet mu sánis, de dii lehpet duođaid mu máhttájeaddjit. ₃₂Dalle dii dovddiidehpet duohtavuođa, ja duohtavuohta dahká din friddjan.” ₃₃Sii dadje sutnje: “Mii leat Abrahama nálli eatge leat goassege leamaš geange šlávat. Mo don dalle sáhtát dadjat ahte mii šaddat friddjan?” ₃₄Jesus vástidii: “Duođaid, duođaid, mun cealkkán didjiide: Juohkehaš gii dahká suttu, lea suttu šlávva. ₃₅Šlávva ii biso viesus agálaččat, muhto bárdni bissu agálaččat. ₃₆Jos Bárdni dahká din friddjan, de dii lehpet duođaid friddja. ₃₇Mun dieđán ahte dii lehpet Abrahama nálli. Muhto dii dáhttubehtet goddit mu, dasgo mu sátni ii oaččo saji din siste. ₃₈Mun sártnun dan maid lean oaidnán Áhči luhtte, ja diigis dahkabehtet dan maid lehpet oahppan iežadet áhčis.” ₃₉Sii vástidedje: “Min áhčči lea Abraham.” Jesus celkkii: “Jos dii livččiidet Abrahama mánát, de dii dagašeiddet Abrahama daguid. ₄₀Muhto dál dii bivdibehtet goddit mu – olbmá gii lea cealkán didjiide duohtavuođa, dan maid lea gullan Ipmilis. Nu ii Abraham dahkan. ₄₁Dii dahkabehtet seammá ládje go din áhčči.” Sii dadje: “Mii eat leat riegádan fuorrávuođas. Mis lea okta áhčči, Ipmil.” ₄₂Jesus celkkii: “Jos Ipmil livččii din áhčči, de dii ráhkistivččiidet mu, danin go mun lean vuolgán Ipmila luhtte ja lean dál dás. In mun leat boahtán iežan dáhtus, muhto son lea mu vuolggahan. ₄₃Manin dii ehpet ádde mu sániid? Danin go dii ehpet gierdda gullat maid mun sártnun. ₄₄Din áhčči lea beargalat, ja dii dáhttubehtet dahkat maid din áhčči anistuvvá. Son lea leamaš sorbmejeaddji álggu rájes. Son lea guhkkin eret duohtavuođas, dat lea sutnje amas. Go son sárdnu giellásiid, de son sárdnu dan mii lea su iežas, dainna go son lea gielástalli ja giellása áhčči. ₄₅Muhto munnje dii ehpet jáhke, danin go mun sártnun duohtavuođa. ₄₆Guhtemuš dis sáhttá čájehit ahte mun lean suddudan? Ja jos mun sártnun duođa, de manne dii dalle ehpet jáhke munnje? ₄₇Dat gean áhčči lea Ipmil, gullá Ipmila sáni. Dii ehpet gula, danne go din áhčči ii leat Ipmil.”

₄₈Juvddálaččat dadje Jesusii: “Almma mii leat vuoigadis go dadjat ahte don leat samarialaš ja ahte dus lea bahás vuoigŋa?” ₄₉Jesus vástidii: “Ii mus leat bahás vuoigŋa. Mun gudnejahtán Áhččán, ja dii badjelgeahččabehtet mu. ₅₀In mun oza iežan gudni, muhto lea okta gii ohcá ja gii dubme. ₅₁Duođaid, duođaid, mun cealkkán didjiide: Gii doallá mu sáni, dat ii goassege muosát jápmima.” ₅₂Juvddálaččat dadje: “Dál mii diehtit ahte dus lea bahás vuoigŋa. Abraham lea jápmán, nu maiddái profehtat, ja don dajat: ‘Gii doallá mu sáni, dat ii goassege muosát jápmima.’ ₅₃Dongo mahkáš leat stuorit go min áhčči Abraham? Abraham lea jápmán, ja jápmán leat maiddái profehtat. Geanin don dagat iežat?” ₅₄Jesus vástidii: “Jos mun ieš gudnejahtán iežan, de mu gudni ii leat mange veara. Muhto mu gudnejahttá Áhčči, son gean dii lohkabehtet iežadet Ipmilin. ₅₅Dii ehpet dovdda su, muhto mun dovddan su. Jos mun dajašin ahte in dovdda su, de mun livččen gielástalli nugo dii. Muhto mun dovddan su ja doalan su sáni. ₅₆Din áhčči Abraham illudii go galggai beassat oaidnit mu beaivvi. Son oinnii dan ja illudii.” ₅₇Juvddálaččat dadje sutnje: “Don it leat vihttalogi jagi boarisge ja leat mahkáš oaidnán Abrahama!” ₅₈Jesus vástidii: “Duođaid, duođaid, mun cealkkán didjiide: Ovdal go Abraham riegádii – mun lean.”

₅₉Dalle sii čoaggigohte geđggiid vai besset geađgádit su, muhto Jesus čiehkádii ja manai olggos tempelis.