Johannes 9

₁Go Jesus lei vázzimin ovddas guvlui, de son oinnii olbmá gii lei leamaš čalmmeheapme riegádeami rájes. ₂Máhttájeaddjit jerre: “Rabbi, gii lea suddudan, son ieš vai su vánhemat, go son lea riegádan čalmmeheapmin?” ₃Jesus vástidii: “Ii son eabage su vánhemat. Nu lea geavvan, vai Ipmila dagut šaddet sus albmosii. ₄Nu guhká go lea beaivi, de mii fertet dahkat su daguid gii lea mu vuolggahan. Boahtá idja goas ii oktage sáhte bargat. ₅Nu guhká go mun lean máilmmis, de mun lean máilmmi čuovga.” ₆Go Jesus lei cealkán dán, de son čolgadii eatnamii, dagai čolggas dáiggi, vuoiddai dan olbmá čalmmiide ₇ja celkkii sutnje: “Mana basadit Siloaláddos.” – Siloa mearkkaša vuolggahuvvon. – Olmmái manai, basadii ja bođii ruoktot oaidnin.

₈Olbmá ránnját ja earát geat ovdal ledje oaidnán su gearjideamen, dadje: “Almma dát lea dat gii čohkkái ja gearjidii?” ₉Muhtumat dadje ahte son dat lei, muhtumatgis dadje: “Ii leat, son lea dušše su vuohkái.” Muhto son ieš dajai: “Mun dat lean.” ₁₀Sii jerre sus: “Mo dus rahpasedje čalmmit?” ₁₁Son vástidii: “Dat olmmái gean namma lea Jesus, dagai dáiggi muolddas, vuoiddai dainna mu čalmmiid ja dajai: ‘Mana basadit Siloaláddos.’ Mun mannen ja basadin, ja dalle mun oaidnigohten.” ₁₂“Gos dát olmmái lea?” sii jerre sus, muhto son vástidii: “In mun dieđe.”

₁₃Olmmái gii lei leamaš čalmmeheapme, dolvojuvvui farisealaččaid lusa. ₁₄Dat beaivi go Jesus lei dahkan dáiggi ja rabastan olbmá čalmmiid, lei sabbat. ₁₅Maiddái farisealaččat jerre sus, mo son lei ožžon oainnu, ja olmmái muitalii: “Son bijai dáiggi mu čalmmiide, de mun mannen basadeamen, ja dál mun oainnán.” ₁₆Muhtun farisealaččat dadje: “Ii son sáhte leat Ipmila olmmái, go son ii doala sabbaha.” Muhtumat dadje: “Mo suttolaš olmmái sáhttá dahkat diekkár mearkkaid?” Sin gaskii šattai gižžu, ₁₇ja danne sii jerre fas čalmmeheamis: “Maid don ieš oaivvildat su birra? Du čalmmiidhan son rabastii.” Olmmái vástidii: “Son lea profehta.”

₁₈Juvddálaččat eai jáhkkán ahte olmmái lei leamaš čalmmeheapme ja ožžon oainnu, ovdal go sii rávke dasa su vánhemiid. ₁₉Sii jerre sudnos: “Leago dát dudno bárdni gean dadjabeahtti riegádan čalmmeheapmin? Mo son dál sáhttá oaidnit?” ₂₀Vánhemat vástideigga: “Moai dihte ahte dát lea munno bárdni ja ahte son lea leamaš eamičalmmeheapme. ₂₁Muhto dan moai ean dieđe, mo son dál oaidná, eange moai dieđe gii lea rabastan su čalmmiid. Jerret sus alddis, son lea ollesolmmoš ja máhttá ieš vástidit.” ₂₂Vánhenguovttos dajaiga ná, danne go soai balaiga juvddálaččain. Juvddálaččat ledje oainnat juo šiehttan čuoldit synagogas eret juohkehačča gii dovddastii Jesusa Messiasin. ₂₃Danne vánhenguovttos dajaiga: “Son lea ollesolmmoš, jerret sus alddis.”

₂₄Farisealaččat rávke fas lusaset olbmá gii lei leamaš čalmmeheapme. Sii dadje sutnje: “Atte gudni Ipmilii! Mii diehtit ahte dat olmmái lea suttolaš.” ₂₅Olmmái vástidii: “Leago son suttolaš, dan mun in dieđe. Muhto dan dieđán ahte mun gii ledjen čalmmeheapme, dál oainnán.” ₂₆Sii jerre: “Maid son dagai dutnje? Mo son rabastii du čalmmiid?” ₂₇Olmmái vástidii: “Munhan juo muitalin dan didjiide, muhto dii ehpet gullan. Manne dii fas dáhttubehtet gullat dan? Áigubehtetgo diinai šaddat su máhttájeaddjin?” ₂₈Sii vástidedje sutnje bilkidemiin: “Don leat su máhttájeaddji, mii leat Mosesa máhttájeaddjit. ₂₉Mii diehtit ahte Ipmil sártnui Mosesii, muhto mii eat dieđe gos dát olmmái boahtá.” ₃₀Olmmái dajai: “De lea ártet, go dii ehpet dieđe gos son boahtá, ja liikká son lea rabastan mu čalmmiid. ₃₁Mii diehtit ahte Ipmil ii guldal suttolaččaid, muhto son guldala dan gii ballá sus ja eallá su dáhtu mielde. ₃₂Ii goassege leat gullon ahte muhtun livččii rabastan dakkár olbmo čalmmiid gii lea riegádan čalmmeheapmin. ₃₃Jos dát olmmái ii livčče Ipmila olmmái, de son ii sáhtáše maidege dahkat.” ₃₄Dalle farisealaččat dadje: “Don leat suttolaš riegádeami rájes, ja don riemat oahpahit min!” Ja sii bálkestedje olbmá olggos.

₃₅Jesus gulai ahte sii ledje bálkestan su olggos, ja go son deaivvai su, de son jearai: “Oskkutgo don Olbmobárdnái?” ₃₆Olmmái jearai: “Hearrá, gii son lea? Muital, vai mun sáhtán oskut sutnje.” ₃₇Jesus celkkii: “Don leat oaidnán su. Son lea dás ja sárdnu duinna.” ₃₈“Mun oskkun, Hearrá”, olmmái dajai ja luoitádii su ovdii.

₃₉Jesus celkkii: “Mun lean boahtán dán máilbmái ollašuhttit duomu, vai čalmmeheamit ožžot oainnu ja dat geat oidnet, čalmmehuvvet.” ₄₀Go muhtun farisealaččat geat čužžo das, gulle dan, de sii jerre sus: “Oaivvildatgo ahte miinai leat čalmmeheamit?” ₄₁Jesus vástidii: “Jos dii livččiidet čalmmeheamit, de dis ii livčče suddu, muhto dii lohkabehtet oaidnit, ja danne din suddu bissu.”