Sofar sárdnu vuosttaš háve
1De naamalaš Sofar sárdnugođii:
2Iigo oktage vástit diekkár sátnedulvái?
Oažžugo sártnášteaddji maŋimuš sáni?
3Du sárdnun jávohuhttá buohkaid,
don bilkidat,
iige oktage cuiggot du.
4Don jáhkát leat vuoigadis,
ahte leat sivaheapme Ipmila ovddas.
5Vare Ipmil datte sártnošii
ja cuiggodivččii du!
6Son almmustahtášii dutnje
viisodaga čiegusvuođaid
maid jierbmi lea guovttegeardásaš.
Dalle don ipmirdivččet, man ollu suttuid
son addá dutnje ándagassii.
7Máhtátgo don boahtit
Ipmila čiegusvuođaid boddii
dahje gávdnat Buotveagalačča ollisvuođa?
8Dat lea alit go albmi
– mo don máhtát dan fáhtet?
Dat lea čiekŋaleabbo go jábmiidáibmu
– maid don das dieđát?
9Dan mihttu lea guhkit go eanan,
dat lea govddit go áhpi.
10Jos son dáhttu dohppet olbmo,
bidjat su giddagassii
ja bovdet rievtti čoahkkái,
gii dalle sáhtášii hehttet su?
11Son dovdá behtolaččaid,
son mearkkaša suttu
maid earát eai fuomáš.
12Sáhttágo jierpmehis olmmái jierbmat?
Sáhttágo meahcceásen šaddat olmmožin?
13Muhto jos don jierpmat
ja lebbet gieđaid su guvlui,
14jos gáidadat suttu
itge divtte vearrivuođa ássat goađistat,
15de don sáhtát bajidit oaivvi
vigiheapmin,
bissut nanusin almmá balu haga.
16Don vajáldahtát váivviid,
don muittát daid dušše
dego čáziid mat golge meaddel.
17Du eallin šaddá šearradin
dego čuvges beaivi,
ja seavdnjadas šaddá dutnje
iđedisguovssun.
18Don oaččut leat oadjebas,
dasgo dus lea doaivu,
don leat suojis
ja beasat veallánit oadjebassan.
19Ii oktage baldde du
go don manat vuoiŋŋastit,
eatnagat dohkkestuvvet dutnje.
20Muhto ipmilmeahttumiid
čalmmit sotnet
iige sis leat gosa báhtarit,
sin doaivu lea duššan.
