Job 28

₁Silba roggojuvvo ruvkkes,

gollis lea iežas gávdnansadji,

₂ruovdi váldojuvvo eatnamis

ja veaiki suddaduvvo luovos geađggis.

₃Olmmoš jávkada seavdnjadasa

ja bahkke vuolimus čiekŋalassii,

vai beassá dutkat bávtti mii lea čihkosis

seavdnjadeamos ijas.

₄Son roggá ráiggiid

dohko gos olbmot eai oro.

Vajálduvvan sajiin

maid olbmo juolgi ii leat vázzán,

olbmát heaŋgájit ráippiid veagas

gáidosis olbmuin.

₅Eatnamis boahtá láibi,

dan čieŋalvuođas buot earáhuvvá

dego dola fámus.

₆Dan bávttis lea safira,

eatnama čievrras golli.

₇Gazzaloddi ii dovdda bálgá dohko,

fálli čalbmi ii dan oainne,

₈goargadis boraspiret eai dan duolmma,

doppe ii vácce ledjon.

₉Olmmoš bargá garra geađggi,

jorgu váriid vuođđudusaidge,

₁₀čuollá báktái ráiggi,

ja buot mii lea mávssolaš,

boahtá oidnosii.

₁₁Son buođđu čáhcesuonaid,

buktá čuovgasii čiegus diŋggaid.

₁₂Muhto viissisvuohta,

gos dan sáhttá gávdnat?

Gos lea ipmárdusa ássansadji?

₁₃Olmmoš ii dovdda geainnu dan lusa,

dat ii leat gávdnamis ealli olbmuid eatnamis.

₁₄Čiekŋalas dadjá:

“Ii viissisvuohta leat dáppe”,

áhpi cealká:

“Ii dat leat dáppege.”

₁₅Dan ii sáhte oastit golliin,

dan hatti ii sáhte vihkket silban,

₁₆dat ii leat oastimis Ofira golliin,

ii mávssolaš onyksgeđggiin iige safirain.

₁₇Ii golli, ii šearradeamos láse leat

viissisvuođa veardásaš,

ii oktage sáhte lonuhit dan alccesis

fiidnámus gollelihtiiguin,

₁₈velá uhcit korállaiguin

ja kristállaiguin.

Buoret lea oamastit viissisvuođa

go bearraliid.

₁₉Nubia topása ii leat

viissisvuođa veardásaš,

viissisvuohta ii leat oastimis

čielga golliin.

₂₀Gos dalle boahtá viissisvuohta?

Gos lea ipmárdusa ássansadji?

₂₁Dat lea čihkkojuvvon

buot heakkalaččaid čalmmiin,

velá almmi lottitge eai oainne dan.

₂₂Gáđohus dadjá, jápmin dadjá:

“Dat lea dušše beaggán deike.”

₂₃Muhto Ipmil dovdá geainnu

viissisvuođa lusa,

son diehtá gos dan ássansadji lea.

₂₄Son geahččá máilmmi ravddaid rádjái,

son oaidná buot mii lea almmi vuolde.

₂₅Go son mearridii biekka deattu

ja bijai čáziide mihtu,

₂₆go son ásahii arvái lága

ja mearridii bajándálkki geainnu,

₂₇dalle son áiccai viissisvuođa

ja dutkkai dan,

dovddiidii dan ja guorahalai dan.

₂₈Ja son celkkii olbmui:

“Lea viissisvuohta ballat Hearrás,

gáidat bahás lea ipmárdus.”