Job 30

₁Dál mu boagustit

dat geat leat nuorabut go mun,

olbmát geaid áhčiid mun

in livčče atnán dohkálažžan

sávzabeatnagiiddán gaskii!

₂Sin návccat eai lean

munnje veahkkin,

sis ii lean olmmáivuođa fápmu.

₃Heahti ja nealgi

lea vuoimmehuhttán sin,

sii gáskkildit goikeguolbaniid,

mat ovddežis juo ledje guorba meahcit.

₄Miesttaguorain sii čogget spiinnelasttaid,

gyvelmiestaga ruohttasat sis leat biebmun.

₅Sii áddjojuvvojit eret olbmuid searvvis,

olbmot huiket sin maŋŋái

dego suollagiid maŋŋái.

₆Hirpmus skoaruin sii orrot,

eananbiejuin ja bákteráiggiin.

₇Doppe miestagiid gaskkas

sii bárgot ja čoagganit gáskálasaid vuollái,

₈duot jallat ja gudneheamit

mat ledje áddjojuvvon eatnamis eret.

₉Dál mun lean šaddan sin bilkolávllan,

lean gártan sidjiide sátnevájasin.

₁₀Sii fasttášit mu ja doalahit gaskka,

sii čolget mu muođuid njeaiga.

₁₁Ipmil lea ložžen mu dávgesuona

ja vuolidan mu,

danne sin ii cakka mihkkege

go sii oidnet mu.

₁₂Sin čivggat fallehit mu

ja norddastit julggiid mu vuolde,

sii ráhkadit munnje geainnu oasehisvuhtii.

₁₃Sii boltot mu bálgá vai mun jorralivččen,

iige oktage hehtte sin.

₁₄Sii bohtet

dego govda muvraluoddaneamis,

čievračomaid gaskka sii márret ovdan,

₁₅ja balddáhusat šávvet mu ala.

Sii sihkastit mu gudni eret dego biegga,

mu doaivu jávká balvva láhkái.

₁₆Mun dohppehalan morrašii,

vártnuhisvuohta lea deaividan mu.

₁₇Go idja boahtá, de mus luoddu dávttiid,

eaige mu bákčasat noga.

₁₈Stuorra fámuin Ipmil lea dohppen

mu biktasii,

son lea váldán mu čeabehii

₁₉ja bálkestan mu ráhpái.

Mun lean dego muolda ja gunat.

₂₀Mun čuorvvun du, muhto don it vástit,

mun čuoččun dás,

muhto don it geahča mu beallái.

₂₁Don leat nuppástuvvan

munnje goaves vašálažžan,

don fallehat mu olles fámuinat.

₂₂Don bálkestat mu biggii

ja cuvket mu juma siste.

₂₃Gal mun dieđán

ahte don leat doalvumin mu jápmimii,

dan báikái gosa

buot heakkalaččat čoagganit.

₂₄Dattetge, iigo olmmoš geigeše gieđa,

go buot gahččá čievračopman?

Iigo son čurvvoše veahki lihkuhisvuođastis?

₂₅Munhan lean čirron daid oasi

geain leat leamaš lossa beaivvit,

mun lean moraštan váivvášiid vuorbbi.

₂₆Muhto go mun doivon lihku,

de bođii lihkuhisvuohta,

go mun vurden čuovgga,

de bođii seavdnjadas.

₂₇Mu siskkildas duoldá iige lotkkot,

bahás beaivvit leat deaividan mu.

₂₈Mun váccán moraštemiin

inge oainne beaivváža,

čoakkalmasas mun čuožžilan

ja čuorvvun veahki.

₂₉Mun lean šaddan šakálaid vielljan,

struhccalottit leat mu guoimmit.

₃₀Mu liiki čáhpoda ja latnjá,

mu gorut buollá báhkkadávddas.

₃₁Mu lyra šuokŋa lea rievdan

váidalussan,

mu njurgganasa čuodjan

gullo čierrunjietnan.