Job 36

₂Vuordil veaháš, de mun oahpahan du,

mus lea ain dadjamuš Ipmila beales.

₃Mun vieččan dihton guhkkin,

mun čájehan ahte mu sivdnideaddji

lea vuoigadis.

₄Dat maid mun dajan, ii leat gielis;

du ovddas čuožžu olmmái

gean diehtu lea ollis.

₅Ipmil lea stuoris,

muhto son ii hilggo ovttage.

Son lea fámolaš ja viissis.

₆Ipmilmeahttuma son ii suova eallit,

muhto veahkeha vártnuheami

oažžut vuoigatvuođa.

₇Son ii jorgal čalmmiid eret

vanhurskásis,

muhto diktá su čohkkát truvnnus

gonagasaid bálddas, agálaš gudnis.

₈Muhto jos muhtun lea čadnojuvvon

láhkkiiguin

ja darvánan lihkuhisvuođa gielaide,

₉de Ipmil muittuha

ahte son lea suddudan čeavllistis.

₁₀Son rahpá su beljiid gullat cuiggodusa

ja gohčču su jorgalit bahás.

₁₁Jos son dalle gullá Ipmila jiena

ja bálvala su,

de son oažžu eallit lihkolažžan

buot beivviidis,

ja illu deavdá su jagiid.

₁₂Muhto jos son ii gula,

de son manná jábmiidáibmui,

son jápmá dáidemeahttunvuođastis.

₁₃Ipmilmeahttumat moaráhuvvet

eaige čuorvvo Ipmilii go son čatná sin.

₁₄Son jápmá nuorran,

su eallin nohká dego fuorrábártniid eallin.

₁₅Vártnuheapmái vártnuhisvuohta

gártá bestojupmin,

áŧestusaiguin Ipmil rahpá su beljiid gullat.

₁₆Don fillehaddet iežat čeavlái.

Don ellet friddjan,

almmá makkárge fuolaid haga,

du beavddi dievva ledje buoiddes herskkot.

₁₇Muhto dál don gillát

bahás olbmuid ráŋggáštusa,

don oaččut maid ánssášat.

₁₈Vaikko leat moaris,

de ale fillehala bilkidit,

ale divtte duolgguid čádjidahttit iežat.

₁₉Sáhttágo du čuorvvas gádjut du

áŧestusas,

vaikko geavahivččet buot fámuidat?

₂₀Ale huovit dan ija goas álbmogat

rohttejuvvojit eret báikkisteaset.

₂₁Várut jorgaleames bahávuođa geidnui,

vaikko liikotge dasa eambbo go

gillámuššii.

₂₂Ipmila váldi lea stuoris.

Gii lea dakkár oahpaheaddji go son?

₂₃Gii sáhttá mearridit

maid son galgá dahkat,

gii sáhttá dadjat sutnje:

“Don dahket boastut!”

₂₄Muitte rámidit su daguid,

daid olbmot leat álo máidnon lávlumiin.

₂₅Buot olbmot leat geahččan

daidda háluin,

vaikko olmmoš geahčadage daid guhkkin.

₂₆Ipmil lea stuorit go mii áddet,

su jagit eai leat lohkamis.

₂₇Son čohkke čáhcegoaikkanasaid,

dat šollet Ipmila ájan,

₂₈balvvain dat golget ja goikot

buot olbmuid ala.

₂₉Gii sáhtášii áddet,

mo balvvat girdet almmis,

gii ipmirdivččii juma

mii boahtá Ipmila ássansajis?

₃₀Son lebbe čuovgga iežas birra,

son gokčá ábi ruohttasiid.

₃₁Nu son biebmá álbmogiid,

nu son addá sidjiide biepmu valjis.

₃₂Son gokčá gieđaidis álddagasaiguin,

son gohčču, ja dat mannet mearrebáikái.

₃₃Su čeargganas almmuha su boahtima,

velá oamitge ávaštit, go son lahkana.