Job 6

₂Vare mu moraš vihkkejuvvošii,

mu lihkuhisvuohta

biddjojuvvošii veavtta ala!

₃Dál dat lea losit go meara sáddot,

danne mun sártnun jurdilkeahttá.

₄Buotveagalačča njuolat

leat deaivan munnje,

daid mirko njammasa mu sillui,

Ipmil diktá balddáhusaidis fallehit mu.

₅Iihan meahcceásen bárggo ruonas gittiin,

vuoksá ii muola go dan ovddas lea fuođar.

₆Muhto gii borašii veahtta biepmu

almmá sálttiid haga,

gii muosáhivččii njivllaurtasa?

₇Maid šattan njiellat, gákkaha váimmu,

dat lea šaddan munnje

lusttuhis borramuššan.

₈Vare mu rohkadus devdošii,

vare Ipmil ollašuhtášii mu doaivaga!

₉ Vare son mieđašii cuvket mu,

loktešii gieđa ja čuohpašii gaskat

mu eallima láiggi!

₁₀Dat livččii dattetge mu jeđđehus

go fieradan garra bákčasiin,

ahte in leat čiehkan dan

maid Bassi lea cealkán.

₁₁Leago mus fápmu

mii attášii munnje doaivvu,

dakkár ulbmil man veagas mun gierddan?

₁₂Leago mu fápmu dego geađggi fápmu,

leago mu rumaš nugo bronsa?

₁₃Almma mus ii leat šat doaivu,

buot mu geainnut leat dahppojuvvon.

₁₄Dat gii beahttá lagamuččas heađis,

lea heaitán ballamis Buotveagalaččas.

₁₅Mu vieljat leat behtolaččat

dego jogaš,

nugo johkaroggi gos čáhci jávká.

₁₆Suddi jiekŋa čáhpodahttá jogaža

ja muohta seahkana dan čáhcái,

₁₇muhto goikkádahkan dat jaskkoda,

báhkkan dan čáhci goiká.

₁₈Karavánat mátkkoštit johkarokkiid,

mannet ávdin meahccái ja duššet.

₁₉Tema karavánat gehččet dan guvlui,

Saba gávpeolbmát bidjet doaivvuset dasa.

₂₀Muhto go sii ollejit dan gáddái,

de sii beahtahallet: Čáhci ii leat.

₂₁Dakkáražžan dii lehpet šaddan munnje;

go dii oinniidet balddáhusa,

de dii balláidet.

₂₂Leango mun dáhtton dis maidege,

leango bivdán din oastit iežan friddjan?

₂₃Leango čurvon:

“Gádjot mu vašálačča válddis,

čovdet mu veahkaválddálačča gieđas!”

₂₄Oahpahehket mu, de mun orun jávohaga,

čilgejehket munnje gokko mun lean čádjidan.

₂₅Lossathan lea gullat duohtavuođa,

muhto man áššis dii áigubehtet

bagadit mu?

₂₆Áigubehtetgo dii bagadit mu das

maid lean cealkán,

dahkat duššin dorvvuhuvvan olbmá sániid?

₂₇Dii vuorbádehpet oarbbes mánáid,

dii gávpalehpet ustibiiddádet.

₂₈Gehččet dal munnje:

Gielistango mun din čalbmehálgui?

₂₉Jurddašehket,

allet divtte vearrivuođa dáhpáhuvvat!

Jurddašehket!

Mun lean dattetge sivaheapme.

₃₀Leago mu njuokčamis vearrivuohta?

Iigo mu guopmi

dovddaše bahávuođa smáhka?