Josua 9

₁Go buot Jordana oarjjabeale, várreeatnama, Šefela ja Stuorrameara gátti gonagasat gitta Libanona rádjái, hetlaččaid, amorlaččaid, kanaanlaččaid, perisselaččaid, hivvelaččaid ja jebuslaččaid gonagasat gulle mii lei dáhpáhuvvan, ₂de sii čoagganedje ja lihtodedje soahtat Josuain ja Israeliin.

₃Go Gibeona ássit gulle maid Josua lei dahkan Jerikoi ja Ajii, ₄de sii meannudedje gávvilit. Sii vuolggahedje mátkái áirasiid geat noađuhedje áseniiddiset čielgái oapmeseahkaid ja opmon, gaikánan ja duokŋaduvvon viidneseahkaid, ₅bidje juolgái duokŋaduvvon oapmegápmagiid ja gárvodedje oapmebiktasiid. Niestin sii válde goikan ja moallanan láibbi. ₆Sii manne Josua lusa Gilgala siidii ja dadje sutnje ja israellaččaide: “Mii boahtit hui gáiddus eatnamis. Dahket dál lihtu minguin!” ₇Muhto israellaččat dadje hivvelaččaide: “Dii dáidibehtet ássat dás min lahka. Mo mii dalle sáhtášeimmet dahkat lihtu dinguin?” ₈Sii dadje Josuai: “Mii leat du bálvaleaddjit.” Josua jearai sis: “Geat dii lehpet ja gos dii boahtibehtet?” ₉Sii vástidedje: “Du bálvaleaddjit leat boahtán gáiddus eatnamis, danin go Hearrá, du Ipmila, namma lea beaggán dohko. Mii leat gullan su nama ja buot maid son dagai Egyptas ₁₀ja buot maid son dagai dan guovtti amorlaččaid gonagassii Jordana nuorttabealde Hešbona gonagassii Sihonii ja Bašana gonagassii Ogii gii ásai Aštarotis. ₁₁Min vuorrasat ja buot min eatnama ássit gohččo min váldit niestti ja vuolgit ohcat din ja dadjat didjiide: ‘Mii leat din bálvaleaddjit. Dahket lihtu minguin!’ ₁₂Dát min láibi lei vel liekkas go válddiimet dan niestin ruovttus dan beaivvi go vulggiimet deike guovlluid. Gehččet man goikkis ja moallanan dat lea dál! ₁₃Dáid viidneseahkaid mii devddiimet ođasnaga. Gehččet man gaikánan dat leat dál! Ja min biktasat ja gápmagat leat gollan guhkes mátkkis.” ₁₄De Israela olbmát máiste sin niestti, muhto eai jearran ráđi Hearrás. ₁₅Josua dagai ráfilihtu singuin ja lohpidii ahte sii ožžot eallit. Álbmoga oaivámuččat nannejedje lihtu váliin.

₁₆Golmma beaivvi geažes das go lihttu lei dahkkojuvvon, de israellaččat gulle ahte gibeonlaččat ledjege sin ránnját ja ásse das lahka. ₁₇Dalle israellaččat vulge johtui ja bohte goalmmát beaivvi sin gávpogiidda mat ledje Gibeon, Kefira, Beerot ja Kirjat-Jearim. ₁₈Muhto israellaččat eai goddán sin, dainna go álbmoga oaivámuččat ledje vurdnon sidjiide dan Hearrá, Israela Ipmila, nammii. Oppa álbmot nimmorii oaivámuččaid vuostá, ₁₉muhto sii vástidedje: “Mii leat vurdnon sidjiide dan Hearrá, Israela Ipmila, nammii. Danin mii eat sáhte duohtadit sin. ₂₀Mii dahkat sidjiide ná: Mii diktit sin eallit, vai moarri ii deaivva midjiide dan váli dihte maid mii leat vurdnon sidjiide.” ₂₁Oaivámuččat mearridedje ahte sii ožžot eallit, muhto sii šaddet bálvalit israellaččaid murrejeaddjin ja čáhceguoddin. Ja álbmot jeagadii oaivámuččaidis.

₂₂Josua rávkkai gibeonlaččaid lusas ja dajai sidjiide: “Manne dii behtiidet min? Diihan dajaidet ahte ássabehtet hui gáidagasas mis, vaikko ássabehtetge dás lahka! ₂₃Lehket garuhuvvon! Ii oktage dis beasa bálvaleames šlávvan, murremis ja guoddimis čázi mu Ipmila vissui.” ₂₄Sii vástidedje Josuai: “Du bálvaleddjiide muitaluvvui ahte Hearrá, du Ipmil, lei gohččon bálvaleaddjis Mosesa addit didjiide oppa dán eatnama ja duššadit buot eatnama ássiid din ovddas. Mii balaimet sakka ahte dii goddibehtet min, ja dan dihte mii dagaimet dán. ₂₅Dál mii leat du gieđas. Daga midjiide nugo du mielas lea riekta ja vuoigat.” ₂₆Josua dagai sidjiide nugo lei dadjan. Son gájui sin israellaččaid gieđas iige suovvan goddit sin, ₂₇muhto mearridii sin dan beaivvi rájes israellaččaid šlávvan murret ja guoddit čázi Hearrá áltára váras. Dat lea sin bargu veláge dan báikkis maid Hearrá lea válljen.