Váidaluslávlagat 5

₁Hearrá, muitte mo midjiide

lea geavvan,

geahča mo mii hiddjiduvvot.

₂Min opmodat lea šaddan

vierrásiid gihtii,

min viesut leat gártan

vierroolbmuid oapmin.

₃Mii leat šaddan áhčihis mánnán,

min eatnit leat šaddan leaskan.

₄Mii fertet oastit min iežamet čázi,

mii šaddat máksit min iežamet muoraid.

₅Min vuortnuheddjiid geasis

lea min niskkis,

mii leat váiban, eat beasa vuoiŋŋastit.

₆Mii geigiimet gieđa Egyptii ja Assyriai

vai oččošeimmet láibbi borrat.

₇Min áhčit suddudedje.

Sii eai leat šat eambbo;

mii gillát ráŋggáštusa.

₈Šlávat ráđđejit min,

ii oktage rohtte min sin gieđas.

₉Heakkaváras mii viežžat láibámet,

miehkki áitá meahcis.

₁₀Min liiki njallá dego láiráomman,

min rumaš buollá nealggis.

₁₁Vuoitit rihpet nissoniin Sionis,

nuorra nieiddain Juda gávpogiin.

₁₂Sii harcejit oaivámuččaid,

vuorrasat eai adnojuvvo maninge.

₁₃Nuorra olbmát fertejit

jorahit millogeđggiid,

bártnážat suoibasaddet

go guddet muorranođiid.

₁₄Vuorrasat eai čoaggan šat portii,

nuorat eai čuojat šat čuojanasaideaset.

₁₅Min váimmu illu lea nohkan,

dánsun lea nuppástuvvan morašin.

₁₆Gudnegierdu lea gahččan min oaivvis.

Vuoi min, mii leat suddudan!

₁₇Dan dihte min váibmu lea buozas,

dan dihte min čalmmit leat sevnnjodan.

₁₈Sionvárri lea šaddan ávdimin,

doppe ruohtadit dál riebanat.

₁₉Hearrá, don ráđđet agálaš áigái,

du truvdnu bissu buolvvas bulvii.

₂₀Manne don leat vajáldahttán min agás,

guođđán min agálaš áigái?

₂₁Máhcat min lusat, Hearrá,

de mii máhccat.

Divtte min beivviid šaddat dakkáražžan

go dat ledje dolin.

₂₂Muhto don leat hilgon min áibbas,

du moarri lea garas.