3. Mosesgirji 21

₁Hearrá sártnui Mosesii:

Cealkke báhpaide, Arona bártniide: Báhppa ii oaččo dahkat iežas buhtismeahttumin nu ahte guoská iežas soga olbmui gii lea jápmán, ₂muđui go dalle go jábmi lea su lagaš fuolki: eadni, áhčči, bárdni, nieida, viellja ₃dahje oabbá gii ii lean leamaš náitalan ja gii lea ássan su luhtte. ₄Muhto son ii oaččo dahkat iežas buhtismeahttumin náitalan nissona dihte gii lea su fuolki.

₅Báhpat eai oaččo ráhket iežaset oaivvi gokkoge, eai čuohppat skávžžáid eaige nádjat mearkkaid iežaset rupmašii. ₆Sii galget leat basuhuvvon Ipmilasaset, eaige sii oaččo dahkat Ipmila nama eahpebassin, dasgo sii guddet ovdan Hearrá dollaoaffariid, Ipmileaset biepmu, ja galget dan dihte leat basit.

₇Báhppa ii oaččo váldit áhkkán fuorránissona iige heahppášuhttojuvvon nissona iige nissona gean boadnjá lea hilgon, dasgo báhppa lea basuhuvvon Ipmilasas. ₈Dii galgabehtet atnit báhpa bassin, danin go son oaffaruššá biepmu din Ipmilii. Son galgá leat dutnje bassi, dasgo mun, Hearrá, guhte basuhan din, lean bassi. ₉Jos báhpa nieida dahká iežas eahpebassin furrošemiin, de son dahká áhčis eahpebassin. Son galgá boldojuvvot.

₁₀Dat báhppa gii lea bajimuš vieljaidis gaskkas, gean oaivvi ala lea golggahuvvon vuoidanolju ja gii lea vihahuvvon báhppan ja oažžu gárvodit bassi biktasiid, ii oaččo diktit vuovttaid heaŋgát luovusin iige oaččo gaikkodit biktasiiddis. ₁₁Son ii oaččo mannat jábmi lusa. Son ii oaččo šaddat buhtismeahttumin ii velá áhčis iige eatnis dihtege. ₁₂Son ii oaččo vuolgit bassibáikkis iige dahkat Ipmilis bassibáikki eahpebassin, dasgo son lea vihahuvvon Ipmilis vuoidanoljjuin. Mun lean Hearrá.

₁₃Áhkkán son galgá váldit eadneviđá nieidda. ₁₄Son ii oaččo váldit áhkkán leaskka, hilgojuvvon ja heahppášuhttojuvvon nissona iige fuorránissona; son oažžu váldit áhkkán dušše eadneviđá nieidda iežas álbmogis, ₁₅amas eahpebasuhit iežas náli álbmogis gaskkas. Mun lean Hearrá guhte basuhan su.

₁₆Hearrá sártnui Mosesii:

₁₇Cealkke Aronii: Du nális ii oktage geas lea liitu, oaččo goassege loaiddastit oaffaruššat biepmu Ipmilii. ₁₈Ii oktage geas lea liitu, oaččo loaiddastit ovdan oaffaruššat, ii oktage čalmmeheapme iige skierbmá, ii oktage gean muođuin lea vihki dahje gean rupmašis lea váili, ₁₉ii oktage gean juolgi dahje giehta lea doddjon, ₂₀ii oktage geas lea guvrečielgi dahje gii lea deagga šattus, ii oktage geas lea dieigi čalmmis dahje durvát dahje ribon dahje vigáiduvvan guolat. ₂₁Báhppa Arona nális ii oktage geas lea liitu, oaččo loaiddastit oaffaruššat Hearrá dollaoaffariid. Jos sus lea liitu, de son ii oaččo loaiddastit oaffaruššat biepmu Ipmilii. ₂₂Son oažžu gal borrat Ipmila biepmu, sihke dan mii lea allabassi ja dan mii lea bassi, ₂₃muhto go sus lea liitu, de son ii oaččo boahtit ovdaloavdaga lusa iige loaiddastit áltára ovdii; muđui son eahpebasuha mu bassibáikki. Mun lean Hearrá guhte basuhan sin.

₂₄Moses sártnui dán Aronii, su bártniide ja buot israellaččaide.