3. Mosesgirji 26

₁Dii ehpet oaččo dahkat alcceseattet eahpeipmiliid. Allet čuohpa eatnamisttádet ipmilgovaid geađgebácciide alletge rohkadala daid, dasgo mun lean Hearrá, din Ipmil. ₂Dii galgabehtet doallat mu sabbahiid ja gudnejahttit mu bassibáikki. Mun lean Hearrá.

₃Jos dii eallibehtet mu lágaid mielde, doahttalehpet mu báhkkomiid ja doallabehtet daid, ₄de mun attán didjiide arvvi rivttes áigái, ja eanan addá šattuidis ja eatnama muorat šaddosiiddiset nu ollu ₅ahte gordneráidnenáigi bistá viidnemuorjerádjama rádjái ja viidnemuorjerádjan bistá gordnegilvima rádjái. Dis lea borramuš ildi galle, ja dii oažžubehtet eallit oadjebassan iežadet eatnamis.

₆Mun attán ráfi din eatnamii, ja dii oažžubehtet vuoiŋŋastit iige oktage suorggat din. Mun duššadan eatnamis boraspiriid, eaige vašálaččat beasa hearjidit din eatnama, ₇muhto dii ádjibehtet sin báhtui ja vuoitibehtet sin. ₈Viđas dis ádjet báhtui čuohtása ja čuođis dis ádjet báhtui logiduháha, ja sii gahččet din miehkkái.

₉Mun jorgalan din beallái ja dagan din šattolažžan ja eatnagin; mun bisuhan lihtton dinguin. ₁₀Dis lea ovddit jagi šaddu borramuššan ođđa šattu láddama rádjái, ja dii šaddabehtet vel bálkestit ovddit jagi šattu ođđasa ovddas.

₁₁Mun ceggen iežan goađi din gaskii inge goassege fasttáš din. ₁₂Mun vádjolan din gaskkas ja lean din Ipmil, ja dii lehpet mu álbmot. ₁₃Mun lean Hearrá, din Ipmil, guhte bukten din Egyptas, vai dii ehpet šat livčče sin šlávvan. Mun dodjen din niskkis geassá ja dikten din vázzit njuolggočilggiid.

₁₄Muhto jos dii ehpet guldal mu ehpetge doala buot dáid báhkkomiid, ₁₅jos hilgubehtet mu mearrádusaid ja fasttášehpet mu gohččumiid nu ahte ehpet doala mu báhkkomiid muhto rihkkubehtet mu lihtu, ₁₆de mun ráŋggáštan din. Mun ozahalan din baldosiiguin, suohtain ja báhkkadávddain mii čáskada din geahčastaga ja vuoimmehuhttá din sielu. Dii gilvibehtet gilvagiiddádet duššás, dasgo din vašálaččat borret daid. ₁₇Mun jorgalan muođuid din vuostá, ja din vašálaččat časket din. Din vašuheaddjit ráđđejit din nu ahte dii báhtarehpet dallege go ii oktage leat doarrideamen din.

₁₈Jos dii ehpet veláge guldal mu, de mun ráŋggáštan din čiežageardásaččat din suttuid dihte. ₁₉Mun doaján din stuorra čeavlli, dagan din almmi garasin dego ruovdi ja din eatnama bronssa láhkásažžan. ₂₀Dii rahčabehtet duššás, go eanan ii atte šattuidis eaige eatnama muorat šaddosiiddiset.

₂₁Jos dii ain vuostálastibehtet mu ehpetge guldal mu, de mun časkkán din čieža geardde garraseappot din suttuid dihte. ₂₂Mun vuolggahan meahcispiriid fallehit din, ja dat dahket din mánáheapmin, duššadit din omiid ja uhcidit din logu, nu ahte geainnut šaddet olbmoheapmin.

₂₃Jos dii ehpet oahpa dán ráŋggáštusasge muhto vuostálastibehtet mu, ₂₄de mun ieš jorgalan din vuostá ja časkkán din čieža geardde garraseappot din suttuid dihte. ₂₅Mun divttán vašálačča fallehit din ja mávssahit dan ahte rihkuidet lihtu, ja jos dii geassádehpet gávpogiiddáseattet, de mun vuolggahan din gaskii rohttudávdda, ja dii addojuvvobehtet vašálaččaid gihtii. ₂₆Mun duššadan din láiberáju, nu ahte logi nissonii okta uvdna lea galle sin vátna láibbiid goikadeapmái. Sii fertejit juohkit láibbiid vihkkemiin, iige oktage gallán dain.

₂₇Jos dii ehpet veláge mieđa guldalit muhto vuostálastibehtet mu, ₂₈de munge jorgalan din vuostá moaris ja ráŋggáštan din čiežageardásaččat din suttuid dihte. ₂₉Dii šaddabehtet borrat bártniideattet ja nieiddaideattet oačči. ₃₀Mun duššadan din oaffarbáikkiid, njeaiddán din suovasáltáriid ja bálkestan din jápma gorudiid mieska eahpeipmilčuolddaideattet ala. Mun fasttášišgoađán din ₃₁ja dagan din gávpogiid čievračopman, duššadan din bassibáikkiid inge beroš din oaffariid soažžudeaddji hájas. ₃₂Mun dagan din eatnama nu ávdimin ahte din vašálaččat geat ásset dohko, hirpmástuvvet. ₃₃Mun biđgen din álbmogiid gaskii ja doarridan din miehkki gieđas. Din eanan šaddá ávdimin ja din gávpogat čievračopman. ₃₄Dalle eanan oažžu ávdimin vuoiŋŋastettiin buhtadusa sabbatjagiin maid dii ehpet addán dasa, dan botta go dii ieža lehpet vašálaččaideattet eatnamis. Dalle din iežadet eanan vuoiŋŋasta ja oažžu buhtadusa sabbatjagiinnis. ₃₅Oppa dan áiggi go eanan lea ávdimin, de dat oažžu doallat sabbaha maid dat ii ožžon doallat dalle go dii ásaidet doppe. ₃₆Daid geat báhcet dis ja ásset vašálaččaid eatnamis, mun dagan nu balešin ahte girdi lastta skoabiheapmige vuodjela sin báhtui. Sii báhtarit dego miehkis ja gahččet, vaikko ii oktage doarrit sin. ₃₇Dego miehkis báhtarettiin sii guosadit guhtet guoimmiset njeaiga, vaikko ii oktage doarrit sin. Dii ehpet biđe vašálaččaineattet, ₃₈muhto jávkabehtet vieris álbmogiid seahká, ja din vašálaččaid eanan njielasta din. ₃₉Dat geat báhcet dis, goarránit vearredaguideaset dihte vašálaččaid eatnamii, ja maiddái áhčiideaset vearredaguid dihte sii goarránit.

₄₀De sii dovddastit iežaset vearredaguid ja áhčiideaset vearredaguid, dan ahte ledje oskkáldasmeahttumat ja nággárat. ₄₁Danin munge vuostálasten sin ja dolvon sin sin vašálaččaid eatnamii. Doppe sin birračuohpakeahtes váibmu vuollána, ja sii soabahit vearredaguideaset, ₄₂ja mun muitán lihtton Jakobiin, Isakiin ja Abrahamiin, ja mun muitán maiddái sin eatnama. ₄₃Muhto eanan ferte vuos guorranit ja leat ávdimin buhtadussan doalakeahtes sabbahiin. Sii ieža šaddet soabahit suttuideaset, danin go sii leat hilgon mu lágaid ja fasttášan mu gohččumiid. ₄₄Muhto vaikko sii leat vašálaččaideaset eatnamis, de mun in dattetge hilggo sin inge fasttáš sin, nu ahte duššadivččen sin ja rihkošin lihtton singuin, dasgo mun lean Hearrá, sin Ipmil. ₄₅Sin dihte mun muitán lihtton sin máddariiguin geaid mun bukten Egyptas álbmogiid oaidnut, vai mun livččen sin Ipmil. Mun lean Hearrá.

₄₆Dát leat dat lihtu mearrádusat, báhkkomat ja lágat maid Hearrá Mosesa bokte ásahii iežas ja israellaččaid gaskii Sinaiváris.