3. Mosesgirji 3

₁Jos soamis buktá searvevuođaoaffarin stuorraoami, jogo vuovssá dahje gusa, de son galgá buktit Hearrá muođuid ovdii varrása dahje njiŋŋelasa mii lea almmá vigi haga, ₂bidjat gieđa oaffarealli oaivvi ala ja njuovvat dan almmustusgoađi uvssa guoras. Báhpat, Arona bártnit, galget riškkuhit vara miehtá áltára. ₃Searvevuođaoaffaris son galgá buktit Hearrái dollaoaffarin leavssusbuiddiid, buot siskilušbuiddiid, ₄goappašiid maninčalmmiid ja buoiddi mii lea daid alde njárččáid guoras, ja stuorit vuoivvasgeaži mii luvvejuvvo oktan maninčalmmiiguin. ₅Arona bártnit galget boaldit dan oktan boaldinoaffariin muoraid alde mat leat buollimin áltára alde. Dat lea dollaoaffar man hádja lea Hearrá miela mielde.

₆Jos soamis dáhttu buktit Hearrái searvevuođaoaffarin sávzza dahje gáicca, juogo varrása dahje njiŋŋelasa, de son galgá buktit oami mii lea almmá vigi haga. ₇Jos son buktá oaffarattáldahkan sávzza, de son galgá buktit dan Hearrá muođuid ovdii, ₈bidjat gieđa dan oaivvi ala ja njuovvat dan almmustusgoađi ovddas. Arona bártnit galget riškkuhit dan vara miehtá áltára. ₉Oamis mii lea buktojuvvon searvevuođaoaffarin, son galgá addit dollaoaffarin Hearrái dan buoiddi, oppa biehčama mii botkejuvvo gátnása ráje, leavssusbuiddiid ja buot siskilušbuiddiid, ₁₀goappašiid maninčalmmiid ja buoiddi mii lea daid alde njárččáid guoras, ja stuorit vuoivvasgeaži mii luvvejuvvo oktan maninčalmmiiguin. ₁₁Báhppa galgá boaldit dáid áltára alde borramuššan, dollaoaffarin Hearrái.

₁₂Jos son dáhttu addit oaffarin gáicca, de son galgá buktit dan Hearrá muođuid ovdii, ₁₃bidjat gieđa dan oaivvi ala ja njuovvat dan almmustusgoađi ovddas, ja Arona bártnit galget riškkuhit dan vara miehtá áltára. ₁₄Son galgá buktit das oaffarattáldahkan, Hearrá dollaoaffarin, leavssusbuiddiid ja buot siskilušbuiddiid, ₁₅goappašiid maninčalmmiid ja buoiddi mii lea daid alde njárččáid guoras, ja stuorit vuoivvasgeaži mii luvvejuvvo oktan maninčalmmiiguin. ₁₆Báhppa galgá boaldit dan áltára alde borramuššan, dollaoaffarin man hádja lea Hearrá miela mielde. Buot buoidi gullá Hearrái. ₁₇Dát lea agálaš láhka buolvvas bulvii, gos dal ásažehpetge: dii ehpet oaččo borrat buoiddi ehpetge vara.