Lukas 13

₁Dan áigge bohte soapmásat ja muitaledje sutnje daid galilealaččaid birra geaid Pilatus lei goddán, nu ahte sin varra lei seahkánan sin oaffarelliid varrii. ₂Jesus celkkii sidjiide: “Gáddibehtetgo ahte dát galilealaččat ledje stuorit suttolaččat go buot eará galilealaččat, danne go sii gillájedje dan? ₃Mun cealkkán didjiide: Eai lean, muhto seammá ládje dii buohkat duššabehtet, jos ehpet jorgal. ₄Naba dat gávccinuppelogis geat sorbmašuvve, go Siloa toardna gahčai sin ala? Gáddibehtetgo ahte sii ledje stuorit suttolaččat go buot eará Jerusalema olbmot? ₅Mun cealkkán didjiide: Eai eisege, muhto seammá ládje dii buohkat duššabehtet, jos ehpet jorgal.”

₆Jesus muitalii vel veardádusa: “Muhtun olbmá viidnegárddis lei šaddamin fiikonmuorra. Son manai ohcat das šaddosiid, muhto ii gávdnan. ₇Dalle son dajai viidnegárdedikšui: ‘Mun lean dál golbma jagi boahtán ohcat šaddosiid dán fiikonmuoras, muhto in leat gávdnan. Njeaidde dan, dathan dušše goarida eatnama.’ ₈Muhto viidnegárdikšu vástidii: ‘Hearrá, divtte dan orrut vel ovtta jagi, de mun beasan goaivut ja duktet eatnama dan birra. ₉Boahtte jagi dat veadjá šaddadit šattuid. Muhto jos ii šaddat, de gohčo dalle njeaidit dan.’”

₁₀Jesus lei sabbahin oahpaheamen olbmuid muhtun synagogas. ₁₁Das lei nisson gean buozalvasvuođa vuoigŋa lei váivvidan gávccinuppelohkái jagi. Su čielgi lei oalát guvrragan, iige son sáhttán njulget čielggi. ₁₂Go Jesus oinnii su, de son rávkkai su lusas ja celkkii: “Nisson, don leat čovdojuvvon iežat buozalvasas.” ₁₃Son bijai gieđaid nissona ala, ja dallánaga nisson njulgii čielggi ja máinnui Ipmila.

₁₄Go synagoga ovdaolmmoš oinnii ahte Jesus buoridii sabbahin, de son moaráskii ja dajai olbmuide geat ledje das: “Vahkus leat guhtta beaivvi barggu várás. Bohtet dalle buoriduvvot, allet sabbahin.” ₁₅Hearrá vástidii: “Dii guoktilaččat! Juohkehaš dis gal čoavdá iežas vuovssá dahje ásena čatnagasas sabbahin ja doalvu dan juhkat. ₁₆Dán Abrahama nieidda Sáhtán lea doallan čatnagasas olles gávccinuppelohkái jagi. Iigo su livčče ožžon čoavdit friddjan sabbahin?” ₁₇Go Jesusa vuostálastit gulle su vástádusa, de sii heahpanedje, muhto olbmot ledje ilus buot ovddolaš daguid dihte maid son dagai.

₁₈De Jesus celkkii: “Man láhkásaš lea Ipmila riika? Manin mun veardidivččen dan? ₁₉Dat lea dego sennetsiepman maid olmmái gilvvii gilvvagárdásis. Dat stuorui ja lei maŋimustá dego muorra, ja almmi lottit ráhkadedje besiid dan ovssiide.”

₂₀Son celkkii vel: “Manin mun veardidivččen Ipmila riikka? ₂₁Dat lea dego suvrradáigi. Go nisson soatkkai dan jáffuide mat ledje golbma gáredievva, de oppa dáigi suvrrui.”

₂₂Jesus vádjolii Jerusalema guvlui. Son manai gávpogis gávpogii ja gilis gillái ja oahpahii olbmuid. ₂₃Muhtun jearai sus: “Hearrá, leatgoson dat hárvát geat bestojuvvojit?” Son celkkii sidjiide:

₂₄“Gilvvohallet vai beassabehtet sisa baskkes uvssas. Mun cealkkán didjiide: Eatnagat vigget beassat sisa muhto eai beasa. ₂₅Boahtá áigi go dáluisit čuožžila ja dahppá uvssa. Go dii dasto čuožžubehtet olgun, goalkkuhehpet uvssa ja dadjabehtet: ‘Hearrá, rabas midjiide!’ de son cealká: ‘Geat dii lehpet? Mun in dovdda din.’ ₂₆Dalle dii dadjabehtet: ‘Mii boraimet ja jugaimet duinna, ja don oahpahit min gáhtain.’ ₂₇Muhto son cealká: ‘Mun in dieđe geat dii lehpet. Mun in dovdda din. Gáidet mu luhtte, buot dii vearredahkkit!’

₂₈Doppe dii čierrubehtet ja gižahehpet bániid, go oaidnibehtet Abrahama ja Isaka ja Jakoba ja buot profehtaid Ipmila riikkas, muhto fuobmábehtet ahte dii ieža lehpet norddastuvvon olggos. ₂₉Olbmot bohtet nuortan ja oarjin ja davvin ja lullin ja boradišgohtet Ipmila riikkas. ₃₀Máŋggat maŋimuččat leat dalle vuosttamuččat, ja máŋggat vuosttamuččat maŋimuččat.”

₃₁Aiddo dalle muhtun farisealaččat bohte dadjat Jesusii: “Vuolgge dáppe, dasgo Herodes áigu goddit du.” ₃₂Muhto son vástidii: “Mannet dadjat dan riebanii: Odne ja ihttin mun áján olbmuin olggos bahás vuoiŋŋaid ja buoridan buhcciid, ja goalmmát beaivvi mun lean geargan. ₃₃Muhto mun ferten vádjolit odne ja ihttin ja vel maŋit beaivvige, dasgo ii heive ahte profehta goddojuvvo eará báikkis go Jerusalemis.

₃₄Jerusalem, Jerusalem! Don gottát profehtaid ja geađgádat daid geat leat du lusa vuolggahuvvon. Man dávjá mun lean dáhtton čohkket du mánáid nugo vuonccis čohkke čivggaid soajáid vuollái! Muhto dii ehpet dáhtton boahtit. ₃₅Geahča, din viessu guđđojuvvo ávdimin. Mun cealkkán didjiide: Dii ehpet oainne mu ovdal go dan beaivvi go dadjabehtet: Buressivdniduvvon lehkos son guhte boahtá Hearrá nammii.”