Lukas 14

₁Muhtin sabbaha Jesus lei farisealaš ráđđehearrá guossin, ja buohkat atne su čalmmis. ₂Dalle su lusa bođii olmmái geas lei čáhcedávda. ₃Jesus jearai láhkadovdiin ja farisealaččain: “Leago lobálaš buoridit sabbahin vai ii?” ₄Muhto sii orro jávohaga. Dalle Jesus guoskkahii olbmá, buoridii su ja luittii su mannat. ₅Ja son celkkii sidjiide: “Maid dii ieža dahkabehtet? Jos soapmása bárdni dahje vuoksá gahččá gáivui, de almma son geassá dan bajás dallánaga, vaikko livččii sabbat?” ₆Sii eai máhttán vástidit dasa maidege.

₇Go Jesus mearkkašii ahte guossit válljejedje beavddis boaššumus sajiid, de son muitalii sidjiide veardádusa:

₈“Go leat bovdejuvvon guossemállásiidda, de ale váldde boaššumus saji. Muhtun eará guossi soaitá leat árvvoleabbo go don, ₉ja guossoheaddji gii lea bovden dudno guktuid, boahtá ja dadjá dutnje: Čáhkke saji dán guossái. Dalle don šattat heahpanemiin mannat uskimus sadjái. ₁₀Muhto go leat bovdejuvvon guossái, de váldde beavddis uskimus saji. Dalle guossoheaddji boahtá ja dadjá dutnje: Ustiban, čohkán boaššubuidda, ja don oaččut gudni buot gussiid oaidnut. ₁₁Gii iežas alida, dat vuoliduvvo, ja gii iežas vuolida, dat aliduvvo.”

₁₂De Jesus celkkii dasa gii lei bovden su: “Go don bovdet gussiid gaskabeaimállásiidda dahje eahkedismállásiidda, de ale bovde ustibiiddát, ale vieljaidat, fulkkiidat alege rikkis siidaguimmiidat, danin go siigis vedjet bovdet du, ja nu don oaččut buot das bálkká. ₁₃Muhto go don lágidat guossemállásiid, de bovde gefiid ja rámbbiid, lápmásiid ja čalmmehemiid. ₁₄De don leat ávdugas, danin go sis ii leat mihkkege addit fas dutnje. Don oaččut bálkká dalle go vanhurskásat čuožžilit jábmiid luhtte.”

₁₅Dalle muhtun guossi gii gulai dán, dajai Jesusii: “Ávdugas dat gii beassá leat mállásiin Ipmila riikkas.”

₁₆Jesus celkkii sutnje:

“Muhtun olmmái lágidii stuorra guossemállásiid ja bovdii eatnagiid. ₁₇Go guossemállásiid áigi bođii, de son vuolggahii bálvaleaddjis cealkit daidda geat ledje bovdejuvvon: Bohtet, dasgo buot lea gárvvis! ₁₈Muhto sii buohkat ripme beasadallat. Muhtun dajai: ‘Mun lean oastán bealddu ja ferten vuolgit dan geahččat, ándagassii go in sáhte boahtit.’ ₁₉Nubbi dajai: ‘Mun lean oastán vihtta vuoksábára ja lean vuolgimin daid geahččalit, ándagassii go in sáhte boahtit.’ ₂₀Goalmmátgis dajai: ‘Mun lean aiddo náitalan, ja danin in sáhte boahtit.’ ₂₁Bálvaleaddji máhcai ja muitalii dán hearrásis. Dalle dáluisit moaráhuvai ja dajai bálvaleaddjásis: ‘Vuolgge hoahpus gávpoga gáhtaide ja luottaide ja buvtte deike gefiid ja rámbbiid, čalmmehemiid ja lápmásiid.’ ₂₂Bálvaleaddji bođii dadjat: ‘Hearrá, mun lean dahkan nugo don gohččot, muhto ain lea sadji.’ ₂₃Dalle hearrá dajai bálvaleaddjásis: ‘Mana máđijaide ja bálgáide ja nágge olbmuid boahtit, vai mu viessu dievvá. ₂₄Mun cealkkán didjiide ahte ii oktage dain geaid mun ledjen bovden, beasa mu guossemállásiidda.’”

₂₅Jesusa mielde vádjoledje ollu olbmot. Son jorggihii ja dajai sidjiide:

₂₆“Jos guhtege boahtá mu lusa iige vašut áhčis ja eatnis, áhkás ja mánáidis, vieljaidis ja oappáidis ja velá iežas heakkage, de son ii sáhte leat mu máhttájeaddji. ₂₇Gii ii guotte ruossas ja vádjol mu maŋis, dat ii sáhte leat mu máhttájeaddji.

₂₈Jos muhtin dis áigu hukset toartna, de almma son vuos čohkána rehkenastit goluid vai oaidná, suitágo son hukset dan gárvvisin. ₂₉Muđui sáhttá geavvat nu ahte son bidjá vuođu, muhto šaddá heaitit barggu gaskan. Dalle buohkat geat dan oidnet, bilkidišgohtet su ja dadjet: ₃₀‘Dát olmmái álggii gal hukset, muhto ii ollašuhttán.’ ₃₁Dahje jos gonagas áigu vuolgit soahtat nuppiin gonagasain, de iigo son vuos čohkán smiehttat sáhttágo son logiduhát olbmáin mannat nuppi vuostá gii boahtá su vuostá guoktelogiduhát olbmáin. ₃₂Jos son ii sáhte dan, de son vuolggaha áirasiid bivdit ráfi go nubbi lea ain guhkkin.

₃₃Dihtet dalle: Ii oktage dis sáhte leat mu máhttájeaddji muđui go luohpá buot das mii sus lea.

₃₄Sálti lea ávkkálaš. Muhto jos sálti veagahuvvá, de mo dat šaddá fas sálttisin? ₃₅Dat ii dohkke ii beldui iige duktan, muhto bálkása.

Geas leat bealjit, dat gullos!”