Lukas 18

₁Jesus muitalii máhttájeddjiide veardádusa, vai beassá oahpahit ahte álelassii galgá rohkadallat iige goassege nuonddahallat:

₂“Muhtun gávpogis lei duopmár gii ii ballan Ipmilis iige beroštan olbmuin. ₃Seammá gávpogis lei leaska gii ovttot ládje bođii duopmára lusa átnut: ‘Veahket mu oažžut iežan vuostálastis dan masa mus lea vuoigatvuohta.’ ₄Guhká duopmár ii dáhtton, muhto maŋážassii son jurddašii: ‘In mun gal bala Ipmilis inge beroš olbmuin, ₅muhto dát leaska vuorjá mu. Mun veahkehan su oažžut dan masa sus lea vuoigatvuohta, muđui son váivvida mu jámas.’”

₆Hearrá celkkii: “Die de gullabehtet maid vearálaš duopmár jurddašii. ₇Diehttelas dalle Ipmil veahkeha olbmuid geaid lea válljen, oažžut vuoigatvuođa, go sii čurvot sutnje ijatbeaivái. Songo ádjánivččii veahkeheames? ₈Mun cealkkán didjiide: Son addá sidjiide vuoigatvuođa ájahalakeahttá. Muhto go Olbmobárdni boahtá, de gávdnágo son oskku eatnama alde?”

₉Jesus muitalii dán veardádusa muhtumiidda geat luhtte iežaset vanhurskkisvuhtii ja badjelgehčče earáid:

₁₀“Guokte olbmá manne tempelii rohkadallat. Nubbi lei farisealaš, nubbi tuollár. ₁₁Farisealaš čuoččui sierranassii ja rohkadalai: ‘Ipmil, mun giittán du go in leat nugo eará olbmot, rievvárat, beahttit, furrošeaddjit inge nugo duot tuollár. ₁₂Mun fástudan guktii vahkus ja attán logádasaid buot das maid oasttán.’ ₁₃Tuollár čuoččui maŋŋeleappos. Son ii arvan velá čalmmiidge bajidit almmi guvlui, muhto čorbmadii rattiidis ja dajai: ‘Ipmil, leage munnje suttolažžii árbmugas!’

₁₄Mun cealkkán didjiide: Tuollár manai ruoktot vanhurskkisin, muhto nubbi ii. Dasgo gii alida iežas, dat vuoliduvvo, muhto gii vuolida iežas, dat aliduvvo.”

₁₅Olbmot bukte maiddái uhca mánážiid Jesusa lusa, vai son guoskkaha daid. Go máhttájeaddjit dan oidne, de sii šiggugohte buktiid, ₁₆muhto Jesus rávkkai mánáid lusas ja celkkii: “Diktet mánáid boahtit mu lusa, allet hehtte sin, dasgo Ipmila riika gullá dakkáraččaide. ₁₇Duođaid, mun cealkkán didjiide: Gii ii váldde Ipmila riikka vuostá nugo mánná, dat ii eisege beasa dohko.”

₁₈Muhtun oaivámuš jearai Jesusis: “Buorre oahpaheaddji, maid mun galggan dahkat vai árben agálaš eallima?” ₁₉Jesus vástidii: “Manne don gohčodat mu buorrin? Ii oktage leat buorre earret Ipmila. ₂₀Don dovddat báhkkomiid: Don it oaččo rihkkut náittosdili, don it oaččo goddit, don it oaččo suoládit, don it oaččo cealkit vearreduođaštusa, gudnejahte áhčát ja eatnát.” ₂₁Olmmái dajai: “Buot dáid mun lean doallan gitta nuorravuođa rájes.” ₂₂Go Jesus dan gulai, de son celkkii: “Okta dus vel váilu: Vuovdde buot mii dus lea, ja atte gefiide, de dus lea dávvir almmis. Boađe dasto ja čuovo mu!” ₂₃Go olmmái dan gulai, de son šattai morrašii, danne go son lei hui rikkis.

₂₄Go Jesus dan oinnii, de son celkkii: “Man váttis lea daidda geain lea ollu opmodat, beassat Ipmila riikii! ₂₅Álkit lea kamelii mannat nállošalmmi čađa go riggái beassat Ipmila riikii.” ₂₆Dat geat ledje das gullamin, jerre: “Gii dalle sáhttá bestojuvvot?” ₂₇Jesus vástidii: “Dat mii olbmui lea veadjemeahttun, lea vejolaš Ipmilii.”

₂₈Peter dajai: “Mii leat guođđán visot mii mis lei, ja čuvvon du.” ₂₉Jesus celkkii sidjiide: “Duođaid, mun cealkkán didjiide: Juohkehaš gii Ipmila riikka dihte lea guođđán viesus, áhkás dahje vieljaidis, vánhemiiddis dahje mánáidis, ₃₀oažžu máŋggageardásaččat ruoktot juo dáppe dán áiggis, ja boahtti máilmmis agálaš eallima.”

₃₁Jesus rávkkai lusas guoktenuppelohkái máhttájeaddjis ja celkkii sidjiide: “Geahča, mii mannat bajás Jerusalemii. Doppe ollašuvvá buot maid profehtat leat čállán Olbmobártni birra. ₃₂Son addojuvvo báhkiniid gihtii, sii bilkidit ja givssidit ja čolget su, ₃₃ja sii spihččejit su ja goddet su. Muhto goalmmát beaivvi son čuožžila jábmiid luhtte.” ₃₄Máhttájeaddjit eai ádden Jesusa sániin maidege. Ášši lei sis čihkkojuvvon, eaige sii ipmirdan maid Jesus oaivvildii.

₃₅Go Jesus lahkanii Jerikoi, de geaidnoguoras čohkkái gearjideamen čalmmehis olmmái. ₃₆Go son gulai ollu olbmuid mannamin das meattá, de son jearai mii dat lei. ₃₇Olbmot muitaledje ahte nasaretlaš Jesus lea mannamin dakko meattá. ₃₈Dalle olmmái čuorvvui: “Jesus, Davida bárdni, árpmit mu!” ₃₉Dat geat vázze ovddemus, gohčo su jávohuvvat, muhto son čuorvvui vel jitnoseappot: “Davida bárdni, árpmit mu!” ₄₀Jesus orustii ja gohčui láidet su lusas. Go olmmái bođii, de Jesus jearai sus: ₄₁“Maid don dáhtut mu dahkat alccesat?” Son vástidii: “Hearrá, atte munnje fas oainnu.” ₄₂Dalle Jesus celkkii sutnje: “Šatta oaidnin! Du osku lea beastán du.” ₄₃Dallánaga olmmái oaidnigođii, ja son čuovvulii Jesusa ja máinnui Ipmila. Ja buohkat geat dan oidne, giite ja máidno Ipmila.