Lukas 23

₁Sii buohkat vulge das searválagaid, dolvo Jesusa Pilatusa ovdii ₂ ja ripme guoddalit su. Sii dadje: “Mii leat gávnnahan ahte dát olmmái fille min álbmoga, gieldá máksimis vearuid keaisárii ja lohká leat Messias, gonagas.” ₃Pilatus jearai Jesusis: “Leatgo don juvddálaččaid gonagas?” Jesus vástidii: “Ieš don dan dajat.” ₄Pilatus dajai bajimusbáhpaide ja olbmuide: “Mun in gávnnat dán olbmá sivalažžan masage.” ₅Muhto sii nággejedje: “Son moivašuhttá oahpahusainis olbmuid miehtá Judea. Son álggahii Galileas ja lea boahtán gitta deike.”

₆Go Pilatus dan gulai, de son jearai, leigo olmmái galilealaš. ₇Go son oaččui diehtit ahte Jesus lei Herodesa ráđđenguovllu olmmoš, de son vuolggahii su Herodesa lusa, danin go maiddái Herodes lei Jerusalemis daid beivviid.

₈Herodes illosii sakka go oinnii Jesusa, dasgo son lei gullan su birra ja lei guhká hálidan oaidnit su. Son doaivvui beassat oaidnit Jesusa dahkamin mearkka. ₉Son jearahii sus ollu, muhto Jesus ii vástidan sutnje maidege. ₁₀Bajimusbáhpat ja čáloahppavaččat geat ledje das, sivahalle Jesusa garrasit. ₁₁De Herodes ja su soalddáhat hiddjidišgohte Jesusa. Bilkidemiin sii gárvvuhedje sutnje čáppa oalgebiktasa, ja dasto Herodes vuolggahii su ruoktot Pilatusa lusa. ₁₂Dan beaivvi Herodes ja Pilatus šattaiga ustibažžan; ovdal soai leigga leamaš bahážat.

₁₃Pilatus rávkkai čoahkkái bajimusbáhpaid, ráđđelahtuid ja álbmoga ₁₄ja celkkii sidjiide: “Dii buvttiidet dán olbmá mu ovdii ja nággiidet ahte son lea olbmuid fillejeaddji. Mun lean dál dutkan su din gullut inge leat gávnnahan su sivalažžan masage mas dii sivahallabehtet su. ₁₅Ii Herodesge, danne go son vuolggahii olbmá ruoktot min ovdii. Ii son leat dahkan maidege mas ánssášivččii jápminduomu. ₁₆Mun luoittán su luovus, go vuos lean spihččehan su.” ₁₇Son oainnat fertii álo basiid áigge luoitit sidjiide luovus muhtin fáŋgga.

₁₈Dalle buohkat čurvo: “Doalvvo su eret! Luoitte Barabbasa luovos!” ₁₉Barabbas lei biddjojuvvon giddagassii stuimmi ja olmmošgoddima geažil. ₂₀Pilatus sárdnugođii fas, danin go son dáhtui luoitit Jesusa luovus. ₂₁Muhto sii čurvo ovtta njálbmái: “Russiinávle, russiinávle!” ₂₂Pilatus dajai sidjiide goalmmát geardde: “Maid baháid son lea dahkan? In mun leat gávnnahan su sivalažžan masage mas ánssášivččii jápmima. Mun spihččehan su, ja de mun luoittán su luovus.” ₂₃Muhto stuorra čuorvumiin olbmot gáibidedje ahte Jesus galggai russiinávlejuvvot, ja sin čuorvun vuoitigođii. ₂₄Pilatus mearridii maŋimustá guorrasit sin gáibádussii. ₂₅Son luittii luovus olbmá gean sii dáhtto – olbmá gii lei biddjojuvvon giddagassii stuimmi ja olmmošgoddima geažil – muhto Jesusa son guđii sin háldui.

₂₆De soalddáhat doalvugohte Jesusa. Mátkkis sii bissehedje Simon-nammasaš kyrenelaš olbmá gii lei boahtimin gávpogii, ja bidje su guoddit ruossa Jesusa maŋis.

₂₇Ollu olbmot bohte maŋis, maiddái máŋga nissona geat árkkálmastaledje ja čirro Jesusa. ₂₈Jesus jorggihii sin guvlui ja celkkii: “Allet mu čiero, Jerusalema nieiddat, čirrot baicca iežadet ja mánáideattet. ₂₉Boahtá áigi goas daddjojuvvo: Ávdugasat leat sahkuheamit, ávdugasat dat goaŧut mat eai leat riegádahttán, ja dat čiččit mat eai leat njamahan. ₃₀Dalle olbmot dadjet váriide: Gahččet min ala, ja dieváide: Gokčet min. ₃₁Jos dát dahkkojuvvo ruonas murrii, mii dalle šaddá dahkkojuvvot ástan murrii?”

₃₂Oktanaga Jesusiin dolvojuvvojedje steavliduvvot guokte eará olbmá, guokte vearredahkki. ₃₃Go sii bohte báikái mii gohčoduvvo Oaiveskálžun, de sii russiinávlejedje Jesusa ja vearredahkkiid, nuppi su olgeš, nuppigis su gurut beallái. ₃₄Muhto Jesus celkkii: “Áhčážan, atte sidjiide ándagassii. Sii eai dieđe maid sii dahket.” Soalddáhat juogadedje gaskaneaset Jesusa biktasiid vuorbádallamiin.

₃₅Olbmot čužžo geahčadeamen. Muhtun ráđđeolbmátge ledje das hiddjideamen Jesusa. Sii dadje: “Earrásiid son gal lea beastán – bestos dal iežas, jos juo lea Messias gean Ipmil lea válljen.” ₃₆Soalddáhatge bilkidedje su. Sii bohte su lusa, geigejedje sutnje ettetviinni ₃₇ja dadje: “Jos don leat juvddálaččaid gonagas, de beastte iežat.” ₃₈Su bajil lei maid čála: “Dát lea juvddálaččaid gonagas.”

₃₉Nubbi dain vearredahkkiin geat heaŋgáiga ruossas, bilkidii su ja dajai: “Almma don leat Messias? Beastte dalle iežat ja munno!” ₄₀Muhto nubbi cuiggodii su: “Itgo donge bala Ipmilis, vaikko gillát seammá ráŋggáštusa? ₄₁Moai gal letne ánssášan dupmome, moai ráŋggáštuvvojetne daguideame mielde, muhto dát olmmái ii leat dahkan maidege baháid.” ₄₂Ja son dajai: “Jesus, muitte mu, go boađát riikasat.” ₄₃Jesus vástidii: “Duođaid, mun cealkkán dutnje: Odne juo don leat muinna paradisas.”

₄₄Lei juo guđát diibmu. Dalle, beaiveguovdil, šattai seavdnjatvuohta oppa eatnama miehtá, ja dat bisttii gitta ovccát diimmu rádjái. ₄₅Tempela ovdaloavdda gaikánii guovdat. ₄₆Ja Jesus čuorvvui alla jienain: “Áhčážan, du gieđaide mun oskkildan vuoigŋan.” Go son lei cealkán dan, de son attii vuoiŋŋas.

₄₇Go čuohtásaoaivámuš oinnii mii dáhpáhuvai, de son rámidii Ipmila ja dajai: “Duođaid, dát olmmái lei vuoiggalaš.” ₄₈Ja buohkat geat ledje čoagganan geahččat, čorbme rattiset go oidne dán ja máhcce gávpogii. ₄₉ Jesusa oahppásat čužžo guhkkeleappos ja oidne mii dáhpáhuvai. Sin searvvis ledje maiddái dat nissonat geat ledje boahtán su mielde Galileas.

₅₀Lei muhtun ráđđelahttu gean namma lei Josef. Son lei buorre ja vanhurskkis olmmái, ₅₁iige lean mieđihan dasa maid earát ledje mearridan ja dahkan. Son lei eret Arimateas, Judea gávpogis, ja son vurddii Ipmila riikka. ₅₂Son manai Pilatusa lusa ja ánui Jesusa rupmaša. ₅₃Son válddii dan vuolás ruossas, giesai liinni sisa ja bijai báktehávdái masa ii oktage lean velá hávdáduvvon. ₅₄Lei ráhkkananbeaivi, ja sabbat lei aiddo álgimin.

₅₅Nissonat geat ledje boahtán Jesusiin Galileas, vulge Josefa mielde. Sii oidne mo Jesusa rumaš biddjojuvvui hávdái. ₅₆Go sii ledje máhccan gávpogii, de sii gárvvistedje njálggahájat urtasiid ja vuoidasiid, muhto sabbaha sii orro vuoiŋŋastemiin lága gohččuma mielde.