Lukas 4

₁Go Jesus vulggii Jordanis, de su dievva lei Bassi Vuoigŋa. Vuoigŋa jođihii su meahcis njealljelogi beaivvi, ₂ja beargalat geahččalii su. Daid beivviid son ii borran maidege, ja go dat ledje vássán, de son nealggui. ₃Dalle beargalat dajai sutnje: “Jos don leat Ipmila bárdni, de gohčo dán geađggi šaddat láibin.” ₄Jesus vástidii: “Lea čállojuvvon: Olmmoš ii eale dušše láibbis.”

₅Beargalat doalvvui Jesusa alla báikái, čájehii sutnje čalbmeravkaleames buot máilmmi riikkaid ₆ja dajai sutnje: “Buot dán válddi ja hearvásvuođa mun attán dutnje, danne go dat lea addojuvvon mu háldui, ja mun sáhtán addit dan geasa dáhtun. ₇Jos don rohkadalat mu, de buot dát lea du.” ₈Jesus vástidii: “Lea čállojuvvon: Rohkadala Hearrá, Ipmilat, ja bálval aivvestassii su.”

₉Beargalat doalvvui su Jerusalemii, bijai su tempelmuvrra hárjji ala ja dajai: “Jos don leat Ipmila bárdni, de bálkestahte dás vuolás. ₁₀Dasgo lea čállojuvvon: Son gohčču eŋgeliiddis várjalit du. ₁₁Sii guddet du gieđaideasetguin, amat norddastit juolggi geađgái.” ₁₂Jesus vástidii: “Lea maiddái celkojuvvon: Ale geahččal Hearrá, Ipmilat.” ₁₃Go beargalat lei geargan geahččaleames Jesusa juohke láhkái, de son gáiddai su luhtte muhtun áigái.

₁₄ Vuoiŋŋa fámus Jesus máhcai Galileai, ja su beaggin viidánii miehtá dan guovllu. ₁₅Son oahpahii olbmuid synagogain, ja buohkat rámidedje su.

₁₆Son bođii Nasaretii gos lei šaddan ollesolmmožin, ja manai sabbahin synagogai nugo lávii. Son čuožžilii lohkat, ₁₇ja sutnje geigejuvvui profehta Jesaja girji. Son rabastii girjegearu ja gávnnai dan báikki masa lea čállojuvvon: ₁₈Hearrá Vuoigŋa lea mu badjelis, dasgo son lea vuoidan mu sárdnidit illusága váivvášiidda. Son lea vuolggahan mu gulahit friddjavuođa fáŋggaide ja oainnu čalmmehemiide, friddjan dahkat sordojuvvon olbmuid ₁₉ja sárdnidit Hearrá árpmu jagi. ₂₀Son giesai girjegearu, geigii dan bálvaleaddjái ja čohkánii. Buohkat geat ledje synagogas, gehčče sutnje. ₂₁Son sárdnugođii sidjiide ná: “Odne, din gullut, dát čálabáiki lea ollašuvvan.” ₂₂Buohkat rámidedje su ja ovddošedje daid árpmusániid mat bohte su njálmmis.

Sii goit dadje: “Almma dát lea Josefa bárdni?” ₂₃Jesus celkkii sidjiide: “Dii áigubehtet vissásit cealkit munnje sátnevádjasa ‘Dálkkasteaddji, dálkkot iežat!’ ja dadjat: ‘Daga dáppenai, iežat ruovttugávpogis, buot dan maid beakkát dahkan Kapernaumis.’” ₂₄Ja son celkkii: “Duođaid, mun cealkkán didjiide: Ii oktage adnojuvvo profehtan iežas ruovttugávpogis. ₂₅Mun cealkkán didjiide duođa: Israelis ledje Elia áigge ollu leaskkat dalle go albmi ii addán arvvi golmma jahkái ja guđa mánnui ja garra nealgi šattai oppa eatnamii. ₂₆Dattetge Elia ii vuolggahuvvon sin lusa, muhto muhtin leaskka lusa Sidona eatnama Sareptai. ₂₇Ja ollu spihtálaččat ledje Israelis profehta Eliša áigge, dattetge ii oktage sis buhtistuvvon, muhto dušše syrialaš Naaman.” ₂₈Buohkat geat ledje synagogas, moaráhuvve go gulle dan. ₂₉Sii čuožžiledje, ádje Jesusa olggos gávpogis ja dolvo su ceakkobávtti ravdii, vai besset hoigadit su das vuolás; gávpot lei oainnat huksejuvvon várrái. ₃₀Muhto Jesus manai gaskal sin ja vulggii.

₃₁Jesus manai dasto Kapernauma gávpogii mii lea Galileas. Doppe son oahpahii olbmuid sabbahin. ₃₂Su oahpahus hirpmástuhtii olbmuid, danne go su sániin lei váldi.

₃₃Synagogas lei olmmái geas lei buhtismeahttun vuoigŋa. Dat čuorvvui alla jienain: ₃₄“Mii dus lea minguin dahkamuššan, nasaretlaš Jesus? Leatgo don boahtán duššadit min? Mun dieđán gii don leat, Ipmila bassi!” ₃₅Muhto Jesus šikkui vuoiŋŋa ja celkkii: “Jávohuva! Vuolgge sus olggos.” Dalle bahás vuoigŋa bálkestii olbmá sin gaskii ja vulggii sus olggos iige dahkan sutnje maidege vahágiid. ₃₆Buohkat suorganedje ja sárdno guhtet guimmiineaset: “Miison dát lea? Son gohčču buhtismeahttun vuoiŋŋaid válddiin ja fámuin, ja dat vulget olggos.” ₃₇Ja Jesusa beaggin viidánii miehtá dan guovllu.

₃₈Jesus vulggii synagogas ja manai Simona vissui. Simona vuoni lei garra čoaskindávddas, ja sii átno Jesusa veahkehit su. ₃₉Jesus manai su lusa ja šikkui dávdda, ja dat luittii su. Dallánaga nisson čuožžilii ja bálvališgođii sin.

₄₀Go beaivváš lei luoitádeamen, de Jesusa lusa buktojuvvojedje buohccit geat buhce máŋggalágán dávddaid. Son bijai gieđaid iešguđege ala ja buoridii sin. ₄₁Eatnagiin vulge olggos maiddái bahás vuoiŋŋat mat čurvo: “Don leat Ipmila Bárdni!” Muhto Jesus šikkui daid iige suovvan daid sárdnut, danne go dat dihte ahte son lei Messias.

₄₂Go beaivi lei šaddan, de Jesus vulggii ja manai báikái gos sáhtii leat okto. Olbmot ohcagohte su, ja go sii gávdne su, de sii geahččaledje hehttet su vuolgimis iežaset luhtte. ₄₃Muhto Jesus celkkii: “Mun ferten sárdnidit Ipmila riikka illusága maiddái eará gávpogiin. Dan várás mun lean vuolggahuvvon.” ₄₄Ja son sárdnidii Judea synagogain.