Lukas 7

₁Go Jesus lei sárdnon álbmogii buot dán, de son vulggii Kapernaumii. ₂Muhtun čuohtásaoaivámučča bálvaleaddji lei buohcamin ja lahka jámi. Čuohtásaoaivámuš anii bálvaleaddji stuorra árvvus, ₃ja go son gulai sága Jesusa birra, de son vuolggahii muhtun juvddálaččaid vuorrasiid bivdit ahte Jesus boađášii gádjut bálvaleaddji heakka. ₄Sii bohte Jesusa lusa ja ánuhedje sus duođalaččat: “Dat olmmái ánssáša du veahki. ₅Son ráhkista min álbmoga, ja son lea huksen midjiide synagoga.”

₆Jesus vulggii sin fárrui. Muhto go son lei juo lahka viesu, de čuohtásaoaivámuš vuolggahii muhtumiid iežas ustibiin dadjat Jesusii: “Hearrá, ale váivvit iežat. Mun in leat dan veara ahte don boađát mu dáhki vuollái. ₇Danne mun in arvange ieš boahtit du lusa. Muhto cealkke dušše sáni, de mu bálvaleaddji buorrána. ₈Mun maiddái doahttalan earáid gohččumiid ja gohčun iežan soalddáhiid. Jos mun dajan soalddáhii: ‘Mana’, de son manná, dahje nubbái: ‘Boađe’, de son boahtá, dahje bálvaleaddjásan: ‘Daga dán’, de son dahká dan.” ₉Jesus ovddošii dáid sániid, ja son jorggihii ja celkkii jovkui mii čuovui su: “Mun cealkkán didjiide: Ná stuorra oskku mun in leat gávdnan velá israellaččaid gaskkasge.” ₁₀Ja go olbmát geat ledje vuolggahuvvon Jesusa ovddal, bohte ruoktot vissui, de sii gávdne bálvaleaddji dearvvašin.

₁₁Das maŋŋil Jesus vulggii muhtun gávpogii man namma lea Nain, ja eatnagat su máhttájeddjiin ja ollu olbmot vulge su mielde. ₁₂Go son lahkanii gávpotportii, de doppe gudde olggos jábmi, leaskanissona áidna bártni, ja ollu gávpoga olbmot ledje etniin mieđušteamen su. ₁₃Go Hearrá oinnii leaskka, de son árkkášii su njuorrasit ja celkkii: “Ale čiero!” ₁₄Son manai dohko ja guoskkahii guoddinmuoraid. Guoddit orustedje, ja son celkkii: “Nuorra olmmái, mun cealkkán dutnje: Lihka!” ₁₅Dalle jábmi čohkánii ja sárdnugođii, ja Jesus attii su su eadnái. ₁₆Buohkat šadde ballui, rámidedje Ipmila ja dadje: “Stuorra profehta lea čuožžilan min gaskii. Ipmil lea oahppaladdan olbmuidis.” ₁₇Ja Jesusa beaggin viidánii miehtá Judea ja oppa dan biraseatnamii.

₁₈Johannesa máhttájeaddjit muitaledje oahpaheaddjáseaset buot dáid ságaid. Dalle son rávkkai lusas guoktása sis ₁₉ja vuolggahii sudno jearrat Hearrás: “Leatgo don dat gii galgá boahtit, vai šaddatgo mii vuordit muhtun eará?” ₂₀Olbmá guovttos bođiiga Jesusa lusa ja dajaiga: “Johannes gásttašeaddji vuolggahii munno jearrat dus: ‘Leatgo don dat gii galgá boahtit, vai šaddatgo mii vuordit muhtun eará?’” ₂₁Aiddo dalle Jesus lei buoridan olusiid buozalvasaid ja givssiid, ádján olggos bahás vuoiŋŋaid ja addán oainnu máŋgga čalmmeheapmái. ₂₂Son vástidii sudnuide: “Manni muitalit Johannesii maid leahppi oaidnán ja gullan: Čalmmeheamit oidnet ja lápmásat vázzet, spihtálaččat buhtásmuvvet ja bealjeheamit gullet, jábmit čuožžilit bajás ja gefiide sárdniduvvo evangelium.

₂₄Go Johannesa áirasat leigga mannan, de Jesus sárdnugođii olbmuide Johannesa birra: “Maid dii vulggiidet meahccái oaidnit? Skáhčirago mii sojada biekkas? ₂₅Vai maid dii vulggiidet oaidnit? Čábbát gárvodan olbmágo? Dat geat gárvodit hearvás biktasiid ja ellet badjelmearálašvuođas, ásset šloahtain. ₂₆Maid dii vulggiidet oaidnit? Profehtago? Profehta fal, ja mun cealkkán didjiide: Son lea eambbo go profehta. ₂₇Son lea dat gean birra lea čállojuvvon: Mun vuolggahan áirasa du ovdal, son ráhkada dutnje geainnu. ₂₈Mun cealkkán didjiide: Ii oktage gii lea riegádan nissonis, leat stuorit go Johannes, muhto buot uhcimusge Ipmila riikkas lea stuorit go son.

₂₉Buot olbmot geat guldaledje Johannesa, vel tuolláratge, atne Ipmila vuoigatlažžan ja gásttašuvvojedje Johannesa gásttain. ₃₀Muhto farisealaččat ja láhkadovdit eai beroštan Ipmila dáhtus eaige diktán Johannesa gásttašit iežaset.

₃₁Geanin mun veardidan dán buolvva olbmuid? Gean láhkásaččat sii leat? ₃₂Sii leat dego mánát geat čohkkájit šiljus ja čurvot guhtet guoibmáseaset: ‘Mii čuojaheimmet didjiide njurgganasa, muhto dii ehpet dánson, mii lávlluimet didjiide morašlávlagiid, muhto dii ehpet čirron.’ ₃₃Johannes gásttašeaddji lea boahtán, son ii bora láibbi iige juga viinni, ja dii dadjabehtet: ‘Sus lea bahás vuoigŋa.’ ₃₄Olbmobárdni lea boahtán, son borrá ja juhká, ja dii dadjabehtet: ‘Vuoi man borešis ja juhkkis olmmái, tuolláriid ja suttolaččaid ustit!’ ₃₅Muhto Viisodaga dovddastit vuoigadin buot Viisodaga mánát.”

₃₆Muhtun farisealaš bovdii Jesusa iežas ruktui boradit, ja son bođii dohko ja manai beavdái. ₃₇Dan gávpogis lei nisson gii elii suttolaš eallima. Go son gulai ahte Jesus lei farisealačča guossis, de son bođii dohko. Sus lei mielde alabasterbohtal mas lei fiinna vuoiddas. ₃₈Son manai Jesusa duohkái su julggiid gurrii ja čierui. Go su gatnjalat njuoskadedje Jesusa julggiid, de son sihkui daid vuovttaiguin, cummástalai daid ja vuoiddai daid vuoidasiin. ₃₉Farisealaš gii lei bovden Jesusa, oinnii dan ja jurddašii: “Jos dát olmmái livččii profehta, de son dieđášii makkár nisson dat lea gii su guoskkahallá, ahte son lea suttolaš.”

₄₀Dalle Jesus celkkii sutnje: “Simon, mus lea juoga dutnje dadjat.” Farisealaš vástidii: “Daja, oahpaheaddji.” ₄₁Jesus celkkii: “Ledje guokte olbmá. Soai leigga velggolaččat ruhtalonejeaddjái, nubbi vihttačuođi denára, nubbigis vihttalogi. ₄₂Go sudnos ii lean mainna máksit, de ruhtalonejeaddji luittii vealggi sudnuide goappašagaide. Goabbá sudnos dál ráhkista su eambbo?” ₄₃Simon vástidii: “Mu mielas dat geasa son luittii stuorit vealggi.” Jesus celkkii: “Rievttuid don dubmejit.” ₄₄Son jorggihii nissona guvlui ja celkkii Simonii: “Oainnátgo dán nissona? Go mun bohten du vissui, de don it addán munnje čázi mainna bassat julggiid, muhto son njuoskadii gatnjaliiddisguin mu julggiid ja sihkui daid vuovttaiguin. ₄₅Don it addán munnje cummá go mun bohten, muhto son ii leat heaitán cummástallamis mu julggiid dan rájes go bohten. ₄₆Don it vuoidan mu oaivvi oljjuin, muhto son vuoiddai mu julggiid fiinna vuoidasiin. ₄₇Danin mun cealkkán dutnje: Son oaččui ándagassii eatnat suttuidis, danin son čájehii stuorra ráhkisvuođa. Muhto gii oažžu ándagassii uhccán, dat maid ráhkista uhccán.” ₄₈Ja son celkkii nissonii: “Du suttut leat addojuvvon ándagassii.” ₄₉Eará guossit imaštallagohte: “Gii dát lea, gii addá velá suttuidge ándagassii?” ₅₀Muhto Jesus celkkii nissonii: “Du osku lea beastán du. Mana ráfái.”