Matteus 21

₁Go sii lahkanedje Jerusalemii ja bohte Betfagei Oljovári vuollái, de Jesus vuolggahii máhttájeddjiinis guoktása ₂ja celkkii sudnuide: “Manni don gillái mii do oidno. Dallán go joavdabeahtti dohko, de gávdnabeahtti čadnojuvvon ásena ja várssá dan bálddas. Čoavdi daid ja bukti munnje. ₃Jos muhtin dadjá dudnuide juoidá, de daddji ahte Hearrá dárbbaša daid, muhto vuolggaha daid fargga ruoktot.” ₄Dát dáhpáhuvai vai ollašuvvá dat mii lea celkojuvvon profehta bokte: ₅Celket nieida Sionii: Geahča, du gonagas boahtá du lusa! Son lea vuollegaš ja riide áseniin, fievrošibiha várssáin. ₆Máhttájeaddji guovttos vulggiiga ja dagaiga nugo Jesus lei gohččon. ₇Soai buvttiiga ásena ja várssá ja bijaiga daid ala oalgebiktasiiddiska, ja Jesus čohkánii ásena čielgái. ₈Eatnagat lebbo biktasiiddiset geainnu ala, soapmásat čuhppe muorain ovssiid ja gilve daid geainnu ala. ₉Ja olbmot geat vázze su ovddas ja maŋis, čurvo: “Hosianna, Davida bárdni! Buressivdniduvvon lehkos son guhte boahtá Hearrá nammii! Hosianna allagasas!”

₁₀Go son bođii Jerusalemii, de oppa gávpot lihkadišgođii, ja buohkat jerre: “Gii son lea?” ₁₁Olbmot dadje: “Son lea Jesus, profehta Nasaretis Galileas eret.”

₁₂Jesus manai tempelii ja ájii olggos buohkaid geat ledje doppe vuovdimin ja oastimin. Son gomihii ruhtacuvkeheddjiid bevddiid ja duvvávuvdiid beaŋkkaid ₁₃ja celkkii sidjiide: “Lea čállojuvvon: Mu viessu lea rohkadusa viessu. Muhto dii dahkabehtet dan rievvárbiedjun.”

₁₄Jesusa lusa tempelii bohte čalmmeheamit ja lápmásat, ja son buoridii sin. ₁₅Muhto go bajimusbáhpat ja čáloahppavaččat oidne oavdduid maid son dagai, ja gulle mánáid čuorvumin tempelis: “Hosianna, Davida bárdni!” de sii moaráskedje ₁₆ja dadje sutnje: “Gulatgo maid dat dadjet?” Jesus vástidii: “De gulan. Ehpetgo leat goassege lohkan: Uhcahaččaid ja njuoratmánáid čuorvumiid don leat dahkan alccesat máidnumin?”

₁₇De son guđii sin dasa, vulggii gávpoga olggobeallái Betaniai ja idjadii doppe.

₁₈Go Jesus árrat iđedis lei máhccamin gávpogii, de sutnje šattai borranmiella. ₁₉Son oinnii geaidnoguoras fiikonmuora ja manai dan lusa, muhto ii gávdnan das eará go lasttaid. De son celkkii murrii: “It goassege šat šaddat šaddosiid.” Ja fiikonmuorra ásttai dallánaga. ₂₀Go máhttájeaddjit dan oidne, de sii ovddošedje ja jerre: “Mo fiikonmuorra sáhtii ástat nie fáhkka?” ₂₁Jesus vástidii: “Duođaid, mun cealkkán didjiide: Jos dis lea osku ehpetge eahpit, de sáhttibehtet dahkat fiikonmurrii dan maid mun dahken ja vel eambbo. Dii sáhttibehtet dadjat dán várrái: Loktan ja bálkestahte iežat merrii, ja dat dáhpáhuvvá. ₂₂Ja buot maid dii átnubehtet rohkosiinnádet, dan dii oažžubehtet jos oskubehtet.”

₂₃Go Jesus lei boahtán tempelii ja oahpahii doppe, de dohko bohte bajimusbáhpat ja álbmoga vuorrasat. Sii jerre: “Mainna válddiin don dagat dákkáriid? Gii lea addán dutnje dása válddi?” ₂₄Jesus vástidii sidjiide: “Mus maid lea gažaldat didjiide. Jos dii vástidehpet dasa, de mun cealkkán didjiide makkár válddiin mun dagan buot dán. ₂₅Gos Johannesa gásta bođii, almmis vai olbmuin?” Sii árvaledje guhtet guimmiideasetguin: “Jos mii dadjat: ‘Almmis’, de son dadjá: ‘Manne dii dalle ehpet oskon sutnje?’ ₂₆Muhto jos dadjat: ‘Olbmuin’, de mii šaddat váruhit álbmogis, dasgo buohkat atnet Johannesa profehtan.” ₂₇Danne sii vástidedje Jesusii: “Mii eat dieđe.” Dalle Jesus celkkii: “De in munge cealkke didjiide mainna válddiin mun dagan buot dán.”

₂₈“Mo din mielas orru? Muhtun olbmás ledje guokte bártni. Son manai nuppi lusa ja dajai: ‘Bártnážan, mana odne viidnegárdái bargat.’ ₂₉Bárdni vástidii: ‘In mun dáhto’, muhto maŋŋil son goit gáđai ja manai. ₃₀Áhčči manai nuppi bártni lusa ja dajai sutnje seammá láhkái. Bárdni vástidii: ‘Mun manan, áhčážan’, muhto ii mannange. ₃₁Goabbá dán guoktás dagai maid su áhčči dáhtui?” Sii vástidedje: “Ovddit.” Jesus celkkii: “Duođaid, mun cealkkán didjiide: Fuorát ja tuollárat mannet Ipmila riikii ovdal go dii. ₃₂Johannes bođii ja čájehii didjiide vanhurskkisvuođa geainnu, muhto dii ehpet oskon sutnje. Fuorát ja tuollárat gal osko, ja vaikko dii oinniidet dan, de dii ehpet gáhtan maŋŋilge ehpetge oskon sutnje.

₃₃Gullet nuppi veardádusa. Lei dáluisit gii gilvvii viidnegárddi, áiddui dan, rokkai báktái viidnebohčingári ja huksii fáktentoartna. De son láigohii viidnegárddi láigoheddjiide ja fárrii ieš eret eatnamis.

₃₄Go rádjanáigi lahkanišgođii, de son vuolggahii bálvaleddjiidis láigoheddjiid lusa viežžat dan oasi šattus mii gulai sutnje. ₃₅Muhto láigoheaddjit dohppejedje su bálvaleddjiid. Muhtuma sii cábme, muhtuma godde ja muhtumagis geađgádedje. ₃₆Dáluisit vuolggahii eará bálvaleddjiid, eanebuid go vuosttaš geardde, muhto sidjiide geavai seammá láhkái. ₃₇Maŋimustá son vuolggahii láigoheddjiid lusa iežas bártni. Son jurddašii: ‘Mu bártni sii goittot gudnejahttet.’ ₃₈Muhto go láigoheaddjit oidne bártni, de sii dadje guhtet guoibmáseaset: ‘Diet lea árbbolaš. Bohtet, goddot su ja oamastehkot su árbbi.’ ₃₉Sii dohppejedje su, gesse su viidnegárddis olggos ja godde su.

₄₀Go viidnegárddi eaiggát boahtá, de maid son dahká dáidda viidnegárdebargiide?” ₄₁Bajimusbáhpat ja vuorrasat vástidedje: “Son heavaha daid bahás olbmáid bahás láhkái ja láigoha viidnegárddi earáide geat addet sutnje su oasi šattus rivttes áigái.” ₄₂Jesus celkkii sidjiide: “Ehpetgo leat goassege lohkan čállagiin: Geađgi maid huksejeaddjit hilgo, lea šaddan čiehkageađgin. Dát lea Hearrá iežas dahku, ja dat lea ovddolaš min čalmmiin.

₄₃Danne mun cealkkán didjiide ahte Ipmila riika váldojuvvo dis eret ja addojuvvo álbmogii mii šaddada dan šattuid. ₄₄Gii jorrala dán geađgái, dat njuvdása, ja gean ala dát geađgi gahččá, dan dat cuvke.”

₄₅Go bajimusbáhpat ja farisealaččat gulle su veardádusaid, de sii áddejedje ahte son oaivvildii sin. ₄₆Sii livčče dáhtton dohppet su muhto balle álbmogis, danin go dat anii su profehtan.