Matteus 22

₁Jesus sártnui ain veardádusaiguin ja celkkii sidjiide: ₂“Almmiriika lea veardideames gonagassan gii lágidii heajaid bárdnásis. ₃Son vuolggahii bálvaleddjiidis bovdet headjagussiid, muhto bovdejuvvon olbmot eai dáhtton boahtit. ₄De son vuolggahii eará bálvaleddjiid ja gohčui sin cealkit bovdejuvvon gussiide: ‘Mun lean lágidan headjamállásiid, vuovssát ja buoiddes gálbbit leat njuvvojuvvon, ja buot lea gárvvis. Bohtet heajaide!’ ₅Muhtumat bovdejuvvon gussiin eai beroštan das ja manne eret, muhtun beldosis ja muhtun gávpásis. ₆Earrásatgis dohppejedje su bálvaleddjiid, illastedje sin ja časke sin jámas. ₇Dalle gonagas moaráhuvai. Son vuolggahii soahteveagas, gottii sorbmejeddjiid ja buolláhii sin gávpoga. ₈De gonagas dajai bálvaleddjiidasas: Buot lea gárvvis heajaid várás, muhto bovdejuvvon olbmot eai lean dohkálaččat daidda. ₉Mannet dál luottaide ja luoddaearuide ja bovdejehket heajaide buohkaid geaid deaivabehtet. ₁₀Bálvaleaddjit manne ja čohkkejedje buohkaid geaid deive, sihke baháid ja buriid, nu ahte guossit ledje headjalanja dievva.

₁₁Muhto go gonagas bođii sisa dearvvahit gussiid, de son oinnii muhtuma geas eai lean headjabiktasat. ₁₂Son jearai: Ustiban, mo don sáhtát leat dáppe almmá headjabiktasiid haga? Muhto olmmái orui jávohaga. ₁₃Dalle gonagas celkkii bálvaleddjiidasas: Čatnet su gieđaid ja julggiid ja bálkestehket su olggos seavdnjadassii. Doppe čirrot ja gižahit bániid. ₁₄Eatnagat leat bovdejuvvon, muhto hárvásat leat válljejuvvon.”

₁₅Dalle farisealaččat manne ráđđádallat mo giellat Jesusa sániiguin. ₁₆Sii vuolggahedje su lusa máhttájeddjiideaset oktan Herodesa doarjaleddjiiguin, ja sii dadje: “Oahpaheaddji, mii diehtit ahte don leat vuoiggalaš ja oahpahat Ipmila geainnu duohtavuođa mielde. Don it beroš das maid olbmot oaivvildit itge geahča olbmo hápmái. ₁₇Daja dasto midjiide maid don oaivvildat: Leago riekta máksit vearu keaisárii vai ii?” ₁₈Muhto Jesus fuomášii sin bahás áigumuša ja celkkii: “Dii guoktilaččat! Manin dii geahččalehpet mu? ₁₉Čájehehket munnje ruđa mainna vearru máksojuvvo.” Sii čájehedje denára, ₂₀ja Jesus jearai: “Gean govva ja namma dies lea?” ₂₁Sii vástidedje: “Keaisára.” Dalle Jesus celkkii sidjiide: “Addet dalle keaisárii dan mii gullá keaisárii ja Ipmilii dan mii gullá Ipmilii.” ₂₂Go sii dan gulle, de sii ovddošedje. Sii dikte su orrut ja manne eret.

₂₃Seammá beaivvi bohte su lusa muhtun saddukealaččat geat dadjet ahte bajásčuožžileapmi ii leat. Sii jerre sus: ₂₄“Oahpaheaddji, Moses lea cealkán: Jos olmmái jápmá mánáheapmin, de su viellja galgá váldit leaskka áhkkán ja addit vielljasis náli. ₂₅Min gaskkas ledje čieža vieljaža. Vuosttaš válddii áhká muhto jámii, ja go son lei mánáheapme, de leaska bázii su villjii. ₂₆Seammá ládje geavai nuppi villjii ja maiddái goalmmádii ja gitta čihččeda rádjái. ₂₇Sis maŋimužžan jámii nisson. ₂₈Gean áhkká son lea bajásčuožžileamis? Sonhan lei leamaš sin buohkaid áhkká.”

₂₉Jesus vástidii sidjiide: “Dii čádjidehpet danne go ehpet dovdda čállagiid ehpetge Ipmila fámu. ₃₀Bajásčuožžileamis olbmot eai náital eaige náitojuvvo, muhto sii leat dego eŋgelat almmis. ₃₁Muhto mii boahtá bajásčuožžileapmái – almma dii lehpet lohkan maid Ipmil lea cealkán didjiide: ₃₂Mun lean Abrahama Ipmil ja Isaka Ipmil ja Jakoba Ipmil. Ii son leat jábmiid, muhto ealli olbmuid Ipmil.” ₃₃Go olbmot dan gulle, de sii ovddošedje su oahpahusa.

₃₄Go farisealaččat gulle ahte Jesus lei buđđon saddukealaččain njálmmi, de sii čoahkkanedje. ₃₅Dalle sis muhtun gii lei láhkadovdi, dáhtui geahččalit Jesusa ja jearai: ₃₆“Oahpaheaddji, mii lea lága stuorimus báhkkon?” ₃₇Jesus vástidii: “Ráhkis Hearrá, Ipmilat, oppa váimmus, oppa sielus ja oppa mielas. ₃₈Dát lea stuorimus ja vuosttamuš báhkkon. ₃₉Nubbi seammalágáš lea dát: Ráhkis lagamuččat nugo iežat. ₄₀Dán guovtti báhkkomis orru olles láhka ja profehtat.”

₄₁Go farisealaččat ledje čoagganan, de Jesus jearai sis: ₄₂“Maid dii árvalehpet Messiasa birra? Gean bárdni son lea?” Sii vástidedje: “Davida.” ₄₃Dalle Jesus jearai: “Mo dalle David sáhttá vuoiŋŋas gohčodit su hearrán? Son dadjá: ₄₄Hearrá celkkii mu hearrái: Čohkán mu olgeš beallái, de mun bijan du vašálaččaid du julggiid vuollái.

₄₅Jos dal David gohčoda Messiasa hearrán, de mo son dalle sáhttá leat su bárdni?” ₄₆Ii oktage sáhttán vástidit sutnje, ja dan beaivvi rájes ii oktage duostan šat jearrat sus maidege.