Matteus 26

₁Go Jesus lei geargan sárdnideames, de son celkkii máhttájeddjiidasas: ₂“Dii diehtibehtet ahte guovtti beaivvi geažes leat beassážat. Dalle Olbmobárdni addojuvvo russiinávlejuvvot.” ₃Seammá áigge bajimusbáhpat ja álbmoga vuorrasat čoahkkanedje bajimusbáhppa Kaifasa gárdimii ₄ráđđádallat, mo sáhtášedje juonalašvuođain dohppet Jesusa vai besset goddit su. ₅“Muhto ii fal basiid áigge”, sii dadje, “amaset olbmot stuimmáskit.”

₆Go Jesus lei Betanias spihtálaš Simona viesus, ₇de su lusa bođii nisson geas lei alabasterbohttalis divrras vuoiddas. Go Jesus lei boradeamen, de nisson leikii dan su oaivái. ₈Muhto go máhttájeaddjit dan oidne, de sii atne dan bahán. Sii dadje: “Vuoi makkár skihtardeapmi! ₉Vuoidasa livččii sáhttán vuovdit buori haddái ja ruđaid addit gefiide.”

₁₀Jesus fuobmái dan ja celkkii sidjiide: “Manne dii vuorjabehtet su? Son lea dahkan munnje buori dagu. ₁₁Geafit leat álo din luhtte, muhto mun in leat álo din luhtte. ₁₂Go son vuoiddai mu, de son dagai dan mu hávdádeami várás. ₁₃Duođaid, mun cealkkán didjiide: Oppa máilmmis, gos ihkinassii evangelium sárdniduvvo, doppe sii muitalit maid son dagai ja muitet su.”

₁₄Dalle okta dan guoktenuppelohkásis, gean namma lei Judas Iskariot, manai bajimusbáhpaid lusa ₁₅ja dajai: “Maid addibehtet munnje jos mun attán su din gihtii?” Sii adde sutnje golbmalogi silbaruđa. ₁₆Dan rájes son ozai liibba addit Jesusa sin gihtii.

₁₇Suvrutkeahtes láibbi basiid vuosttaš beaivvi máhttájeaddjit bohte Jesusa lusa ja jerre: “Gosa don dáhtut min ráhkadit alccesat beassášmállásiid?” ₁₈Jesus celkkii: “Mannet gávpogii.” Son neavvui gean lusa sii galge mannat, ja gohčui dadjat sutnje: “Oahpaheaddji cealká: ‘Mu áigi lea lahka. Du luhtte mun boran beassášmállásiid oktan máhttájeddjiidanguin.’” ₁₉Máhttájeaddjit dahke nugo Jesus lei gohččon, ja sii ráhkadedje beassášmállásiid.

₂₀Go eahket lei šaddan, de Jesus manai beavdái dainna guoktenuppelohkásiin. ₂₁Go sii ledje boradeamen, de son celkkii: “Duođaid, mun cealkkán didjiide: Okta dis beahttá mu.” ₂₂Dalle sii šadde morrašii, ja nubbi nuppi maŋis jearragođii sus: “Hearrá, in suige goit mun?” ₂₃Jesus vástidii sidjiide: “Mu beahttá olmmái gii buonjostii gieđa gárrái oktanaga muinna. ₂₄Olbmobárdni vuolgá eret nugo lea čállojuvvon su birra, muhto vuoi dan olbmo gii beahttá Olbmobártni! Dan olbmui livččii buoret go son ii livčče oppa riegádange.” ₂₅Judas, gii behtii su, jearai: “Rabbi, in suige mun goit leat?” Jesus vástidii: “Don dadjet dan ieš.”

₂₆Go sii ledje boradeamen, de Jesus válddii láibbi, giittii, doadjalii, attii dan máhttájeddjiidasas ja celkkii: “Váldet ja borret, dát lea mu rumaš.” ₂₇De son válddii geara, giittii Ipmila, attii sidjiide ja celkkii: “Juhket dás, dii buohkat. ₂₈Dát lea mu varra, lihtu varra mii golggahuvvo eatnagiid ovddas suttuid ándagassii addojupmin. ₂₉Mun cealkkán didjiide: Mun in šat máistte viidnemuora šaddosa ovdal go dan beaivvi go jugan ođđa viinni dinguin Áhččán riikkas.”

₃₀Go sii ledje lávlon máidnunlávlaga, de sii vulge Oljovárrái. ₃₁Dalle Jesus celkkii sidjiide: “Otná ija dii buohkat vearránehpet mus, danne go lea čállojuvvon: Mun časkkán geahčči, ja sávzzat bieđganit. ₃₂Muhto maŋŋil go mun lean čuožžilan jábmiid luhtte, de mun manan din ovdal Galileai.” ₃₃Peter dajai sutnje: “Vaikko buot earát vearránivčče dus, de mun in goassege vearrán.” ₃₄Jesus vástidii: “Duođaid, mun cealkkán dutnje: Otná ija, ovdal go vuoncávaris bišku, don biehttalat mu golmma geardde.” ₃₅Peter dajai: “Vaikko mun galggašin velá jápmit duinna, de mun in eisege biehttal du.” Nu dadje maiddái buot eará máhttájeaddjit.

₃₆De Jesus oktan máhttájeddjiidisguin bođii báikái mii gohčoduvvui Getsemanen, ja celkkii sidjiide: “Čohkánehket dása dan boddii go mun manan duohko rohkadallat.” ₃₇Son válddii mielddis Petera ja Sebedeusa bártni guoktá. Son šaddagođii dal morrašii ja ballui, ₃₈ja son celkkii sidjiide: “Mu siellu lea lossa morrašis gitta jápmima rádjái. Orrot dás ja gohcet munnje guoibmin!” ₃₉Son manai dobbelažžii, luoitádii eatnamii muđolassii ja rohkadalai: “Áhčážan, jos lea vejolaš, de divtte dán geara mannat mu meattá. Allos dattetge šaddo nugo mun dáhtun, muhto nugo don dáhtut.” ₄₀Son máhcai máhttájeddjiid lusa ja gávnnai sin oađđimin, ja son celkkii Peterii: “Ehpet dii veadján gohcit muinna ovttage diimmu. ₄₁Gohcet ja rohkadallet, amadet šaddat geahččalussii. Vuoigŋa gal lea geargat, muhto oažži lea headju.” ₄₂Son manai nuppádassii eret ja rohkadalai: “Áhčážan, jos dát gearra ii sáhte mannat mu meattá, ja mun ferten dan juhkat, de šaddos du dáhttu.”

₄₃Go son máhcai, de son gávnnai sin fas oađđimin, dasgo sin čalmmit ledje lossadat nahkáriin. ₄₄Ohpit son guđii sin dasa, manai fas dobbelažžii ja rohkadalai goalmmát geardde seammá rohkadusa. ₄₅De son bođii máhttájeddjiid lusa ja celkkii: “Aingo dii lehpet oađđimin ja vuoiŋŋasteamen? Boddu lea boahtán. Olbmobárdni addojuvvo suttolaččaid gihtii. ₄₆Lihkket, vulgot! Dat gii beahttá mu, lea juo lahka.”

₄₇Go son lei ain sárdnumin, de bođii Judas, okta dan guoktenuppelohkásis, ja su fárus stuorra joavku mas ledje miehkit ja soappit. Sii bohte bajimusbáhpaid ja álbmoga vuorrasiid luhtte. ₄₈Beahtti lei šiehtadan singuin mearkka: “Dat gean mun cummistan, son dat lea. Dohppejehket su.” ₄₉Son manai dallánaga Jesusa lusa, dajai: “Bures, rabbi!” ja cummistii su. ₅₀Jesus celkkii sutnje: “Ustiban, dál don leat dahkan iežat oasi.” Dalle olbmát bohte lagabui, dohppejedje Jesusa ja válde su fáŋgan.

₅₁Okta dain geat ledje Jesusiin, rohttii miehki, časkkii bajimusbáhpa bálvaleaddji ja čuohpai sus bealji. ₅₂Dalle Jesus celkkii sutnje: “Nahket miehkát dohppii. Gii miehki rohtte, dat miehkkái gahččá. ₅₃Gáttátgo ahte mun in sáhtáše bivdit iežan Áhči vuolggahit dállánaga munnje eambbo go guoktenuppelohkái legiona eŋgeliid? ₅₄Muhto mo dalle ollašuvašedje čállagat mat celket ahte ná ferte dáhpáhuvvat?” ₅₅Seammá bottus son celkkii olmmošjovkui: “Dii lehpet vuolgán mihkiiguin ja soppiiguin váldit mu gitta, dego livččen rievvár. Juohke beaivvi mun čohkkájin tempelis ja oahpahin, ehpetge dii dohppen mu. ₅₆Muhto buot dát lea dáhpáhuvvan vai profehtaid čállagat ollašuvvet.” Dalle buot máhttájeaddjit guđđe su ja báhtaredje.

₅₇Sii geat ledje váldán Jesusa gitta, dolvo su bajimusbáhppa Kaifasa lusa dohko gosa čáloahppavaččat ja vuorrasat ledje čoagganan. ₅₈Peter oavnnjildii su gitta bajimusbáhpa gárdima šilju rádjái. Doppe son čohkánii bálvaleddjiid gaskii vai beassá oaidnit mo loahpas geavvá.

₅₉Bajimusbáhpat ja oppa ráđđi oččodedje vearreduođaštusa Jesusa vuostá, vai besset dubmet su jápmimii, ₆₀muhto eai gávdnan, vaikko eatnat vearreduođašteaddjit bohte ovdan. Maŋimustá bohte ovdan guokte olbmá ₆₁geat dajaiga: “Dát olmmoš lea dadjan: Mun sáhtán gaikut Ipmila tempela eatnamii ja hukset dan fas golmma beaivvis.” ₆₂Dalle bajimusbáhppa čuožžilii ja jearai: “Iigo dus leat mihkkege dadjamušaid sudno sivahallamiidda?” ₆₃Muhto Jesus orui jávohaga. Bajimusbáhppa dajai: “Ealli Ipmila bokte mun vuortnuhan du cealkit midjiide, leatgo don Messias, Ipmila bárdni.” ₆₄Jesus vástidii: “Don dadjet dan ieš. Ja mun cealkkán didjiide: Dás maŋás dii beassabehtet oaidnit Olbmobártni čohkkámin Fámu olgeš bealde ja boahtimin almmi balvvaid alde.” ₆₅Dalle bajimusbáhppa gaikkodii biktasiiddis ja dajai: “Son lea bilkidan Ipmila. Maid mii dárbbašit velá eambbo duođašteddjiid? Dii lehpet gullan bilkádusa. ₆₆Maid árvalehpet?” Sii vástidedje: “Son lea sivalaš jápmit.” ₆₇De sii čolge su muođuid njeaiga ja čorbme su. Muhtumat spežžo su muođuide ₆₈ja dadje: “Profehtastala, Messias, daja gii du čorpmai!”

₆₉Peter čohkkái olgun šiljus. Su lusa bođii biigá ja dajai: “Don maid ledjet Jesusiin, dainna galilealaččain.” ₇₀Muhto Peter biehttalii buohkaid gullut ja dajai: “Mun in ipmir maid don sártnut.” ₇₁Go son manai poartalatnjii, de eará biigá oinnii su ja dajai daidda geat ledje das čuožžumin: “Dát olmmái lei maiddái nasaretlaš Jesusiin.” ₇₂Peter fas biehttalii ja vuortnui: “Mun in dovdda dien olbmo.” ₇₃Maŋŋelaš bohte sii geat ledje čuožžumin das, Petera lusa ja dadje: “Don leat vissásii okta sis, dan gullá du suopmanis.” ₇₄Dalle Peter riemai garrudit ja vuordnut: “Mun in dovdda dien olbmá.” Dan seammás vuoncávaris biškkádii. ₇₅Dalle Peter muitái maid Jesus lei cealkán sutnje: “Ovdal go vuoncávaris biškkáda, de don biehttalat mu golmma geardde.” Son manai olggos ja čierui bahččagit.