Matteus 28

₁Go sabbat lei vássán ja vahku vuosttaš beaivi čuvggodišgođii, de bođiiga Maria Magdalena ja dat nubbi Maria geahččat hávddi. ₂Fáhkka šattai garra eanandoarggástus, dasgo Hearrá eŋgel njiejai almmis. Son bođii hávddi lusa, fierahii geađggi eret ja čohkánii dan ala. ₃Son lei oaidnit dego álddagas, ja su biktasat ledje vielgadat dego muohta. ₄Fávttat ballájedje sus nu ahte doarggistišgohte ja šadde dego livčče jápmán. ₅Muhto eŋgel celkkii nissoniidda: “Alli bala! Mun dieđán ahte doai ohcabeahtti Jesusa, guhte russiinávlejuvvui. ₆Ii son leat dás, son lea čuožžilan jábmiid luhtte nugo son ieš dajai. Boahtti geahččat, dá lea sadji gokko son veallái. ₇Vuolgi hoahpus muitalit su máhttájeddjiide: ‘Son lea bajásčuožžilan jábmiid luhtte. Son manná din ovdal Galileai, doppe dii oaidnibehtet su.’ Dál mun lean cealkán dán dudnuide.”

₈Nissonat vulggiiga hoahpus hávddi luhtte ja viehkaleigga balus ja stuorra ilus muitalit sága Jesusa máhttájeddjiide. ₉Dalle Jesus bođii sudno ovddal ja dearvvahii sudno. Soai manaiga su lusa, fátmmasteigga su julggiid ja rohkadalaiga su. ₁₀Jesus celkkii sudnuide: “Alli bala! Manni muitalit mu vieljaide ahte sii galget vuolgit Galileai. Doppe sii oidnet mu.”

₁₁Go nissonat leigga mannamin, de muhtumat fávttain bohte gávpogii ja muitaledje bajimusbáhpaide buot mii lei dáhpáhuvvan. ₁₂Bajimusbáhpat čoagganedje ráđđádallat vuorrasiiguin, ja sii mearridedje addit soalddáhiidda ollu ruđa. ₁₃Sii dadje soalddáhiidda: “Dadjet ahte su máhttájeaddjit bohte ihkku go dii leiddet oađđimin, ja suoládedje su. ₁₄Jos eatnanhearrá beassá dán gullat, de mii soažžudit su, nu ahte oažžubehtet leat oadjebasat.” ₁₅Soalddáhat válde ruđaid ja dahke nugo sidjiide lei daddjojuvvon. Ja dát sáhka lea viidánan juvddálaččaid gaskkas gitta otná beaivvi rádjái.

₁₆Buot oktanuppelohkái máhttájeaddji vulge Galileai ja manne várrái gosa Jesus lei gohččon sin mannat. ₁₇Go sii oidne su, de sii čippostedje ja gudnejahtte su, muhto muhtumat eahpidedje. ₁₈Dalle Jesus loaiddastii sin ovdii ja sártnui sidjiide: “Munnje lea addojuvvon buot fápmu almmis ja eatnama alde. ₁₉Vulget dan dihte ja dahket buot álbmogiid mu máhttájeaddjin: Gásttašehket sin Áhči ja Bártni ja Bassi Vuoiŋŋa nammii ₂₀ja oahpahehket sin doallat buot maid mun lean gohččon din doallat. Ja mun lean dinguin buot beivviid gitta máilmmi loahpa rádjái.”