Matteus 5

₁Go Jesus oinnii daid ollu olbmuid, de son manai várrái. Son čohkánii, ja máhttájeaddjit bohte su lusa. ₂De son sárdnugođii ja oahpahii sin ná:

₁₁Ávdugasat lehpet dii go olbmot bilkidit ja doarrádallet din mu dihte, gielistit ja sárdnot bahá din birra juohke láhkái. ₁₂Illudehket ja ávvudehket, dasgo din bálká almmis lea stuoris. Nu sii doarrádalle profehtaidge ovdal din.

₁₃Dii lehpet eatnama sálti. Muhto jos sálti veagahuvvá, de mo dan fas oažžu sálttisin? Dat ii dohkke šat maninge: Dat bálkása ja duolmmahaddá olbmuide.

₁₄Dii lehpet máilmmi čuovga. Gávpot mii lea vári alde, ii sáhte leat čihkosis. ₁₅Ja go olmmoš cahkkeha lámppá, de ii bija dan gári vuollái, muhto lámpájuolgái, vai dat báitá buot viesu olbmuide. ₁₆Nu báitos maiddái din čuovga olbmuide, vai sii oidnet din buriid daguid ja máidnot din Áhči guhte lea almmis.

₁₇Allet gátte ahte mun lean boahtán gomihit lága dahje profehtaid. In mun leat boahtán gomihit, muhto baicca ollašuhttit. ₁₈Duođaid, mun cealkkán didjiide: Lágas ii jávkka oktage bustávva, ii velá uhcimus sárggisge, ovdal go albmi ja eanan nohket, ovdal go buot lea dáhpáhuvvan. ₁₉Gii fámuhuhttá ovttage lága báhkkoma, vaikko vel buot uhcimusa, ja nu oahpaha olbmuid, dat adnojuvvo uhcimussan almmi riikkas. Muhto gii doallá lága ja nu oahpaha olbmuid, dat adnojuvvo stuorisin almmi riikkas. ₂₀Mun cealkkán didjiide: Jos din vanhurskkisvuohta ii šatta mihá stuoribun go čáloahppavaččaid ja farisealaččaid vanhurskkisvuohta, de ehpet eisege beasa almmi riikii.

₂₁Dii lehpet gullan ahte lea celkojuvvon máddariidda: Don it oaččo goddit; dat gii goddá, lea ánssášan rievtti duomu. ₂₂Muhto mun cealkkán didjiide: Dat gii suhttá vielljasis, ii vealtta duomus, dat gii cealká vielljasis: Don doavki! gártá Alla Ráđi ovdii, ja dat gii cealká: Don ipmilmeahttun jalla! ii vealtta helveha dolas.

₂₃Jos leat doalvumin iežat oaffarattáldaga áltárii ja das muittát ahte du viellja atná juoga unohasvuođa du vuostá, ₂₄de guođe iežat attáldaga áltára ovdii ja mana vuos soabadeamen vieljainat, ja boađe dasto oaffaruššat iežat attáldaga. ₂₅Soabat fargga vuostebeliinat dan bále go ain leahppi mátkkis. Muđui son addá du duopmára gihtii ja duopmárgis fávtta gihtii, ja don bálkestuvvot giddagassii. ₂₆Duođaid, doppe don it beasa ovdal go leat máksán maŋimuš evrrege.

₂₇Dii lehpet gullan celkojuvvomin: Don it oaččo rihkkut náittosdili. ₂₈Muhto mun cealkkán didjiide: Dat gii geahččá nissonii anistumiin, lea juo váimmustis rihkkon náittosdili. ₂₉Jos du olgeš čalbmi fille du, de gaikket dan luovos ja bálkes eret. Buoret dutnje lea massit ovtta lahtu, go ahte oppa du rumaš bálkestuvvo helvehii. ₃₀Ja jos du olgeš giehta fille du, de čuohpa dan gaskat ja bálkes eret. Buoret dutnje lea massit ovtta lahtu, go ahte oppa du rumaš gártá helvehii.

₃₁Lea maid celkojuvvon: Dat gii earrána áhkástis, galgá addit sutnje earrogirjji. ₃₂Muhto mun cealkkán didjiide: Juohkehaš gii earrána áhkástis mange eará siva go fuorrávuođa dihte, dagaha dan ahte nisson šaddá rihkkut náittosdili. Ja dat gii náitala nissoniin gean su boadnjá lea hilgon, rihkku náittosdili.

₃₃Dii lehpet gullan ahte lea celkojuvvon máddariidda: Don it oaččo vuordnut vearreváli, ja: Doala maid leat vurdnon Hearrái. ₃₄Muhto mun cealkkán didjiide: Allet eisege vuortno. Allet almmi bokte, dasgo dat lea Ipmila truvdnu, ₃₅allet eatnama bokte, dasgo dat lea su julggiid vuoluš, alletge Jerusalema bokte, dasgo dat lea stuorra gonagasa gávpot. ₃₆Ale vuortno iežat oaivvi bokte, dasgo don it máhte dahkat ovttage vuoktačalmmi vielgadin itge čáhppadin. ₃₇Go mieđihehpet, de dadjet dušše: Nu lea, ja go biehttalehpet, de dadjet dušše: Ii. Dat mii dasa lasihuvvo, boahtá bahás.

₃₈Dii lehpet gullan ahte lea celkojuvvon: Čalbmi čalmmis ja bátni bánis. ₃₉Muhto mun cealkkán didjiide: Allet vuostálastte sin geat dahket didjiide bahá. Jos muhtun doške du olgeš nirrii, de jorgal maiddái nuppi niera sutnje. ₄₀Jos muhtun dáhttu lágastemiin váldit dus báiddi, de atte sutnje vel gávttige. ₄₁Jos muhtun bágge du vázzit miilla iežas fárus, de vácce suinna guokte. ₄₂Atte dasa gii dus átnu, alege jorgal sealggi dasa gii bivdá dus loanas.

₄₃Dii lehpet gullan ahte lea celkojuvvon: Ráhkis lagamučča ja vašut vašálačča. ₄₄Muhto mun cealkkán didjiide: Ráhkistehket vašálaččaid, buressivdnidehket daid geat garuhit din, dahket buriid daidda geat vašuhit din ja rohkadallet daid ovddas geat doarrádallet din, ₄₅vai lehpet almmálaš Áhčádet mánát. Dasgo son diktá iežas beaivváža badjánit sihke baháide ja buriide ja vuolggaha arvvi sihke vuoiggalaččaide ja ipmilmeahttumiidda. ₄₆Jos dii ráhkistehpet dušše daid geat din ráhkistit, de ánssášehpetgo dii das bálkká? Almma tuolláratge dahket nu? ₄₇Jos dii dearvvahehpet dušše iežadet olbmuid, de mii das lea nu erenoamáš? Almma báhkinatge dahket aiddo nu? ₄₈Lehket ollásat, nugo din almmálaš Áhčči lea ollis.