Mika 6

₁Gullet maid Hearrá cealká:

Čuožžil, čuoččut iežat ášši!

Lehkoset várit duođašteaddjin,

divtte dieváid gullat iežat jiena!

₂Gullet Hearrá váidaga, várit,

dii eatnama agálaš vuođđudusat.

Hearrás lea ášši iežas álbmogiin,

son áigu diggot Israeliin.

₃Álbmogan, maid mun lean dahkan dutnje?

Mainna mun lean váibadan du?

Vástit munnje!

₄Munhan bukten du Egyptas,

osten du friddjan šlávvaviesus,

vuolggahin Mosesa, Arona ja Mirjama

du oaivámužžan.

₅Álbmogan, muitte maid

Balak, Moaba gonagas, áiggui,

ale vajálduhte maid Bileam, Beora bárdni,

sutnje vástidii.

Muitte iežat mátkki Šittimis Gilgalii,

de don dovddiidat

Hearrá vuoigatlaš daguid.

₆Maid mun galggašin buktit,

go loaiddastan Hearrá ovdii,

gopmirdan almmi Ipmila ovdii?

Buvttášingo mun sutnje boaldinoaffariid,

jahkásaš gálbbiid?

₇Dáhttugo Hearrá duháhiid vierccaid,

logiidduháhiid oljojogaid?

Galggašingo mun oaffaruššat

vuosttašriegádeaddján iežan rihkkumis,

mánnán danin go suddudin?

₈Olmmoš, Hearráhan lea almmuhan dutnje

mii lea buorre.

Dušše dán son gáibida dus:

Daga dan mii lea vuoigat,

čájet oskkáldas ráhkisvuođa

ja vádjol vuollegaččat Ipmiliinnát.

₉Gullet, Hearrá rávká gávpoga!

Viissis dat gii ballá su namas.

Váldet vára, gávpoga ássit

ja mearrideaddjit!

₁₀Velá aingo dis leat

dán vearrivuođa viesus

vearrivuođain fidnejuvvon dávvirat

ja vádjigis efamihtu

maid mun lean garuhan?

₁₁Sáhtášingo mun dohkkehit dan

ahte dii beahttibehtet veavttain

ja atnibehtet burssas

vearreveaktageđggiid?

₁₂Du riggát leat veahkaválddálaččat,

du ássit gielástallet,

sin sánit leat behtolaččat.

₁₃Danin mun áiggun ráŋggáštit du,

duššadit du du suttuid dihte.

₁₄Don borat, muhto it gallán;

du čoavji lea ain guorus.

Dan maid čoakkát, don it veaje várjalit,

ja dan maid fidnet várjaluvvot,

doalvu miehkki.

₁₅Don gilvvát, muhto it beasa láddjet,

don božát oliivvaid, muhto it beasa

vuoidat iežat oljjuin,

don duolmmat viidnemurjjiid,

muhto it beasa juhkat viinni.

₁₆Dii lehpet oamastan Omri ásahusaid,

Ahaba soga dagut

leamaš didjiide ovdagovvan,

seammá geainnuid dii lehpet vádjolan.

Dan dihte mun dagan du ávdimin

ja attán du ássiid hiddjiduvvot,

ja dii buohkat šaddabehtet guoddit

mu álbmoga heahpada.