Markus 11

₁Go sii lahkanedje Jerusalemii ja bohte Betfagei ja Betaniai Oljovári vuollái, de Jesus vuolggahii guoktása máhttájeddjiinis ₂ja celkkii sudnuide: “Manni don gillái mii doppe oidno. Dallánaga go boahtibeahtti dohko, de oaidnibeahtti čadnojuvvon ásenvárssá man čielggis ii oktage olmmoš leat vel čohkkán. Čoavdi dan ja bukti deike. ₃Jos muhtin jearrá manne doai dahkabeahtti nie, de vástideahkki: Hearrá dárbbaša dan, muhto vuolggaha dan fargga fas deike.” ₄Soai vulggiiga ja gávnnaiga ásenvárssá mii lei čadnojuvvon gáhtii uksanjálbmái. Soai čovddiiga dan. ₅Muhtun olbmot geat ledje das, jerre: “Maid doai dahkabeahtti? Manin čoavdibeahtti várssá?” ₆Soai vástideigga nugo Jesus lei gohččon, ja sii dikte sudno mannat. ₇Soai doalvvuiga várssá Jesusii ja lebbiiga iežaska olgguldasbiktasiid dan ala, ja Jesus čohkánii dan čielgái. ₈Ollugat lebbo geidnui biktasiid, earátgis lastaovssiid maid sii čuhppe geaidnoguoras. ₉Ja dat geat vázze su ovddas ja maŋis, čurvo: Hosianna! Buressivdniduvvon lehkos son guhte boahtá Hearrá nammii! ₁₀Buressivdniduvvon lehkos min áhči Davida riika mii dál boahtá! Hosianna allagasas! ₁₁Nu Jesus bođii Jerusalemii. Son manai tempelii ja geahčadii doppe buot diŋggaid, muhto go lei juo maŋŋit, de son manai fas Betaniai oktan guoktenuppelohkái máhttájeddjiinis.

₁₂Go sii maŋit beaivvi vulge Betanias, de Jesusii šattai borranmiella. ₁₃Son oinnii guhkkin fiikonmuora mas ledje lasttat, ja son manai geahččat gávdnošiigo das mihkkege. Muhto go son bođii muora lusa, de son ii gávdnan das eará go lasttaid, danne go ii lean fiikoniid áigi. ₁₄Dalle Jesus celkkii murrii: “Allos oktage šat goassege borro du šaddosiid!” Su máhttájeaddjit gulle dan.

₁₅Go sii bohte Jerusalemii, de Jesus manai tempelii ja ádjigođii olggos daid geat ledje doppe vuovdimin ja oastimin. Son gomihii ruhtacuvkeheddjiid bevddiid ja duvvávuvdiid beaŋkkaid ₁₆iige suovvan geange guoddit maidege tempelšilju rastá. ₁₇Ja son oahpahii olbmuid ná: “Almma lea čállojuvvon: Mu viessu galgá gohčoduvvot buot álbmogiid rohkadusa viessun? Muhto dii lehpet dahkan dan rievvárbiedjun.”

₁₈Bajimusbáhpat ja čáloahppavaččat gulle dan ja árvaledje mo sáhtášedje goddit Jesusa. Sii balle sus, danne go olbmot ovddošedje sakka su oahpahusa. ₁₉Go eahket lei šaddan, de Jesus ja máhttájeaddjit vulge gávpoga olggobeallái.

₂₀Go sii árrat iđedis manne fiikonmuora meattá, de sii oidne ahte dat lei ástan ruohttasiid ráje. ₂₁Dalle Peter muitái mii lei dáhpáhuvvan, ja son dajai Jesusii: “Rabbi, geahča! Fiikonmuorra maid don garuhit, lea ástan.” ₂₂Jesus celkkii sidjiide: “Oskot Ipmilii. ₂₃Duođaid, mun cealkkán didjiide: Jos muhtin dadjá dán várrái: ‘Loktan ja bálkestahte merrii!’ de dat dáhpáhuvvá, jos son ii váimmustis eahpit muhto osku ahte nu šaddá go son dadjá. ₂₄Danne mun cealkkán didjiide: Maid ihkinassii dii rohkadusas átnubehtet, de oskot ahte lehpet juo ožžon dan, ja dat lea din. ₂₅Ja go čuožžubehtet rohkadallamin, de addet ándagassii buot unohasvuođaid mat dis leat guđege vuostá. Dalle maiddái din Áhčči gii lea almmis, addá didjiide ándagassii din rihkkumiid. ₂₆Muhto jos ehpet atte ándagassii, de ii din almmálaš Áhččige atte didjiide ándagassii din rihkkumiid.”

₂₇Sii bohte fas Jerusalemii. Go Jesus lei vázzimin tempelšiljus, de bajimusbáhpat, čáloahppavaččat ja vuorrasat bohte su lusa. ₂₈Sii jerre sus: “Mainna válddiin don dagat dákkára? Gii lea addán dutnje válddi dahkat dán?” ₂₉Jesus vástidii sidjiide: “Mun maiddái jearan dis juoidá. Vástidehket dii vuos munnje, de mun cealkkán didjiide makkár válddiin mun dagan visot dán. ₃₀Bođiigo Johannesa gásta almmis vai olbmuin? Vástidehket munnje!” ₃₁Sii árvaledje guhtet guimmiideasetguin: “Jos mii vástidit: Almmis, de son dadjá: Manne dii dalle ehpet oskon sutnje? ₃₂Vai dajašeimmetgo: Olbmuin?” Muhto sii balle álbmogis, danne go buohkaid mielas Johannes duođaid lei profehta. ₃₃Danin sii vástidedje: “Mii eat dieđe.” Dalle Jesus celkkii sidjiide: “In munge dalle daja didjiide mainna válddiin mun dagan visot dán.”